Taytɔs 3:7 - Krio Fɔs Oli Baybul

⁷ so dat di gud we Jizɔs du fɔ wi, go mek ɔltin rayt bitwin wi ɛn Gɔd ɛn wi go gɛt da layf we go de sote go we wi de abop fɔ gɛt.

Taytɔs 3:7 Referans Kwoze

Lɛta Fɔ Rom 8:17

We wi na Gɔd in pikin dɛn, wi go gɛt dɛn blɛsin we Gɔd dɔn prɔmis in pipul dɛn, semwe so, wi gɛt pan wetin Gɔd bin kip fɔ Krays. If wi sɔfa lɛkɛ aw Krays sɔfa, Gɔd go mek di wɔndaful layf we Krays gɛt bi wi yon.

Lɛta Fɔ Rom 3:24

Bɔt di lɛk we Gɔd lɛk wi we wi nɔ fit fɔ gɛt dɔn mek ɔltin rayt bitwin Gɔd ɛn mɔtalman, we Jizɔs Krays dɔn bay ɔlman wit in blɔd fɔ mek dɛn fri.

Taytɔs 2:11

Gɔd dɔn sho wi aw i gud we i want sev ɔlman.

1 Kɔrint 6:11

Sɔm pan una bin tan lɛkɛ dɛn pipul ya we a jɛs tɔk bɔt so. Bɔt Masta Jizɔs Krays dɔn pul una sin kɔmɔt pan una; Jizɔs Krays dɔn gi una to Gɔd; Masta Jizɔs Krays ɛn Gɔd in Spirit dɔn mek ɔltin rayt bitwin una ɛn Gɔd.

Taytɔs 1:2

we go mek dɛn abop fɔ gɛt layf we go de sote go. Gɔd, we nɔ de lay, bin dɔn prɔmis fɔ gi wi da layf de bifo i mek di wɔl,

Jems 2:5

Mi kɔmpin Kristiɛn dɛn we a lɛk, a want mek una yɛri mi! Dɛn pipul we nɔ gɛt natin na dis wɔl, Gɔd dɔn pik dɛn fɔ biliv wi Masta Jizɔs Krays ɛn fɔ mek dɛn go na ɛvin we i de rul; dɛn jɛntri na Gɔd in yay. Na dat Gɔd dɔn prɔmis fɔ du fɔ ɔl dɛn wan we lɛk am.

Lɛta Fɔ Galeshya 2:16

Wi no se nɔto bikɔs pɔsin de du wetin di Ju Lɔ se go mek ɔltin rayt bitwin in ɛn Gɔd, bɔt na we i biliv pan Jizɔs Krays. Semwe so, we wisɛf biliv pan Jizɔs Krays, Gɔd go mek ɔltin rayt bitwin wi ɛn in. Nɔto bikɔs wi de du wetin di Ju Lɔ se, go mek ɔltin rayt bitwin wi ɛn Gɔd. Gɔd nɔ go mek ɔltin rayt bitwin ɛnibɔdi ɛn insɛf bikɔs di pɔsin de du wetin di Ju Lɔ se nɔmɔ.

Lɛta Fɔ Rom 11:6

Gɔd pik dɛn pipul de bikɔs i sɔri fɔ dɛn, nɔto fɔseka ɛnitin we dɛn du. If na wetin mɔtalman de du bin de mek Gɔd pik dɛn, dat nɔto tru sɔri Gɔd bin fɔ de sɔri fɔ dɛn.

Lɛta Fɔ Galeshya 3:29

If una ɔl na Krays yon pipul, dat min se una na Ebraam in grampikin pikin dɛm, ɛn una go gɛt wetin Gɔd dɔn prɔmis fɔ gi Ebraam in grampikin pikin dɛm.

Lɛta Fɔ Rom 4:16

So na di biliv we Ebraam bin biliv Gɔd mek Gɔd gi am di tin we i bin dɔn prɔmis se in go gi am. Dat na fɔ sho wi se di tin we Gɔd prɔmis fɔ gi ɔl Ebraam in grampikin pikin dɛm na fri, ɛn nɔto fɔ dɛn wan nɔmɔ we de du wetin di Lɔ se, bɔt na fɔ dɛn wan sɛf we biliv Gɔd lɛkɛ aw Ebraam bin biliv am. Ebraam na di papa wɛn i kam pan Gɔd biznɛs fɔ wi ɔl we de na wɔl.

