1 JOHANNES 2:5 - BIBEL JAMITA NA DENGGAN

⁵ Tapi sanga ise na burju mangoloi hata ni Debata, sanggam ma haholongannia Debata. I ma tandana paboa na dung marsada ngolunta dohot Debata.

1 JOHANNES 2:5 Referans Kwoze

JOHANNES 14:23

Ninna Jesus ma mangalusi, “Sanga ise na mangkaholongi Au, ihutkononna do angka pangajaranKu. Haholongan ni Damang ma Ia. Ro ma Damang dohot Au sandiri mandapotkon ia jana maringanan ma Hami rap dohot ia.

JOHANNES 14:21

Sanga ise na manjagit angka parentangKi jana na mangoloisa, i ma na mangkaholongi Au. Haholongan ni Damang ma sanga ise na mangkaholongi Au. Au pe laing haholonganKu ma halahi, jana patidahononKu ma tu halahi sanga ise Au.”

LUKAS 11:28

Tapi dialusi Jesus ma, “Sanga ise na umbege hata ni Debata jana na mandalankonsa, halahi do na martua situtu!”

1 JOHANNES 3:24

Barang ise na mangoloi angka na niparentahonNia, na maringanan do ia di bagasan Debata, jana Debata di bagasan ia. Jana taboto ma bahaso Debata maringanan di bagasan hita, i ma hara ni Tondi na dung dilehenNia tu hita.

MASMUR 119:2

Martua ma halak na mangihutkon parentaNia, jana na manggogo sian sandok rohana mananda Tuhan.

HALUMBAAN 14:12

Na porlu dison i ma hasobaran ni angka halak na badia, jana na mangihutkon parenta ni Debata dohot marhaporsayaan tu Jesus.

1 JOHANNES 5:2

On ma tandana na holong rohanta mida angka dakdanak ni Debata: Muda tahaholongi Debata jana burju hita mangoloi angka tonaNia.

JOHANNES 15:5

Au do bona ni anggur i, jana hamu ma angka rantingna. Sanga ise na tinggal di bagasan Au jana Au di bagasan ia, ramos ma ia marbatu; angke anggo so rap dohot Au, nada adong bagi aha tarbaen hamu.

JEHESKIEL 36:27

DuruskononKu ma tondingKi tu bagasan rohamunu jana sai jagoanKu ma hamu anso mardalan mangihutkon angka aturan na sian Au jana anso mangoloi di sude na Huparentahon.

1 JOHANNES 4:18

Nada adong biar ni roha di bagasan holong; holong na sanggam mangagohon sude biar; angke adong do uhuman di bagasan biar i. Jadi barang ise na mabiar; nada dope sanggam ia di bagasan holong.

MASMUR 119:146

Pio-pio do au tu Ho, sai palua ma au, giotku sai marsitiopan do tu paraturanMu.

2 KORINTUS 5:17

Sanga ise na dung marsada dohot Kristus, madung gabe na nitompa na imbaru. Madung salpu na honok i – madung gabe imbaru sasudena.

HALUMBAAN 12:17

Mur gilap ma naga i tu dadaboru i, gabe kehe ma ia mangaroro na asing pinompar ni dadaboru i, i ma sasude halak na marmomosi tona ni Debata dohot angka na maniop hasaksian ni Jesus Kristus.

1 JOHANNES 5:20

Taboto do na dung ro Anak Ni Debata tu portibi on. Madung dilehen Ia tu hita pangastuion, anso tatanda Debata na sintong i; jana na maringanan do hita di bagasan Na Sintong i, i ma di bagasan AnakNia Jesus Kristus. On do Debata na sintong, jana on do ngolu na manongtong.

1 KORINTUS 1:30

Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita.

SURAT NI SI PAULUS TU PARLAGUTAN ROM 8:1

Saonnari nada adong be siuhumon di halak na mangolu di bagasan Kristus Jesus.

JAKOBUS 2:22

Dison tarida ma, angkon nipatuduhon do haporsayaan i dohot pambaenan anso gabe sanggam.

2 KORINTUS 5:21

Nada mardosa Kristus i, hape gabe dosa do Ia dibaen Debata jana dipaporsankon do tuSia dosanta i, anso tajagit hatigoran ni Debata hara ni hasadaonta dohot Kristus i.

JOHANNES 6:56

Halak na mangankon pamatangKu jana na manginum mudarKu, ngolu ni halahi ma na sada tu Au jana ngolungKu pe sada tu halahi.

PARJAMITA 8:5

Halak na mangoloi parenta, sai na malua do i jana sonang. Halak na pistar diboto do sanga andigan jana bia mangoloi raja.

MASMUR 106:3

Martua ma sanga ise na mandalankon angka parentaNia, jana na sai tigor di angka tindakanna.

PODA 8:32

Tangihon ma au, ale na poso-poso! Ihutkon ma panogu-noguonku anso martua ho.

MASMUR 119:4

Dilehen Ho do, ale Tuhan, parentaMu tu hami, anso setia hami nian mandalankon i.

PODA 28:7

Doli-doli na mangoloi uhum, i ma halak na marroha. Tapi halak na mardongan dohot halak na mermur, amangna do na dipailasa.

MASMUR 105:45

anso oloan ni halahi angka uhumNia jana ihutkononna parentaNia. Puji ma Tuhan!

1 JOHANNES 4:17

Sanggam do holong ni roha i dipatupa di bagasan dirinta anso marpos ni roha hita di Ari Paruhuman i, harana tudos songon Ia, hita pe di portibi on do.

2 JOHANNES 1:6

Marholong ni roha, astuanna mangoloi tona ni Debata. Jana tona na dung dibege hamu sian mulana i, i ma anso marsihaholongan hamu sama hamu.