1 SAMUEL 6:3 - BIBEL JAMITA NA DENGGAN

³ Jadi ning halahi ma mangalusi, “Ulang paulak hamu sajo songon i anggo Poti Parjanjian ni Debata ni Israel i, tapi angkon marangkup silua do i laho manobus dosamunu. Jadi muda songon i, malum ma hamu, jana botoonmunu ma sanga hara ni aha umbaen na sai torus diuhumi Debata ni Israel i hamu.”

1 SAMUEL 6:3 Referans Kwoze

1 SAMUEL 6:9

Parrohahon hamu ma pardalanna i; muda mardalan adop luatna i sandiri do, i ma tu kota Bet-Semes, i ma tandana bahaso Debata ni halak Israel i do na parohon hamamago na jorbut i tu hita. Tapi muda nada kehe tusi, botoonta ma na so sian Debata ni Israel haroroan ni hasusaan i, tapi na ro songon i sajo do i.”

PANGARATAION 16:16

Angkon ro do sude halaklahi ni Israel manyomba Tuhan di inganan paribadatan na sada i tolu noli sataon: Di Ari Pesta Paskah, Pesta Gotilon dohot di Pesta Undung-undung Bulung Rata. Angkon ganop be marsioban haulna,

HARURUAR 23:15

Di bulan Abib, angkon baenonmunu do Pesta Roti Na So Marragi songon na dung Huparentahon tu hamu, angke di bulan i ma hamu manadingkon tano Mesir. Ulang pangan hamu roti na nibaen marcampur ragi salolot pesta sipitu ari i. Ulang hamu ro maribadat tu Au anggo so maroban haul.

HARURUAR 34:20

Tapi anggo anak ni halode na parjolo sorang, angkon tobusonmunu do dohot sada biri-biri songon gontina. Muda nada ra hamu manobusna angkon ponggolkononmu do rungkungna i. Ganop anak siangkaanmunu angkon tobusonmunu do i. Ulang ma adong sahalak na tarida ro tu jolongKu na so marsilua.

JOB 10:2

Ale Debata, ulang ma da au sai pasala. Patorang ma da dialo Ho iba hara ni aha.

1 SAMUEL 5:11

Jadi gabe dipiohon halahi ma sude raja ni Pilistin anso marlagut, didok halahi ma, “Paulak hamu ma da Poti Parjanjian ni Israel i tu ingananna humani anso ulang hona bunu hita dohot sisolkotta.” Masa ma hagunturon godang di kota i sude, angke hona uhum na borat situtu do halahi dibaen Debata.

1 SAMUEL 5:9

Tapi di na lalu Poti i disi, diuhum Tuhan ma kota i muse jana masa ma hasonggoton na godang situtu. Hona uhum ma halak kota i na poso sanga na matobang hona ma na baro-baroon na martubuan di pamatang ni halahi.

1 SAMUEL 5:7

Marnida na masa i, didok halahi ma, “Na hona uhum ni Debata ni Israel do hita on dohot Debatanta Dagon, ulang tapaloas be lumolot Poti Parjanjian i di hita on.”

HAMALIMON 6:6

Songon haul partobus ni hasalaan tu Tuhan, angkon obanon ni halahi ma tu malim sada biri-biri sanga sada hambeng jantan na so martihas. Asamon ma argana mangihutkon arga na dung ditontuhon.

HAMALIMON 5:6

Jana songon uhuman hara ni dosania i, angkon obanonna di Tuhan sada biri-biri sanga sada hambeng boru-boru. Sombahonon ni malim i ma haul i, anso dapot hasesaan ni dosa ni halakna i.

1 SAMUEL 6:8

Dung i buat hamu ma Poti Parjanjian ni Tuhan i, panaek hamu ma i tu ginjang ni padati i jana payakkon hamu ma di lambung ni poti na marisi barang-barang sere silehenonmunu i tuSia na gabe songon silua partobus ni dosamunu i. Padiar hamu ma mardalan sandiri padati i.

HARURUAR 8:15

Dung diida raja i na dung marmatean sude tohuk i, dipajogal ia ma rohania mangulahi. Jana songon na nidok ni Tuhan, nada ra raja i manangihon si Musa dohot si Harun.