Lɛta Fɔ Rom 12:2 - Krio Fɔs Oli Baybul

² Una nɔ fɔ de du lɛkɛ aw di pipul dɛn na dis wɔl de du, bɔt una fɔ lɛ Gɔd chenj una at so dat ɔl wetin una de tink ɛn du go chenj. Dat go mek una ebul no wetin Gɔd want; dat na: wetin gud, wetin Gɔd lɛk, ɛn wetin nɔbɔdi nɔ go ebul fɛn fɔlt pan.

Lɛta Fɔ Rom 12:2 Referans Kwoze

Pita In Fɔs Lɛta 1:14

Una fɔ du ɔl wetin Gɔd tɛl una fɔ du, una nɔ fɔ fala una at fɔ du dɛn bad tin we una bin lɛk fɔ du di tɛm we una nɔ bin no di Gud Nyuz bɔt Jizɔs Krays yet.

2 Kɔrint 5:17

Ɛnibɔdi we gɛt wanwɔd wit Krays, dɔn bi nyu pɔsin, di layf we i bin liv fɔstɛm dɔn dɔn, na nyu layf i liv naw.

Lɛta Fɔ Kɔlɔse 3:10

una dɔn bi nyu pipul. Gɔd mek una ɔl bi nyu pipul, ɛn we i bi so, i de mek una tan lɛkɛ insɛf mɔ ɛn mɔ, so dat wande una go no am gud.

Lɛta Fɔ Ɛfisɔs 5:17

Una nɔ gri mek ɛnibɔdi mek una ful, una tray fɔ no wetin di Masta want una fɔ du.

Izikɛl 36:26

A go gi una nyu at ɛn put nyu spirit insay una. Ɛn a go pul di ston at we de pan una bɔdi ɛn gi una at we mek wit flɛsh

Pita In Fɔs Lɛta 4:2

So, frɔm naw sote una day, nɔto una at una fɔ de fala, bɔt na wetin Gɔd want una fɔ du.

Lɛta Fɔ Rom 12:1

Mi kɔmpin Kristiɛn dɛn, bikɔs Gɔd de sɔri fɔ wi bad bad, a de beg una mek una gi una layf lɛkɛ sakrifays to Gɔd fɔ du in wok, ɛn fɔ du ɔl wetin i lɛk; na di tru we dat fɔ wɔship Gɔd.

Jɔn 15:19

If una bin gɛt wanwɔd wit di pipul dɛn na wɔl, da tɛm de dɛn bin fɔ lɛk una lɛkɛ aw dɛn lɛk dɛn yon pikin dɛn. Bɔt a dɔn pik una kɔmɔt pan dɛn, una ɛn dɛn nɔ de si wan we, na dat mek dɛn nɔ lɛk una.

Di Sam Dɛm 51:10

PAPA GƆD gi mi at we klin fɔ du yu wok, nyu at we go de du wetin yu want.

Lɛta Fɔ Rom 13:14

Mek Masta Jizɔs Krays bi lɛkɛ di klos we wi de wɛr, mek i rul ɔl wi layf, ɛn mek wi lɛf fɔ du dɛn bad tin we wi at gi wi fɔ du.

Taytɔs 3:5

i sev wi; ɛn nɔto fɔseka ɛni gud tin we wi bin dɔn du mek i du so, bɔt na bikɔs i sɔri fɔ wi, na dat mek i mek in Spirit klin wi layf ɛn gi wi nyu spirit ɛn nyu layf.

Jems 4:4

Una tan lɛkɛ uman we nɔ tret wit in man! Una nɔ no se wɛn una lɛk dɛn tin we de na wɔl, dat go mek una nɔ lɛk Gɔd? Ɛnibɔdi we want dɛn tin na wɔl dɔn bi pɔsin we nɔ lɛk Gɔd.

2 Kɔrint 4:4

Dɛn nɔ biliv wetin wi de tɔk bikɔs Setan dɔn blɛn dɛn yay. I mek dɛn nɔ ebul si di layt we de shayn pan dɛn; da layt de na di Gud Nyuz bɔt aw Krays, we na Gɔd in tru pikchɔ, wɔndaful.

Jɔn 17:14

A dɔn tɛl dɛn ɔl wetin yu tɛl mi fɔ tɛl dɛn, dat mek di ɔda pipul dɛn na wɔl nɔ lɛk dɛn, bikɔs dɛn ɔl nɔ de si wan we, lɛkɛ aw misɛf nɔ de si wan we wit di ɔda pipul dɛn.

