AMOS 2:4 - BIBEL JAMITA NA DENGGAN

⁴ Songon on ma didok Tuhan, “Hara ni na dung mardosa halak Juda marhite tolu hajahatan lopus tu opat hajahatan, nada tarikonKu be haputusanKi. Dilaosi halahi do angka parenta ni Tuhan, jana nada dimomosi halahi haputusanNia. Lilu do halahi dibaen angka debata na nisomba ni angka ompu ni halahi.

AMOS 2:4 Referans Kwoze

JEHESKIEL 20:24

hara ni na dipasiding ni halahi angka parenta na sian Au, dilaosi halahi angka uhumKu, ramun dibaen halahi Ari Sabat, jana laing tontong do halahi marsomba angka debata na nisomba ni ompu ni halahi.

JEHESKIEL 20:16

Hubaen pe janji i hara ni na dipasiding ni halahi do angka parentangKu, dilaosi halahi angka tona na sian Au jana ramun dibaen halahi Ari Sabat. Gumonan do di halahi marsomba angka gana-ganaan ni halahi.

JEHESKIEL 20:13

Hape di padang parhorsihan i, dialo halahi muse do Au. Dilaosi halahi do angka tona na sian Au na manjamin mangolu tongtong sanga ise na patuluskonsa. Gabe hodar jana ramun dibaen halahi Ari Sabat i. Hara ni i, di parhorsihan i madung nian hobas Au laho palalu murukKu tu halahi dohot mamusa halahi.

HABAKUK 2:18

Aha ma he guna ni patung gana-ganaan? Aha ma he guna ni patung gana-ganaan sibaen gabus i? Harana porsaya do na mambaenna di parkarejoanna, hape nian angka gana-ganaan na ngungu do na nibaenna i.

HOSEA 12:2

Sanga aha na nibaen ni halak Israel sian manyogot lalu tu potang, nada adong gunana jana hum na manyegohon do i songon alogo Habincaran. Mur manjadi-jadi do hageduhan dohot hakejamon di tonga-tonga ni halahi. Dipambaeni halahi angka parjanjian dohot Asur jana marboniaga halahi dohot Mesir.”

JESAYA 28:15

Maginjang ma rohamunu hara ni na dung mambaen parjanjian dohot hamatean dohot na dung satahi hamu dohot kuburan. Madung pasti di pangkilalaanmunu na so hahuaon ni parmaraan na giot ro i be hamu, umbaen na mamake tipu akal hamu laho manjagohon dirimunu.

SURAT NI SI PAULUS TU PARLAGUTAN ROM 1:25

Dipasambar halahi ma hasintongan ni Debata tu gabus, jana nada be Panompa i, tapi angka na nitompa i noma tehe disomba jana dioloi halahi. Hape nian angkon na Manompa i do sipujion salolot-lolotna! Amen.

AMOS 3:2

“Sian sandok bangso na di tano on, hum sasada hamu sajo do bangso na Hutanda dohot na Huantoi. I ma mambaen godang dosamunu, jana angkon uhumanKu hamu.”

JEHESKIEL 20:18

Tapi sabalikna, Hupaingot ma angka bagian na umposo sian halahi, Hudok songon on, ‘Ulang ma ihutkon hamu angka aturan na nibaen ni angka ompu na umpompar hamu. Ulang tiru hamu hasomalan ni halahi jana ulang ramun baen hamu dirimunu marhite na dohot marsomba angka debata ni halahi.

JEREMIA 9:14

Jogal do roha ni halahi jana marsomba tu Baal do halahi songon na niajarkon ni angka ompu ni halahi.

JEREMIA 8:9

Pailaon noma angka halak na pistar di tonga-tongamunu; mago ma roha ni halahi jana tarjorat. Nada ra halahi manangihon sipaingotKu; saonnari hapistaran aha dope na tading di halahi?

NEHEMIA 1:7

Anak panggagai do hami tu Ho jana pangalanggar di angka parentaMu. Nada hami oloi angka uhum na nilehenMu tu hami marhite si Musa, naposoMi.

2 RAJA-RAJA 17:19

Tapi halak Juda pe nada dioloi halahi Tona Ni Tuhan, Debata ni halahi. Diihutkon halahi do angka pangalaho na gabe hasomalan ni halak Israel.

1 PETRUS 1:18

Angkon botoonmunu do sanga aha na dung digarari laho paluahon hamu sian ngolu na so marguna i na nipateankon ni angka ompungmunu tu hamu. Nada barang na ra sego songon perak sanga sere dibaen panggararna,

1 TESSALONIKA 4:8

Hara ni i, sanga ise na manulak pangajaran on nada jolma be na nitulakna, tapi na manulak Debata na mangalehen TondiNa na badia i do tu hamu.

HOSEA 6:11

Taringot tu hamu ale halak Juda, madung Hutontuhon hatihana manguhumi hamu laing hara ni parbuatanmu.”

