1 PETRUS 1:3 - BIBEL JAMITA NA DENGGAN

³ Mandok tarimakasi ma hita tu Debata bope Ama ni Tuhanta Jesus Kristus! Hara ni denggan ni rohaNia, dibaen Ia do hita gabe jolma na imbaru na maruli arop ni roha na tongtong mangolu, angke madung dipangolu Kristus mangulahi sian hamatean.

1 PETRUS 1:3 Referans Kwoze

1 PETRUS 1:23

Angke markite-hite hata ni Debata na mangolu jana na manongtong i, madung gabe jolma na imbaru hamu dibaen, i ma na so sorang sian jolma, tapi sian Ama na manongtong i do.

1 JOHANNES 5:4

angke sanga ise na sorang sian Debata tartaluhonsa do portibi na jahat on. Jana haporsayaanta i do hamonangan na manaluhon portibi on.

SURAT NI SI PAULUS TU PARLAGUTAN ROM 15:13

Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia.

EPESUS 1:7

Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia,

2 KORINTUS 1:3

Pinuji ma Debata Ama ni Tuhanta Jesus Kristus. Ia ma Ama na sun denggan rohaNa jana Ia do Debata na mangalehen pangapoion ni roha tu jolma manusia.

1 JOHANNES 3:3

Sude halak na mararop ni roha tuSia, dipaias ia ma dirina songon Ia na badia i.

SURAT NI SI PAULUS TU PARLAGUTAN ROM 12:12

Jop ma rohamunu mararop roha tu Tuhan i, sobar ma hamu muda ro hasusaan, jana haburjuhon hamu ma na martangiang.

1 JOHANNES 2:29

Muda diboto hamu, na tigor do Ia, tangkas muse ma di hamu, barang ise na mambaen hatigoran, i do na tubu sian Ia.

EPESUS 1:3

Pinuji ma Debata, Ama ni Tuhanta Jesus Kristus! Dipasupasu Ia do hita dohot sude ragam-ragam ni pasupasu partondion sian banua ginjang, hara ni na dung mardomu i hita dohot Kristus.

HARURUAR 34:6

Dung i mardalan ma Tuhan mamolus sian jolo ni si Musa jana pio-pio, “Au, Tuhan, Au do Debata parholong jana paribo roha. Na gok holong do Au, setia jana na lambok.

EPESUS 3:20

Markite-hite kuaso ni Debata na marsitutu i markarejo di bagasan dirinta, tarpatupa Debata do dao umbahat dope sian angka na hita pangido dohot na tapikirkon.

EPESUS 1:17

Hupangido anso dilehen Debata ni Tuhanta Jesus Kristus, i ma Debata na sangap i, TondiNia tu hamu. Gabe marbisuk do hamu baenon ni Tondi i, jana patandahononNia ma Debata tu hamu anso ditanda hamu Ia.

1 PETRUS 3:21

Antong, na masa i ma na gabe gambaran ni pandidion sisaonnari on na paluahon hamu. Nada karejo na giot paiaskon angka na hodar di pamatangniba pandidion i, tapi songon janjimunu do i tu Debata sian taroktok na denggan. Gabe dipalua pandidion i ma hamu hara ni na dung mulak mangolu Jesus Kristus mangulahi sian hamatean,

MASMUR 86:15

Tapi anggo Ho, ale Tuhan, Debata parholong do Ho jana pardenggan basa. Holong ni rohaMu na manongtong i maradu marlobian parsobar do Ho jana tongtong haposan.

1 TIMOTEUS 1:14

Hape asi ni roha ni Tuhanta i madung dipasupasuhon marlobi-lobi tu au. Dilehen Ia do i marhite haporsayaan dohot holong ni roha di bagasan Kristus Jesus.

EPESUS 2:4

Tapi na godang do denggan ni roha ni Debata! Songon i ma holong ni rohaNia tu hita.

JAKOBUS 1:18

Hara ni giot ni rohaNia sandiri, dibaen Ia do hita gabe dakdanakNia markite-hite hataNia na tigor i, anso dapotan inganan na dumenggan hita sian sasudena na nitompaNia.

TITUS 2:13

Saonnari na painte-intehon Ari na niarop ni rohanta i do hita. Anggo di Ari i, idaon ni portibi on ma hasangapan ni Jesus Kristus, i ma Debata Na Gumodang i jana Jesus Kristus Sipalua hita.

