Taytɔs 3:5 - Krio Fɔs Oli Baybul

⁵ i sev wi; ɛn nɔto fɔseka ɛni gud tin we wi bin dɔn du mek i du so, bɔt na bikɔs i sɔri fɔ wi, na dat mek i mek in Spirit klin wi layf ɛn gi wi nyu spirit ɛn nyu layf.

Taytɔs 3:5 Referans Kwoze

Sɛkɛn Lɛta To Timoti 1:9

Gɔd nɔ sev wi ɛn kɔl wi fɔ bi in yon pipul fɔseka ɛnitin we wi dɔn du, bɔt na fɔseka wetin in bin dɔn mekɔp fɔ du bifo di wɔl bigin ɛn bikɔs i gud. Na tru Jizɔs Krays i mek wi no di gud we i du.

1 Kɔrint 6:11

Sɔm pan una bin tan lɛkɛ dɛn pipul ya we a jɛs tɔk bɔt so. Bɔt Masta Jizɔs Krays dɔn pul una sin kɔmɔt pan una; Jizɔs Krays dɔn gi una to Gɔd; Masta Jizɔs Krays ɛn Gɔd in Spirit dɔn mek ɔltin rayt bitwin una ɛn Gɔd.

Pita In Fɔs Lɛta 3:21

Di wata na fɔ sho wi aw Gɔd go mek sin nɔ gɛt pawa oba dɛn Kristiɛn we baptayz, lɛkɛ aw una dɔn baptayz ɛn dat dɔn mek sin nɔ gɛt pawa oba una igen. Fɔ baptayz, nɔto fɔ pul dɔti kɔmɔt na di bɔdi, bɔt na di prɔmis we wi prɔmis Gɔd se wi go waka tret wit am so dat wi go no se wi nɔ gilti. Na we Jizɔs Krays rayz frɔm di grev mek di baptayz we una baptayz sev una.

Pita In Fɔs Lɛta 1:3

Lɛ wi tɛl Gɔd, we na Masta Jizɔs Krays in Papa, tɛnki! Bikɔs Gɔd sɔri fɔ wi, i mek Jizɔs Krays rayz frɔm di grev fɔ gi wi nyu layf, na dat mek wi abop fɔ gɛt layf we go de sote go,

Lɛta Fɔ Rom 12:2

Una nɔ fɔ de du lɛkɛ aw di pipul dɛn na dis wɔl de du, bɔt una fɔ lɛ Gɔd chenj una at so dat ɔl wetin una de tink ɛn du go chenj. Dat go mek una ebul no wetin Gɔd want; dat na: wetin gud, wetin Gɔd lɛk, ɛn wetin nɔbɔdi nɔ go ebul fɛn fɔlt pan.

Lɛta Fɔ Ɛfisɔs 2:4

Bɔt Gɔd sɔri fɔ wi ɛn bikɔs i lɛk wi bad wan, i gi wi layf wit Krays, pan ɔl we in Spirit bin dɔn lɛf wi we wi nɔ bin gri fɔ du wetin i tɛl wi fɔ du. Na di lɛk we Gɔd lɛk wi we wi nɔ fit fɔ gɛt dɔn sev wi.

Lɛta Fɔ Ɛfisɔs 5:26

fɔ mek di chɔch klin wit wata ɛn in wɔd, dɛn i an am oba gi Gɔd.

Di Sam Dɛm 51:10

PAPA GƆD gi mi at we klin fɔ du yu wok, nyu at we go de du wetin yu want.

Lɛta Fɔ Rom 11:6

Gɔd pik dɛn pipul de bikɔs i sɔri fɔ dɛn, nɔto fɔseka ɛnitin we dɛn du. If na wetin mɔtalman de du bin de mek Gɔd pik dɛn, dat nɔto tru sɔri Gɔd bin fɔ de sɔri fɔ dɛn.

Di Ibru Pipul Dɛn 4:16

Fɔseka dat, wi nɔ fɔ fred. Lɛ wi kam bifo Gɔd we go sho wi aw i lɛk wi, ɛn we go sɔri fɔ wi, ɛn ɛp wi di rayt tɛm.

Lɛta Fɔ Kɔlɔse 3:10

una dɔn bi nyu pipul. Gɔd mek una ɔl bi nyu pipul, ɛn we i bi so, i de mek una tan lɛkɛ insɛf mɔ ɛn mɔ, so dat wande una go no am gud.

