1 SAMUEL 24:12 - BIBEL JAMITA NA DENGGAN

¹² Ligi ma amang, ligi ma gotap-gotap ni baju ni raja i na hutiop on! Satutuna tarbunu au do nian raja i, tapi hum na saotik on sajo do hugotap. Jadi torang do na so adong rohangku mambaen na jahat sanga na giot mangago. Hape diayak-ayak raja do au haru pe nian na so adong saotik pe salangku maradopkon raja i.

1 SAMUEL 24:12 Referans Kwoze

MASMUR 43:1

Ale Debata, ondihon ma au di parkarongku maradopkon angka halak na durako. Patorang ma na so marsala au, palua ma au sian parjahat dohot pangicu.

HAKIM-HAKIM 11:27

Nada, nada marsala au tu ho. Ho do na marsala hara ni na pajolohon mamorangi au. Tuhan ma Hakimna na mamutuskon parkaro on sadari on antara ni bangso Israel dohot bangso Amon.”

MASMUR 35:1

Tuhan, alo ma sanga ise na mangalo au, porangi ma sanga ise na mamorangi au.

PAMUNGKAAN 16:5

Jadi didok si Sarai ma tu si Abram, “Madung hulehen si Hagar pakeonmu, jana mamungka diboto ia na dung denggan pamatangnia layas ma rohania mida au. Ho do na sala disi. Sai Tuhan ma na paujungkon parkaro on antara ho dohot au.”

1 PETRUS 2:23

Di na hona incak Ia, nada mangincahi Ia mambaloskon. Dompak na niparkancitan i Ia, nada mangondam Ia; tapi dipasahat Ia do parkaroNia i tu Debata, Panguhum na tigor i.

SURAT NI SI PAULUS TU PARLAGUTAN ROM 12:19

Hamu ale angka dongan na nihaholongan! Ulang ma hamu sandiri na mambaen pambaloson, tapi lehen ma inganan tu hamumuruk ni Debata. Angke tarsurat do, “Au do mambaen pambaloson,” ninna Tuhan.

MASMUR 94:1

Ale Debata, Ho do Debata na mambaloskon, patuduhon ma pamalosonMi ale Debata!

JOB 5:8

Sugari songon ho au, dohononku ma tu Debata, aduhononku noma tuSia, jana dipasahat parkaroniba.

HALUMBAAN 6:10

Jana pio-pio ma halahi marsora na gogo ninna ma, “Ale Tuhan, na badia jana na sintong! Sadia honok nari dope anso diuhumi, jana dibaloskon Ho mudarnami tu angka na maringanan di tano on?”

1 SAMUEL 26:23

Sai na pasupasuon ni Tuhan do ganop halak na burju jana na tigor. Angke haru pe dipasahat Tuhan raja i sadari on tu au, tapi na so ra do au mambaen jahat maradopkon raja na nipili ni Tuhan.

PAMUNGKAAN 31:53

Debata na nisomba ni si Abraham jana na nisomba ni damang si Nahor ma na gabe panguhum di hita.” Dung i marjanji muse ma si Jakob mangasahon goar ni Debata na nisomba ni si Ishak amangnia i jana marsumpa ma ia paboa na marsitutu do ia maniop janji i.

1 SAMUEL 24:15

Diparrohahon raja i ma jolo au on na giot bunuon ni raja ni Israel! Ligi ma au on na nikojarnia i! Anjing na mate sajo do au, hum songon sada hutu sajo.

2 SAMUEL 22:48

Ia do na mamolus hajahatan ni musungku, jana na manaluhon angka bangso di jolongku.

1 SAMUEL 20:1

Dung i lari ma si Daud sian Nayot jana kehe ma ia mandapotkon si Jonatan lalu manyapai, “Aha dehe salangku? Hajahatan dia do na hubaen jana apala aha do dosangku tu amanta umbaen na giot bunuonna au?”

1 JUJUR TAON 12:18

Jadi adong ma sahalak sian halahi, i ma si Amasai na gabe pamimpin ni na margoar “Tridasawira i”, digohi Tondi Ni Debata ma ia jana didok ia ma, “O Daud, anak ni si Isai! Donganmu do da hami! Sai manjadi ma nian karejomu dohot angka na mandongani ho. Mamihak tu ho do Debata!” Jadi dijaluangi si Daud ma halahi jana diangkat ia ma halahi gabe perwira di tonga-tonga ni tentarania i.