Pita In Sɛkɛn Lɛta 1:4

Na dat mek Gɔd dɔn gi wi dɛn wɔndaful blɛsin we mɔni nɔ kin bay, we i bin dɔn prɔmis, so dat we una gɛt dɛn tin ya, una nɔ go de fala una at fɔ du dɛn bad tin we dɔn pwɛl di wɔl, bɔt una go du dɛn tin we Gɔd insɛf kin du.

Jems 1:27

Pɔsin we de fala Gɔd fɔ de ɛp dɛn pikin we nɔ gɛt mama ɛn papa ɛn dɛn uman we dɛn man dɔn day. I fɔ tek tɛm mek dɛn bad pipul na wɔl nɔ mek insɛf bigin du bad. Na so Gɔd we na di Papa want pɔsin we de fala am fɔ tan.

Izikɛl 18:31

Una pul an kɔmɔt pan ɔl dɛn bad bad tin dɛn we una dɔn du to mi, mek una go gɛt nyu at ɛn nyu spirit! Wetin fɔ mek una day, Una Izrɛl?

Di Sam Dɛm 34:8

Kam si fɔ yusɛf se PAPA GƆD na gud PAPA GƆD; I fayn fɔ di man, we de aks am fɔ kɔba am.

Jɔn In Fɔs Lɛta 3:13

So, mi brɔda dɛn, una nɔ wɔnda if di pipul dɛn na di wɔl nɔ lɛk una.

Fɔs Lɛta Fɔ Tɛsalonayka 4:3

Gɔd want mek una layf bi in yon, ɛn i nɔ want ɛnibɔdi fɔ tek in kɔmpin man ɔ wɛf.

Jɔn In Fɔs Lɛta 5:19

Wi no se wi na Gɔd yon pipul, pan ɔl we Setan de rul di ol wɔl.

Lɛta Fɔ Ɛfisɔs 1:18

A de beg Gɔd igen fɔ mek i opin una at so dat una go no se Gɔd dɔn kɔl una fɔ kam to insɛf, ɛn una go abop fɔ gɛt layf we go de sote go, ɛn fɔ mek una go no di big blɛsin we Gɔd dɔn prɔmis una we nain yon pipul,

Pita In Sɛkɛn Lɛta 2:20

If pipul dɔn no wi Masta Jizɔs Krays, ɛn i dɔn pul dɛn kɔmɔt pan dɛn layf we de pwɛl pɔsin na dis wɔl, dɔn dɛn tɔn bak go liv dɛn kayn bad layf de bak ɛn dɛn nɔ ebul lɛf dɛn igen, dɛn layf go bad pas aw i bin tan bifo dɛn no Jizɔs Krays.

Lɛta Fɔ Ɛfisɔs 2:2

Da tɛm de una bin de du ɔl dɛn bad tin we di pipul dɛn na di wɔl de du. Una bin de du wetin di dɛbul dɛn edman we de ɔlɔbɔt tɛl una fɔ du, nain de rul dɛn pipul we nɔ de du wetin Gɔd tɛl dɛn fɔ du.

Di Sam Dɛm 119:174

PAPA GƆD, a de wet fɔ mek yu sev mi bikɔs a de ɛnjɔy fɔ du wetin yu lɔ se.

Lɛta Fɔ Galeshya 1:4

Krays bin gri fɔ mek dɛn kil am fɔseka di bad tin dɛn we wi de du, so dat i go pul wi kɔmɔt na di wɔl we de naw we bad plɛnti. Di day we Krays day sho wi se i du wetin Papa Gɔd want.

1 Kɔrint 3:19

Dis wɔl sɛns na nɔnsɛns to Gɔd. Dɛn rayt na Gɔd in Buk se, “Mɔtalman yon sɛns na di trap we Gɔd de tek kech am.”

Di Sam Dɛm 119:128

ɛn bikɔs a tink se ɔl yu lɔ dɛn gud, a dɔn et naw fɔ de du ɛnitin we nɔ rayt.

Lɛta Fɔ Rom 7:22

Insay mi at, a lɛk fɔ du wetin Gɔd in lɔ se mɔtalman fɔ du.

Di Sam Dɛm 119:97

A lɛk yu lɔ dɛn bad bad wan! Na de ɛn nɛt a de stɔdi dɛn.

Di Sam Dɛm 119:72

Ɛnitin yu se impɔtant to mi pas if dɛn gi mi ɔl di mɔni na di wɔl.

