Lɛta Fɔ Rom 3:5 - Krio Fɔs Oli Baybul

⁵ Na rayt tin sɔm pipul de tɔk we dɛn de agyu se di bad we wi de du de sho se Gɔd de du rayt? Wetin wi go se bɔt dat? Na bad Gɔd de du we i de pɔnish wi fɔ di bad we wi de du? (A de tɔk na ya lɛkɛ aw mɔtalman kin tɔk.)

Lɛta Fɔ Rom 3:5 Referans Kwoze

Lɛta Fɔ Rom 6:19

Na dɛn tin we mɔtalman ɔndastand, a de tek fɔ ɛksplen to una fɔ mek una go ɔndastand. Tɛm bin de we una na bin slev fɔ du ɔl kayn wikɛd ɛn dɔti tin we bin de na una at. Bɔt naw una fɔ givɔp ɔl una layf fɔ bi lɛkɛ Gɔd in slev dɛn fɔ du wetin rayt, so dat una go bi Gɔd in pipul dɛn, fɔ tru.

Lɛta Fɔ Galeshya 3:15

Mi kɔmpin Kristiɛn dɛn, a de tɔk bɔt tin we wi ɔl no: if tu pipul gri fɔ sɔntin ɛn sayn pepa, nɔbɔdi nɔ go pwɛl ɔ chenj wetin di tu pipul dɛn bin gri fɔ du.

1 Kɔrint 9:8

Nɔto dɛn tin ya nɔmɔ we wi de si ɛvri de, de fɔ sho wi aw wi fɔ de du, so a nɔ go jɛs tɔk bɔt dɛn nɔmɔ, bikɔs di Lɔ we Gɔd gi Mozis de tɔk bɔt di sem tin.

Lɛta Fɔ Rom 7:7

Wetin wi fɔ se? Di Lɔ bad? Di Lɔ nɔ bad atɔl! Na di Lɔ bin mek a no wetin na sin. A nɔ bin fɔ no wetin na tifyay if di Lɔ nɔ bin se, “Yu nɔ fɔ gɛt tifyay.”

Lɛta Fɔ Rom 4:1

Wetin wi go se bɔt Ebraam we na wi Ju pipul dɛn grampapa papa? Wetin bi to am?

Lɛta Fɔ Rom 2:5

Bɔt una traŋayes ɛn una at traŋa, na dat mek Gɔd go pɔnish una mɔ di de we i go sho aw i vɛks pan mɔtalman ɛn we i go jɔj dɛn lɛkɛ aw i fɔ jɔj dɛn.

Neum 1:2

PAPA GƆD want wi fɔ lɛk In nɔmɔ bikɔs i jɛlɔs bad; we i vɛks I kin pɔnish in ɛnimi dɛn. We i vɛks fɔ tru, i de dil wit ɔl udat ambɔg am.

Rɛvɛleshɔn 18:20

Mek ɔl dɛn wan we de na ɛvin gladi, mek ɔl Gɔd in pipul dɛn, in apɔsul dɛn, ɛn dɛn wan we de tɔk in mɛsej gladi bikɔs Gɔd dɔn pɔnish am fɔ di bad we i bin de du dɛn.

Rɛvɛleshɔn 15:3

Dɛn bin de siŋ di siŋ we Mozis, we de wok fɔ Gɔd, bin siŋ lɔntɛm. Da siŋ de na di Ship in siŋ; di siŋ se, “Masta, Gɔd we gɛt pawa pas ɔl, yu wok dɛn big ɛn dɛn wɔndaful! Na yu na di kiŋ we de rul oba ɔl dɛn neshɔn, yu de du wetin rayt, yu de tɔk wetin tru ɔltɛm!

1 Kɔrint 15:32

If na Ɛfisɔs ya a dɔn fɛt wit dɛn pipul we tan lɛkɛ wayl bif na bush fɔ satisfay misɛf nɔmɔ, wetin a go gen? If Gɔd nɔ de mek dɛn wan we dɔn day rayz frɔm dɛn grev, “Mek wi it ɛn drink ɛn ɛnjɔy wisɛf naw, bikɔs wi go day jisnɔ,” lɛkɛ aw dɛn kin se.