Di Sam Dɛm 86:15

Bɔt yu PAPA GƆD, na PAPA GƆD we nays ɛn gɛt sɔri-at, yu nɔ gɛt wamat ɛn di beberebe lɔv we yu gɛt fɔ wi nɔ de chenj, dɔn bak, yu nɔ de kɔmɔt biɛn wi.

Lɛta Fɔ Galeshya 2:16

Wi no se nɔto bikɔs pɔsin de du wetin di Ju Lɔ se go mek ɔltin rayt bitwin in ɛn Gɔd, bɔt na we i biliv pan Jizɔs Krays. Semwe so, we wisɛf biliv pan Jizɔs Krays, Gɔd go mek ɔltin rayt bitwin wi ɛn in. Nɔto bikɔs wi de du wetin di Ju Lɔ se, go mek ɔltin rayt bitwin wi ɛn Gɔd. Gɔd nɔ go mek ɔltin rayt bitwin ɛnibɔdi ɛn insɛf bikɔs di pɔsin de du wetin di Ju Lɔ se nɔmɔ.

Lɛta Fɔ Rom 3:20

If pɔsin de du wetin rayt na di Lɔ dat nɔ min se Gɔd insɛf dɔn luk se i de waka tret lɛkɛ aw in want; di Lɔ de fɔ mek mɔtalman no se in dɔn sin.

Pita In Fɔs Lɛta 2:10

Tɛm bin de we una nɔto bin Gɔd yon pipul dɛn, bɔt una dɔn bi in pipul dɛn naw; tɛm bin de we una nɔ bin no aw Gɔd gud, bɔt naw una dɔn no aw i gud we i dɔn sɔri fɔ una.

Lɛta Fɔ Ɛfisɔs 4:23

Lɛ Gɔd in Spirit chenj una at ɛn wetin una de tink.

Lɛta Fɔ Rom 3:28

Na dat mek wi de se: Na we mɔtalman biliv pan Jizɔs Krays nɔmɔ de mek Gɔd mek ɔltin rayt bitwin in ɛn mɔtalman, nɔto bikɔs i de du wetin di Lɔ se.

Lɛta Fɔ Rom 9:11

Gɔd tɛl Ribɛka se, “Yu big pikin go wok fɔ di smɔl wan.” Gɔd tɔk dat fɔ sho se di pikin we i pik na di wan we insɛf want, bikɔs Gɔd bin dɔn tɔk dis wɔd ya bifo di pikin dɛn bɔn, ɛn bifo dɛn gɛt chans fɔ du gud ɔ bad. So di pikin we Gɔd pik na di wan we insɛf bin dɔn kɔl, nɔto fɔseka ɛnitin we in du ɔ we di ɔda wan du.

Lyuk 1:78

Gɔd dɔn sɔri fɔ wi; i go mek di ali mɔnin san kam pan wi.

Lyuk 1:54

I dɔn ɛp wi, di Izrɛl pipul dɛn, we de sav am, bikɔs i mɛmba se in bin dɔn prɔmis wi granpapa-papa dɛn,

Lyuk 1:50

frɔm tɛm, i de sɔri fɔ ɔl dɛn wan we rɛspɛkt am.

Mayka 7:18

Nɔn gɔd nɔ de we tan lɛk PAPA GƆD we kwik fɔ fɔgiv in pipul dɛn sin. I nɔ go jɛs vɛks pan di balans we lɛf afta dɛn ɛnimi dɔn aras dɛn bikɔs in lɔv nɔ de dɔn.

Di Sam Dɛm 143:2

Nɔ mek a tinap bifo yu lɛk a de kot a nɔ go win, bikɔs nɔn mɔtalman nɔ de we de du ɔl wetin yu se.

Di Sam Dɛm 130:7

Izrɛl pipul una put una abop pan PAPA GƆD! In na PAPA GƆD we nɔ de gens fɔ lɛk pɔsin ɛn i rɛdi fɔ sev ɔltɛm.

Job 25:4

Aw naw yu go se mɔtalman gud bifo PAPA GƆD? Aw yu go se mɔtalman we uman bɔn, klin na PAPA GƆD in yay?

