Lɛta Fɔ Rom 3:11 - Krio Fɔs Oli Baybul

¹¹ nɔbɔdi nɔ de we ɔndastand wetin Gɔd want am fɔ du, ɛn nɔbɔdi nɔ de we want tray fɔ kam klos Gɔd fɔ no wetin i want.

Lɛta Fɔ Rom 3:11 Referans Kwoze

Di Sam Dɛm 53:2

PAPA GƆD de na ɛvin de wach mɔtalman fɔ si if ɛniwande we de ɔndastand, we de tray fɔ no bɔt PAPA GƆD.

Taytɔs 3:3

Tɛm bin de we wisɛf bin de pan fulish layf, wi nɔ bin de lisin to Gɔd, wi nɔ bin de lisin to mɔtalman, ɛn wi nɔ bin de du wetin rayt. Wi nɔ bin ebul kɔntrol wisɛf, ɛn na wetin wi at tɛl wi nɔmɔ wi bin de fala; wi bin de pan ɔl kayn ɛnjɔymɛnt, na bad nɔmɔ wi bin de mɛmba fɔ pipul, wi bin de jɛlɔs pipul, pipul nɔ bin lɛk wi ɛn wisɛf nɔ bin lɛk dɛn.

Ozie 4:6

Na bikɔs di pipul nɔ no in we na dat mek PAPA GƆD mek dɛn de sɔfa so. I se dɛn dɔn tɔn dɛn bak pan am so insɛf dɔn lɛf di man dɛn we de mek sakrifays fɔ pipul sin to dɛnsɛf. Ɛn bikɔs dɛn nɔ bisin bɔt PAPA GƆD in lɔ dɛn, insɛf nɔ bisin bɔt dɛn.

Lɛta Fɔ Rom 8:7

So, if mɔtalman jɛs de mɛmba wetin in at want nɔmɔ, dat go mek i nɔ lɛk Gɔd; i nɔ go de du wetin Gɔd in lɔ se, ɛn i nɔ go ebul du am sɛf.

Jɛrimaya 4:22

“Bikɔs mi pipul dɛn fulish, dɛn nɔ no mi; dɛn na styupid pikin dɛm, dɛn nɔ de ɔndastand natin. Dɛn gɛt skil fɔ du ivul tin dɛm, bɔt dɛn nɔ no aw fɔ du gud.”

Ayzaya 65:1

A bin rɛdi fɔ lɛ dɛn wan dɛn we nɔ aks fɔ mi, fɛn fɛn mi; A bin dɔn rɛdi fɔ lɛ dɛn wan dɛn we nɔ luk fɔ mi, fɛn mi. A bin se, “Luk mi na ya, luk mi na ya,” to di neshɔn we nɔ de pre to mi.

Ayzaya 55:6

PAPA GƆD se “Luk fɔ PAPA GƆD di tɛm we mɔtalman kin ebul fɛn am, pre to am we i de nia;

Ayzaya 31:1

Swɛ go fɔdɔm pan dɛn wan we de go na Ijipt fɔ mek dɛn ɛp dɛm ɛn abop pan ɔs, we abop pan chariɔt bikɔs dɛn plɛnti ɛn pan di man dɛm we de rayd ɔs bikɔs dɛn gɛt trɛnk bad, bɔt dɛn nɔ de luk to Izrɛl in Oli Wan ɔ fɛnɔt to PAPA GƆD!

Jɔn In Fɔs Lɛta 5:20

Wi no se Gɔd in Pikin dɔn kam ɛn i dɔn gi wi di pawa fɔ no di tru Gɔd. Wi layf de wit di tru Gɔd ɛn wi layf de wit Gɔd in Pikin, Jizɔs Krays. Jizɔs Krays na di tru Gɔd ɛn di tru layf we go de sote go.

Lɛta Fɔ Rom 1:28

Bikɔs mɔtalman nɔ gri fɔ put dɛn at pan di tru tin we dɛn no bɔt Gɔd, Gɔd dɔn lɛf dɛn fɔ du di bad tin we de na dɛn at, so naw dɛn jɛs de du dɛn tin we dɛn nɔ fɔ du.

Lɛta Fɔ Rom 1:22

Dɛn se dɛn gɛt sɛns, bɔt dɛn ful.

Matyu 13:19

Dɛn pipul we yɛri, bɔt dɛn nɔ ɔndastand wetin a tɛl dɛn bɔt Gɔd in rul, jɛs tan lɛkɛ dɛn sid we fɔdɔm na di rod. Setan kam pul di wɔd we bin de na dɛn at.

Ozie 7:10

Na di prawd we Izrɛl de mek lɛ ɔltin de kɔmɔt bad fɔ am; pan ɔl dat, dɛn nɔ tɔn bak go to PAPA GƆD we na dɛn Gɔd.

Ayzaya 27:11

Wɛn di branch dɛn dɔn dray, dɛn de brok dɛm; uman dɛn de kam tek dɛn mek faya. Bikɔs dɛn pipul ya nɔ de ɔndastand; na dat mek in we mek dɛm, nɔ go sɔri fɔ dɛm, In we mol dɛm, nɔ go sho dɛn ɛni fevɔ.

Ayzaya 9:13

Di pipul dɛn nɔ gri tɔn to di wan we de pɔnish dɛn ɛn dɛn nɔ luk fɔ PAPA GƆD Ɔlmayti.

Prɔvabs 1:22

“Fulish pipul! Aw lɔŋ una go de pan fulishnɛs? Aw lɔŋ una nɔ go de tek natin mek natin? Una nɔ de lan sɛns?

Prɔvabs 1:7

If yu want fɔ gɛt sɛns na layf, di fɔs tin we yu fɔ du na fɔ biliv PAPA GƆD ɛn fred am; fulman nɔ de tek advays ɛn kɔrɛkshɔn.

Di Sam Dɛm 94:8

Una bikiaful, una we de mek lɛk ɔdɔyɔ. Ustɛm una go gɛt sɛns?

Di Sam Dɛm 53:4

Dɛn pipul we de du bad nɔ go lan? Dɛn de pwɛl pipul lɛk we mɔtalman de cham bred ɛn dɛn nɔ bisin bɔt PAPA GƆD.

Lɛta Fɔ Rom 3:10

Lɛkɛ aw dɛn rayt na Gɔd in Buk se: “Nɔbɔdi nɔ de we de du ɔl wetin Gɔd want am fɔ du,

Lɛta Fɔ Rom 3:12

Ɔlman dɔn lɛf fɔ fala Gɔd, dɛn nɔn nɔ bɛtɛ na dis wɔl; nɔbɔdi nɔ de we de du gud, wangren pɔsin sɛf nɔ de.