Lɛta Fɔ Rom 12:19

Mi padi dɛn, una nɔ fɔ tɔn bad gi ɛnibɔdi we du una bad, bɔt una fɔ lɛ Gɔd kɔndɛm di pɔsin. Dɛn rayt na Gɔd in Buk se, “Di Masta se, a go mek dɛn pipul we de du ɔda pipul bad, sɔfa fɔ di bad we dɛn de du.”

Lɛta Fɔ Rom 6:1

So wetin wi go se? Wi fɔ jɛs de sin de go so dat Gɔd go sɔri fɔ wi ɛn sho wi se in lɛk wi mɔ ɛn mɔ pan ɔl we wi nɔ fit fɔ mek i lɛk wi?

Lɛta Fɔ Rom 3:19

Wi dɔn no naw se ɔltin we de na di Ju Lɔ na fɔ dɛn pipul we fil se dɛn mɔs kip am. Di Lɔ de so dat nɔbɔdi nɔ go se in nɔ no wetin rayt fɔ du, ɛn, pantap dat i go mek Gɔd jɔj ɔlman na wɔl.

Lɛta Fɔ Rom 3:7

If una fil se na lay a de lay, ɛn da lay de go sho klia wan se Gɔd de tɔk tru ɛn mek pipul rɛspɛkt am, wetindu Gɔd fɔ stil se mi na sina?

Jɛnɛsis 18:25

A no se yu nɔ go du dat. Yu nɔ tan so! Yu nɔ go mek udat du rɔŋ ɛn udat du rayt gɛt di sem pɔnishmɛnt. Yu we na jɔj fɔ di wanol wɔl go jɔj tret wan.”

Job 8:3

PAPA GƆD nɔ miks pan bɛnbɛn ɛn in we na PAPA GƆD Ɔlmayti, nɔ de rɔb Pita fɔ pe Pɔl.

Lɛta Fɔ Rom 5:8

Bɔt Gɔd dɔn sho wi aw i lɛk wi bikɔs pan ɔl we sin bin plɛnti na wi layf, Krays day fɔ wi.

Lɛta Fɔ Rom 8:31

Wɛn wi luk ɔl dɛn tin ya, wetin wi go se? If Gɔd de fɔ wi, nɔbɔdi nɔ go ebul wi.

Lɛta Fɔ Rom 9:30

So, wetin wi go se? Dɛn pipul we nɔto Ju, we nɔ bin de tray fɔ mek ɔltin rayt bitwin dɛn ɛn Gɔd, Gɔd dɔn mek ɔltin rayt bitwin in ɛn dɛn, bikɔs dɛn dɔn biliv am;

2 Kɔrint 6:4

Bɔt bay aw wi de du ɔltin, wi de sho se na Gɔd wok wi de du. Wi de bia: wɛn wi de sɔfa, wɛn wi nɔ gɛt ɔltin we wi fɔ gɛt, wɛn wi de pan ɛni kayn waala,

2 Kɔrint 7:11

Luk wetin Gɔd du fɔ una we a mek una fil sɔri: i mek una siriɔs pan wetin una de du ɛn una want pruv fɔ tru se una nɔ gilti! Una bin vɛks bad fɔ di tin we una bin du; una bin fred bikɔs na bad tin una bin du, una bin fil bad; una bin want si mi bad bad; una bin rɛdi ɛnitɛm fɔ pɔnish di pɔsin we du bad! Una du ɔl wetin una ebul fɔ mek ɔltin tret. Ɔl dat dɔn sho mi se a nɔ gɛt ɛnitin fɔ blem una fɔ insay ɔl dis.

Lɛta Fɔ Galeshya 2:18

If a bigin du ɔl wetin a bin dɔn se a nɔ go du, dat min se a dɔn brok di Lɔ ɛn a de sin fɔ tru.