JEHESKIEL 22:28

Dibunihon angka panurirang do dosa i; songon na mangkapur tembok na hodar do halahi. Gabus do angka parnidaan ni halahi, songon i muse angka alatan ni halahi. Mangoku do halahi anggo tona na nipalalu ni halahi i na nijagit ni halahi do sian Tuhan Debata i, hape nada adong manghobari Au tu halahi.

JEHESKIEL 22:8

Dipahodar ho do angka inganan paribadatan tu Au jana Ari Sabat pe nada diargahon ho.

JEHESKIEL 20:30

Jadi palalu ma tu halak Israel sanga aha na Hudok, Au Tuhan Debata mandok tu halahi, ‘Biasi dibaen hamu angka dosa songon na nipambaenan ni ompumunu? Laing songon halahi, hamu pe mangihut do tu angka gana-ganaan hagigian i.

JEHESKIEL 13:22

Angka halak na burju na so adong Huhahua, dipahancit hamu ma roha ni halahi marhite pargabusonmunu i. Angka halak na jahat dipagodang hamu rohana anso tongtong mardosa boti anso ulang dipalua.

JEREMIA 16:12

Hape jumahat dope na nibaenmunu. Na jogal do rohamunu jana rohamunu na jahat i do diparrohahon hamu. Nada ra hamu mangoloi Au.

JEREMIA 8:2

nada laho palaguton sanga tanomon mangulahi tapi padiaron do rerak di tano i songon rompak. Marserak ma angka holi-holi ni jolma i di las ni ari, di torang ni bulan dohot angka bintang na nihaholongan ni halahi, na nioloanna, na nisomba dohot pangidoan ni panogu-noguon ni halahi.

JEREMIA 6:19

Parrohahon ma ale portibi! Nada ra bangsongKu manjagit pangajaranKu jana nada mangoloi tu Au. Hara ni angka tahi ni halahi, Huparo ma parmaraan tu halahi.

JESAYA 44:20

Tudos tu na mangan abu do pangalaho i. Songon i ma liluna dibaen pikiran na oto i, gabe nada haurupan be ia. Nada ra ia mangoku tu dirinia sandiri, anggo patung na di tangannia i sanga na bia pe nada Debata i.

NEHEMIA 9:26

Hape mangalo do bangsoMi jana nada mangoloi tu Ho, uhumMu dohot aturanMu dipasiding do, dibunu do angka panurirang na paingotkon halahi, anso mulak tu Ho Debatana, nian halahi. O Tuhan, laing marpupu ma i Ho dipalayas halahi.

2 JUJUR TAON 30:7

Ulang ma hamu songon angka ompumunu i dohot angka halak Israel na asing na so setia tu Tuhan Debatana i. Madung diida hamu sandiri sanga songon dia dokdokna panguhumiNia tu halahi.

HAKIM-HAKIM 10:6

Mangulahi ma muse mardosa halak Israel tu Tuhan. Nada diantureskon halahi Tuhan jana mantak halahi marsomba tu Tuhan. Marsomba halahi tu angka Debata Baal dohot Astoret dohot tu angka debata ni bangso Siria, Sidon, Moab, Amon dohot Pilistin.

JEREMIA 16:11

Paboa ma tu halahi na Hudokkon songon on, ‘Madung ditadingkon ompumunu Au laho marsomba jana mangoloi tu angka debata. Dipasiding halahi do Au jana nada ra halahi mangoloi angka TonangKu.

AMOS 1:3

Didok Tuhan ma, “Marpupu do halak Damaskus mardosa, hara ni i angkon hona uhum halahi Hubaen. Santak do kejamna pambaen ni halahi tu halak Gilead.

MIKA 6:12

Angka halak na mora di hutamu mamoroi do sian halak na pogos, jana pargabus do hamu sudena.

2 JUJUR TAON 25:14

Dung ditaluhon halahi tentara ni Edom i, mulak ma si Amasia maroban angka patung ni gana-ganaan ni Edom jana dibaen ia ma i di Juda. Lalu manutung dupa ma ia tu patung i jana disomba ia ma i.

JEREMIA 17:27

Tarjadi ma sudena i muda dung marpangoloion hamu tu Au jana diparbadia i hamu Ari Sabat i songon ari na mardohonan. Ulang maroban barang bagi aha pe hamu mamolus sian angka horbangan ni Jerusalem anggo di ari i. Muda dilanggar hamu do angka na Huparentahon i, tutungonKu abis angka horbangan ni Jerusalem i dohot angka bagas godang na disi jana nada haintopan api i.’ ”

HOSEA 12:3

Adong do parkaro ni Tuhan dohot bangso Juda; laing uhumonNia muse do dohot Jakob hara ni pangalaho ni bangso i. BaloskononNia ma parbuatan ni halahi i.