1 SAMUEL 5:4 - BIBEL JAMITA NA DENGGAN

⁴ Tapi ancogotna i manyogot dope diida halahi ma na dung unggal mangulahi patung i di jolo ni Poti Parjanjian i. Anggo on maponggol ma ulu dohot tangan ni patung i dua-dua jana payak ma i di lambung ni pintu; hum pamatang ni patung i noma na tinggal. (

1 SAMUEL 5:4 Referans Kwoze

MIKA 1:7

Angka patungna sigodang arga i diropuk, sude na dilehen tu angka dadaboru na markarejo di bagas pamelean i hona tutung, jana sude gana-ganaanna i disegohon. Dijagit Samaria do sudena i gabe sipakeonna di bagasan ibadatna tu debata hagabean. Saonnari obanon ni angka musuna noma sudena i gabe ibadat di inganan na asing.”

JEREMIA 50:2

“Paboa ma barita tu angka bangso! Pasar ma barita i. Baen ma tanda anso sar barita i. Ulang tabuni-tabunihon barita i. Madung hona taban Babel! Madung maila Debata Bel, madung tarsonggot Marduk! Madung maila angka gana-ganaan i.

JEREMIA 10:11

Hamu ale angka bangso, angkon paboaonmunu do tu halahi, sisegohonon do angka debata na so manompa langit dohot tano. Mago do halahi sian portibi on.)

DANIEL 11:8

Di na laho mulak ia tu Mesir, obanonnia ma patung ni debata ni musuna i dohot barang-barang sere dohot perak na dung dihaulkon tu debatana i. Nada porangonnia be raja ni Siria piga-piga taon.

JESAYA 27:9

Tapi anggo dosa ni Israel hum sada do dalanna anso tarsesa i, i ma muda digiling lamot songon soda angka langgatan parsombaan tu angka debata. Sandok panutungan ni hamonyan dohot tiang gana-ganaan Debata Asera angkon nisarsarkon muse.

1 SAMUEL 6:5

Jadi angkon baenonmunu do tiruan ni baro dohot monci na mangganas di luatmunu on. Songon i ma baen hamu pasangapkon Debata ni Israel i. Betak antahonNia ma manguhum hamu dohot angka debata maradu tanomunu.

JESAYA 40:20

Angka halak na giot pajongjongkon patung dipili do hayu na maol busuk, jana dijalahi ma angka tukang na malo anso ulang mura goyang patung i.

JEREMIA 10:14

Marnida sudena i, mamoto ma jolma, na oto do hape ia jana na soada hapistaranna. Maila ma angka na mambaen patung angke na so marguna jana na so marhosa do gana-ganaan na nipaulina.

JEREMIA 10:15

Nada mararga angka gana-ganaan i, sipalayason jana sipabileon do i. Di hadudumpang ni hatihana mago ma halahi sudena.