Zɛfinaya 3:2 - Krio Fɔs Oli Baybul

² I nɔ de yɛri nɔbɔdi, i nɔ de tek kɔrɛkshɔn. I nɔ abop pan PAPA GƆD, i nɔ de go nia PAPA GƆD.

Zɛfinaya 3:2 Referans Kwoze

Jɛrimaya 22:21

A bin tɔk to yu wɛn yu bin jɛntri, bɔt yu bin se, ‘A nɔ go lisin.’ Na so yu tan frɔm we yu yɔŋ, yu nɔ du wetin a se.

Jɛrimaya 5:3

E PAPA GƆD, nɔto di tru yu de luk fɔ? Yu dɔn bit dɛm, bɔt dɛn nɔ fil pen; yu dɔn kil sɔm pan dɛm bɔt dɛn nɔ gri tek kɔrɛkshɔn. Dɛn dɔn mek dɛn fes dɛn traŋa pas rɔk; dɛn nɔ gri fɔ chenj.

Jɛrimaya 32:33

Dɛn nɔ tɔn dɛn fes to mi, na dɛn bak dɛn tɔn to mi; ɛn ɔlwe a de tich dɛm a nɔ de taya, dɛn nɔ lisin fɔ mek dɛn lan.

Jɛrimaya 2:30

PAPA GƆD se, A dɔn pɔnish una pikin dɛm te, dɛn nɔ gri chenj; na unasɛf tek una an kil una prɔfɛt dɛn lɛk layɔn we aŋri bad bad wan.

Ayzaya 43:22

“Pan ɔl dat, una nɔ bin pre to mi, yu Jekɔb; bɔt una dɔn taya wit mi, yu Izrɛl!

Ayzaya 29:13

Ɛn PAPA GƆD se: “Bikɔs dɛn pipul ya kam nia mi wit dɛn mɔt ɛn ɔna mi wit dɛn lip, we dɛn at nɔ de to mi, ɛn di fred we dɛn de fred mi, na mɔtalman lɔ we dɛn kram;

Prɔvabs 5:12

na da tɛm de yu go se if a bin no. Yu aks yusɛf se, “Wetin mek a nɔ de lan lɛsin? Wetin mek a nɔ bin de yɛri wɔd?

Di Sam Dɛm 78:22

fɔ we dɛn nɔ biliv am ɛn abop se i go sev dɛn.

Di Sam Dɛm 73:28

Bɔt fɔ mi yon say, i fayn fɔ de nia PAPA GƆD. A dɔn de nia PAPA GƆD we na mi PAPA GƆD, fɔ de kɔba mi; A go tɛl ɔlman wetin PAPA GƆD dɔn du.

Di Sam Dɛm 50:17

Una et di tin dɛn we a de tɛl una fɔ du ɛn una nɔ tek mi wɔd mek natin.

Di Sam Dɛm 10:4

I fil se i gɛt ɔltin, i nɔ nid PAPA GƆD; i de biev lɛkɛ se PAPA GƆD nɔ de, as i nɔ gɛt natin fɔ du wit PAPA GƆD.

Nɛimaya 9:26

“Bɔt dɛn nɔ bin de du wetin yu want ɛn dɛn tɔn rebɛl pan yu; dɛn nɔ bin bisin bɔt wetin yu lɔ se. Dɛn kil yu prɔfɛt dɛn we bin de tɛl dɛn wetin yu want, we bin de advays dɛn fɔ mek dɛn tek yu siriɔs. Dɛn tɔk bɔku bad bad tin dɛn bɔt yu.

Di Ibru Pipul Dɛn 10:22

So, lɛ wi biliv pan Jizɔs Krays gud wan; lɛ wi kam klos Gɔd wit ɔl wi at, bikɔs Jizɔs in blɔd dɔn klin wi at; ɛn wi na pipul we dɔn was wi bɔdi na di klin wata.

Izikɛl 24:13

Di rɔsti na yu dɔti dɔti rudnɛs. Bikɔs a bin fɔ dɔn klin yu, ɛn bikɔs yu nɔ bin klin kɔmɔt pan yu dɔti we yu dɔti, yu nɔ go ɛva klin igen te a dɔn satisfay mi vɛksteshɔn pan yu.

Jɛrimaya 35:17

Fɔseka dat na dis PAPA GƆD Ɔlmayti we na Izrɛl dɛn Gɔd se: Biliv mi, a de briŋ ɔl di bad bad tin dɛm pan Juda ɛn Jerusɛlɛm, we a bin dɔn tɔk se go bi to dɛm; bikɔs a tɔk to dɛm bɔt dɛn nɔ lisin, a dɔn kɔl dɛm bɔt dɛn nɔ ansa.

Jɛrimaya 35:13

Na dis PAPA GƆD Ɔlmayti we na Izrɛl dɛn Gɔd se: Go tɛl di man dɛm na Juda ɛn di wan dɛn we tap insay Jerusɛlɛm se, PAPA GƆD se; Una nɔ go lisin to wetin a de tɔk ɛn du wetin a se?

Ayzaya 31:1

Swɛ go fɔdɔm pan dɛn wan we de go na Ijipt fɔ mek dɛn ɛp dɛm ɛn abop pan ɔs, we abop pan chariɔt bikɔs dɛn plɛnti ɛn pan di man dɛm we de rayd ɔs bikɔs dɛn gɛt trɛnk bad, bɔt dɛn nɔ de luk to Izrɛl in Oli Wan ɔ fɛnɔt to PAPA GƆD!

Ayzaya 1:5

Wetindu una stil wan lɛ dɛn pɔnish una, we una fasin fɔ traŋayes? Di wanol ed sik ɛn di wanol at wik.

Prɔvabs 1:7

If yu want fɔ gɛt sɛns na layf, di fɔs tin we yu fɔ du na fɔ biliv PAPA GƆD ɛn fred am; fulman nɔ de tek advays ɛn kɔrɛkshɔn.

Sɛkɛn Lɛta To Timoti 3:16

Na Gɔd tɛl pipul ɔltin we rayt nain Buk, ɛn ɔl dɛn tin de gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt, ɛn fɔ tɛl dɛn aw fɔ liv di layf we Gɔd want dɛn fɔ liv,

Jɛrimaya 13:25

PAPA GƆD se na so i fɔ bi to una, dis na una pɔshɔn we a dɔn mɛnshɔ fɔ una, bikɔs yu dɔn fɔgɛt bɔt mi, ɛn de biliv pan lay lay.

Izikɛl 22:24

yu na land we nɔ klin, ɔ we ren nɔ bin fɔdɔm pan vɛksteshɔn de.

Ayzaya 9:12

Di Sirian dɛn na di ist ɛn di Filistin dɛn na di wɛst dɔn opin mɔt fɔ swɛla Izrɛl. Pan ɔl dat, in at stil nɔ kol ɛn i stil wan pɔnish dɛn.

Zɛfinaya 1:6

I se in go nyamanyama ɔl dɛn wan we dɔn lɛf fɔ fala in, PAPA GƆD, ɛn nɔ de bɔda fɛnɔt bɔt wetin i want igen