Jɔn 7:7

Di pipul dɛn na wɔl jɛs gɛt fɔ lɛk una, bɔt dɛn nɔ lɛk mi bikɔs a kin de tɛl dɛn se, dɛn de du bad.

Ɛksodɔs 23:2

Una nɔ fala ɛni krawd fɔ du bad. Una nɔ fala dɛn fɔ gi fɔls witnɛs, fɔ tɔn rayt to rɔŋ.

Rɛvɛleshɔn 13:8

Ɔl dɛn pipul na di wɔl go pre to di wayl bif, pas nɔmɔ if dɛn nem bin rayt na di Ship we dɛn kil, in buk. Bifo Gɔd mek di wɔl, nain dɛn pipul we gɛt layf sote go dɛn nem bin dɔn rayt na di Ship in buk.

Pita In Fɔs Lɛta 2:3

Dɛn rayt na Gɔd in Buk se, “Una dɔn no aw Gɔd gud.”

Di Sam Dɛm 119:103

Yu lɔ dɛn swit fɔ lan, swit pas we pɔsin de lik ɔni.

Lɛta Fɔ Rom 7:12

Na Gɔd gi wi di Lɔ, ɛn ɛni wan pan dɛn lɔ ya nɔ gɛt ɛnitin we bad pan dɛn, dɛn rayt fɔ ɔlman, ɛn dɛn gud fɔ ɔlman.

Lɛta Fɔ Kɔlɔse 4:12

Ɛpafras, we na wan pan una, ɛn we de wok fɔ Jizɔs lɛkɛ unasɛf, insɛf de tɛl una adu. I de pre fɔ una wit ɔl in at; i de pre mek una nɔ tap fɔ biliv pan Gɔd, mek una shɔ bɔt wetin una biliv, mek una no ɔl wetin una fɔ no bɔt Gɔd, ɛn mek una du ɔl wetin Gɔd want una fɔ du.

Pita In Fɔs Lɛta 1:18

Unasɛf no se nɔto tin lɛkɛ silva ɛn gold we de pwɛl, dɛn tek pe fɔ pul una kɔmɔt pan di yuslɛs layf we una grampapa papa dɛn bin liv ɛn we unasɛf bin liv;

Jɔn 14:30

I nɔ lɛf lɔŋ igen we a go ebul tɔk to una, bikɔs Setan we de rul dis wɔl de kam, bɔt i nɔ gɛt pawa oba mi.

Lɛta Fɔ Rom 7:14

Wi no se di lɔ kɔmɔt to Gɔd, bɔt mi na mɔtalman, mi na sin in slev.

Rɛvɛleshɔn 12:9

Dɛn drɛb di big dragɔn kɔmɔt na ɛvin, ib am dɔŋ na wɔl! Nain na da snek we dɛn kɔl Dɛbul ɔ Setan, we bin de mek di ol wɔl ful. Dɛn ib am dɔŋ na wɔl, wit ɔl in mɛsenja dɛn.

Ɛzra 10:11

so wetin dɛn fɔ du, naw na fɔ mek dɛn kɔnfɛs dɛn sin to PAPA GƆD, we na dɛn fɔstɛm-papa dɛn GƆD ɛn du wetin i se. I se dɛn nɔ fɔ miks wit di fɔrina dɛn we tap usay dɛn de ɛn dɛn fɔ lɛf di fɔrina dɛn we dɛn mared.

Matyu 13:22

Dɛn sid we fɔdɔm midul chuk chuk bush na dɛn wan we yɛri di wɔd bɔt mi, bɔt di waala ɛn di jɛntri we dɛn want na dis wɔl kil di wɔd na dɛn at, dat mek dɛn nɔ du plɛnti tin fɔ Gɔd.

Mak 4:19

bɔt di tin dɛn na dis wɔl we dɛn want du, di jɛntri we dɛn want, ɛn di ɔda tin dɛn we dɛn want mek di Gud Nyuz nɔ gɛt ples fɔ prɛd na dɛn at lɛkɛ wɛn plant de bia.

Lɛta Fɔ Kɔlɔse 1:9

Na dat mek frɔm di de we wi yɛri bɔt una, wi de pre fɔ una ɔltɛm. Wi de aks Gɔd mek in Spirit gi una sɛns ɛn mek una sabi bɔt am, so dat una go no wetin Gɔd want una fɔ du, ɛn una nɔ go dawt.