1 KORINTUS 15:20

Hape anggo satutuna madung dipangolu mangulahi Kristus sian hamatean, songon siangkaan sian angka halak na dung mate. Jana on ma jaminanna, paboa na pangoluon do mangulahi angka jolma na dung marmatean i.

1 KORINTUS 13:13

Jadi tinggal ma na tolu on: Haporsayaan, arop ni roha, dohot holong ni roha; tapi na gumodang sian na tolu i, holong ni roha do.

1 JOHANNES 3:9

Ganop halak na sorang sian Debata, nada mangkarejohon dosa be, harana madung adong do disia bako ni Debata jana nada be mangkarejohon dosa, harana na sorang sian Debata do ia.

1 PETRUS 2:2

Songon dakdanak na baru sorang na sai manguas di susu na polin, laing songon i ma hamu manguas tongtong di susu na polin sian Hata Ni Debata; anso mur magodang hamu jana dipalua.

IBRANI 3:6

Tapi anggo Kristus, songon anak do di bagasNia. Jana hita do bagas i muda tongtong marmomos jana marpos ni roha paboa na jagitonta do sanga aha na niarop ni rohanta.

1 TESSALONIKA 1:3

Muda hatiha mangadop hami tu Debata Amanta i, sai tongtong do hami ingot hamu, i ma karejo na nipatupamunu hara ni haporsayaanmunu tu Kristus, bope holong ni rohamunu maradopkon dongan na asing jabat disarihon hamu halahi dohot arop ni rohamunu na togu maradopkon Tuhanta Jesus Kristus.

KOLOSSE 1:27

Anggo tu bangsoNia i ra do Debata paboahon sanga na bia dengganna dohot godangna rahasiaNia i di sudena jolma manusia. On do rahasia i: Di bagasan dirimunu do Kristus, jadi gabe dohot ma hamu maruli di hagodangan ni Debata.

SURAT NI SI PAULUS TU PARLAGUTAN ROM 8:24

Angke madung dipalua hita, haru pe laing di bagasan arop ni roha. Tapi muda dung taida na niarop ni rohanta i, nada arop ni roha be na songon i. Harana, ise ma he na sai mararop ni roha tu na dung niidana?

SURAT NI SI PAULUS TU PARLAGUTAN ROM 8:11

Muda Tondi Ni Debata na pangoluhon Jesus sian hamatean i do mangolu di bagasan dirimunu, jadi pangoluonNia muse ma pamatangmunu na ra mate i, songon Kristus na nipangoluNia sian hamatean i, markite-hite TondiNia na mangolu i di bagasan hamu.

JOHANNES 1:13

i ma angka na so tubu sian mudar, sanga sian roha sibuk, sanga sian hagiot ni halaklahi, tapi na ditubuhon ni Debata.

JUNUS 4:2

Jadi martangiang ma ia, “Nada he hudok hian do ale Tuhan taran so kehe sian bagasku na salpu i, na giot songon i hian do baenonMu? Hara ni i ma umbaen na huompoti kehe tu Tarsis! Huboto humani do Debata pangusayang dohot parholong Ho, na lambok jana mura sajo do manigor di Ho pauba sangkapMu manguhumi.

JESAYA 26:19

Ale Tuhan bangsoMu na mate i mangolu ma mangulahi, angka bangke ni halahi ngot sanoli nari. Halak na dung ditanom di bagasan tano, ngot ma i jana marolop-olop. PangoluonMu ma bangsoMu na dung mate honok, songon ombun na pajagarkon tano.”

1 JOHANNES 5:18

Taboto do anggo halak na dung gabe dakdanak ni Debata, nada pola sai marpupu halahi mambaen dosa, angke dijagohon Anak Ni Debata do ia jana nada tarkahua si Parjahat i ia.

1 JOHANNES 5:1

Barang ise na porsaya bahaso Jesus do Kristus i, i do na sorang sian Debata, bope barang ise na mangkaholongi Ia na manyorangkon, dihaholongi ia muse do na sorang sian Ia.

KOLOSSE 1:23

Hara ni i angkon ojak jana togu do hamu di bagasan haporsayaan i, jana nada ra be hamu nipaorot sian arop ni roha ni Jamita Na Denggan na dung binegemunu. Madung dijamitahon jamita i tu sude na nitompa di tano on, jana na dung gabe naposo ni i do au si Paulus.