Lɛta Fɔ Rom 3:28

Na dat mek wi de se: Na we mɔtalman biliv pan Jizɔs Krays nɔmɔ de mek Gɔd mek ɔltin rayt bitwin in ɛn mɔtalman, nɔto bikɔs i de du wetin di Lɔ se.

Pita In Fɔs Lɛta 3:7

Semwe so, una dɛn maredman fɔ no se una wɛf nɔ gɛt trɛnk lɛkɛ man, so una fɔ de wit dɛn wit da ɔndastandin de, we rayt. Una fɔ rɛspɛkt dɛn bikɔs Gɔd go gi una ɛn dɛnsɛf layf we go de sote go. Una fɔ du ɔl dɛn tin ya, so dat natin nɔ go ambɔg di pre we una de pre.

Di Ibru Pipul Dɛn 11:9

Na bikɔs Ebraam bin biliv Gɔd mek i bin go na di ples we Gɔd prɔmis fɔ gi am, i bin tap na bafa lɛkɛ trenja. Na bafa Ebraam, Ayzak ɛn Jekɔb bin tap, bikɔs na to dɛn Gɔd bin mek di prɔmis.

Di Ibru Pipul Dɛn 11:7

Na bikɔs Noa bin biliv Gɔd mek i lisin di tɛm we Gɔd wɔn am bɔt dɛn tin we go bi. Pan ɔl we i nɔ bin si di tin dɛn yet, Noa du wetin Gɔd tɛl am fɔ du. I mek wan big bot we in, in wɛf ɛn in pikin dɛn go insay, so di wata we bin kɔba di wɔl nɔ bin du dɛn natin. So di biliv we Noa biliv Gɔd dɔn pruv se di pipul dɛn na di wɔl bin de du bad we dɛn nɔ bin biliv Gɔd. Gɔd tek Noa fɔ bi tret pɔsin bikɔs Noa bin biliv am.

Di Ibru Pipul Dɛn 6:17

Gɔd bin want sho dɛn pipul we i go gi wetin i bin dɔn prɔmis, klia wan se, in nɔ go chenj in maynd. Na dat mek i bin tek in nem tek oth se, in go du wetin i bin dɔn prɔmis se in go du.

Lɛta Fɔ Galeshya 4:7

So yu nɔto slev igen, yu na Gɔd pikin, ɛn bikɔs yu na Gɔd pikin, i dɔn gi yu ɔl wetin i bin dɔn prɔmis fɔ gi in pikin dɛn.

Lɛta Fɔ Rom 4:4

Pɔsin we de wok de gɛt pe fɔ di wok we i de du, ɛn nɔbɔdi nɔ go se dɛn de pe am ɛn i nɔ de wok, bikɔs dɛn no se i de wok fɔ in pe.

Taytɔs 2:13

naw we wi de wet fɔ da tɛm we wi abop se Jizɔs Krays, we na wi wɔndaful Gɔd ɛn Seviɔ go kam wit ɔl in wɔndaful pawa.

Matyu 25:34

Dɔn di Kiŋ go tɛl dɛn pipul we tret na Gɔd in yay se, ‘Una kam, una we mi Papa dɔn blɛs! Una kam, tek di ples we una fɔ gɛt ɔnda Gɔd in rul, i bin dɔn rɛdi da ples de fɔ una frɔm we i mek di wɔl.

Mak 10:17

As Jizɔs de go, wan man rɔn go mit am ɛn nil dɔŋ bifo am ɛn se, “Ticha, yu we gud, wetin a fɔ du fɔ mek a gɛt layf we go de sote go?”

Sɛkɛn Lɛta Fɔ Tɛsalonayka 2:16

Wi de pre mek wi Masta Jizɔs Krays insɛf, ɛn Gɔd we na wi Papa, we lɛk wi ɛn mek wi gɛt kɔrej ɔltɛm bikɔs i gud ɛn mek wi ebul bia wet fɔ wetin gud,

Di Ibru Pipul Dɛn 1:14

Udat na di enjɛl dɛn? Dɛn na spirit ɛn dɛn na Gɔd in mɛsenja dɛn; na dɛn Gɔd de sɛn fɔ ɛp dɛn pipul we Gɔd go sev.