Taytɔs 3:4

Bɔt we Gɔd, we de sev pipul, want sho wi aw i gud ɛn aw i lɛk wi,

Lɛta Fɔ Rom 9:30

So, wetin wi go se? Dɛn pipul we nɔto Ju, we nɔ bin de tray fɔ mek ɔltin rayt bitwin dɛn ɛn Gɔd, Gɔd dɔn mek ɔltin rayt bitwin in ɛn dɛn, bikɔs dɛn dɔn biliv am;

Lɛta Fɔ Rom 9:16

So nɔto wetin mɔtalman want ɔ wetin i de du go mek Gɔd pik am, bɔt na we Gɔd sɔri fɔ am nɔmɔ.

Lɛta Fɔ Rom 4:5

Bɔt pɔsin we biliv Gɔd, we nɔ abop pan di gud we in de du, ɛn we biliv se na Gɔd de mek ɔltin rayt bitwin in ɛn ɔl dɛn bad pipul we biliv pan am, na dis tin ya we di pɔsin biliv go mek Gɔd mek ɔltin rayt bitwin in ɛn insɛf.

Lyuk 1:72

So Gɔd stil de sɔri fɔ wi lɛkɛ aw i tɛl wi granpapa-papa dɛn se in go du ɛn i stil mɛmba di agrimɛnt we insɛf sɛf mek wit dɛn,

Ayzaya 57:12

A go tɔk bɔt di waka we yu de waka tret na mi yay ɛn di tin dɛn we yu de du, bɔt dɛn nɔ go ɛp yu.

Di Ibru Pipul Dɛn 6:6

If pipul dɔn no ɔl dat, dɔn dɛn stil tɔn dɛn bak pan Gɔd, natin nɔ go briŋ dɛn kam bak to Gɔd ɛn mek dɛn lɛf dɛn bad tin we dɛn de du, igen, bikɔs dɛn de nel Gɔd in Pikin na di krɔs wan tɛm mɔ ɛn laf am bifo ɔlman.

Di Sam Dɛm 86:5

Yu na gud PAPA GƆD ɛn yu de fɔgiv yu de sho yu lɔv we nɔ de chenj to ɔl udat lɛk fɔ pre to yu.

Di Sam Dɛm 62:12

In lɔv fɔ wi nɔ go ɛva chenj. PAPA GƆD yu go mɔs gi ɔlman di pe we i fɔ gɛt.

Job 15:14

Udat na mɔtalman we yu go se klin na PAPA GƆD yay, ɔ udat we uman bɔn kam na dis wɔl, we yu go se nɔ de du bad?

Job 9:20

Pan ɔl we a nɔ du natin, mi bɔku tɔk go mek a lɔs mi kes; pan ɔl we a nɔ du natin, i go tek wetin a tɔk fɔ fɛn fɔlt pan mi.

Ditarɔnɔmi 9:5

I se nɔto bikɔs di Izrɛlayt na gud pipul dɛn ɔ dɛn de du ɔl gud tin de mek PAPA GƆD gi dɛn di land. I se PAPA GƆD de drɛb dɛn pipul dɛn de bikɔs dɛn na bad bad pipul dɛn ɛn i wan kip di prɔmis we i bin dɔn mek to Ebraam, Ayzak ɛn Jekɔb, di Izrɛlayt dɛn fɔstɛm-papa dɛn.

Izikɛl 36:25

A go sprinkul klin wata pan una, ɛn una go klin pan ɔl una dɔti dɛm, ɛn a go was una klin pan ɔl una lay lay gɔd dɛm.

Matyu 3:11

A de baptayz una wit wata fɔ sho se una dɔn lɛf fɔ du bad, bɔt di wan we de kam afta a dɔn du mi wok, in go baptayz una wit Gɔd in Spirit ɛn wit faya. I gɛt pawa pas mi, ɛn a nɔ fit sɛf fɔ lus in sus.

Lɛta Fɔ Rom 11:14

Sɔntɛm, we a de du dat, a go mek mi yon Ju kɔntri man dɛn jɛlɔs una, so da we de a kin mek Gɔd sev sɔm pan dɛn.

Di Ibru Pipul Dɛn 10:22

So, lɛ wi biliv pan Jizɔs Krays gud wan; lɛ wi kam klos Gɔd wit ɔl wi at, bikɔs Jizɔs in blɔd dɔn klin wi at; ɛn wi na pipul we dɔn was wi bɔdi na di klin wata.