SURAT NI SI PAULUS TU PARLAGUTAN ROM 5:10

Harana muda hatiha musu dope hita, dipadame hita dohot Debata markite hamamate ni AnakNia, tarlumobi hita na saonnari na dung dipadame, pasti do angkon dipalua markite ngoluNia.

SURAT NI SI PAULUS TU PARLAGUTAN ROM 4:25

i ma Jesus na dung dipasahat hara ni angka pangalaosionta, jana na nipangolu salaho tu hatigoranta.

MASMUR 86:5

Angke na burju do Ho ale Tuhan, jana sai mangampuni do Ho sanga ise na martangiang tu Ho sai dihaholongi Ho do.

MASMUR 41:13

Puji ma Tuhan, Debata ni Israel! Puji ma Ia saonnari bope sapanjangna! Sai tulus ma songon i. Amen!

1 JUJUR TAON 29:20

Dung ditangianghon ia songon i didok si Daud ma tu halak na bahat na marlagut disi, ning ia ma, “Puji hamu ma Tuhan Debatamunu i!” Jadi dipuji halahi ma Tuhan, Debata na nisomba ni angka ompu ni halahi i. Manungkap ma halahi pasangapkon Tuhan dohot raja i.

1 RAJA-RAJA 8:15

Didokkon si Salomo ma, “Nahinan madung marjanji Ho Tuhan tu damang si Daud songon on, ‘Sian dung Huoban bangsongKu ruar sian Mesir, di sude luat ni Israel, nada adong sada pe kota na Hupili na gabe inganan na angkon disi pajongjongon bagas parsombaan tu Au. Tapi ho ale Daud, madung Hupili ho laho mamarenta bangsongKu.’ Pinuji ma Tuhan Debata ni Israel na dung patulus janjiNa i!”

1 JOHANNES 4:7

Hamu angka dongan na nihaholongan! Marsihaholongan ma hita sama hita, angke sian Debata do ro holong ni roha i. Sanga ise na marholong ni roha, i do dakdanak ni Debata jana na mananda Debata.

1 TESSALONIKA 4:13

Hamu angka dongan, giotnami sugari diboto hamu ma nian pangalaho na satutuna taringot tu angka na dung monding; anso ulang marsak hamu songon halak na so mararop ni roha.

GALATIA 6:16

Di angka na mangolu songon pandiriankon, dohot di sude halak ni Debata, arop do rohangku lehenon ni Debata hasonangan dohot ibo ni rohaNia.

2 TESSALONIKA 2:16

Sai diapoi jana dipatogu Tuhanta Jesus Kristus sandiri bope Debata Amanta i ma rohamunu, anso tarpatulus jana tarjamitahon hamu sanga aha na denggan. Angke dihaholongi Debata Amanta i do hita, jadi hara ni denggan ni rohaNia, diapoi Ia do rohanta dohot apo-apo na manongtong jana dilehen Ia do tu hita arop ni roha na denggan.

1 PETRUS 1:13

Hara ni i hobas ma hamu. Jonggor ma hamu jana mararop ni roha situtu di pasupasu na giot lehenonNa tu hamu di haroro ni Jesus Kristus muse.

1 PETRUS 1:21

Markite-hite Ia do porsaya hamu tu Debata na pangoluhon Ia mangulahi sian hamatean dohot na pasangapkon Ia. Jadi Debata do na nihaporsayaanmunu jana laing tu Debata muse ma hamu mararop ni roha.

1 PETRUS 3:5

Songon i do dalanna dibaen angka dadaboru na badia na mararop ni roha tu Debata, laho pajegeskon diri ni halahi, i ma mangoloi halaklahina.

1 PETRUS 3:15

Tapi di bagasan rohamunu, parbadia i hamu ma Kristus songon Tuhan! Jana angkon singkop do hamu tongtong laho mangalusi sanga ise na manyapai hamu taringot tu pos ni rohamunu di angka na niarop ni rohamunu sian Tuhan.

2 JUJUR TAON 31:8

Marnida sumbangan na bahat i, dipasangap Raja Hiskia dohot angka pagawenia ma Tuhan jana dipuji halahi ma rayat ni Israel i.