Rɛvɛleshɔn 6:9 - Krio Fɔs Oli Baybul

⁹ Dɛn di Ship opin di pepa we rol na di say we mek fayv we bin fasin. Dɛn a si di tebul we dɛn de mek sakrifays to Gɔd, ɔnda am, a si dɛn pipul we dɛn bin kil na wɔl dɛn spirit; dɛn bin kil dɛn bikɔs dɛn bin de tɔk se Gɔd in wɔd na tru ɛn dɛn bin de tɛl pipul bɔt Gɔd.

Rɛvɛleshɔn 6:9 Referans Kwoze

Rɛvɛleshɔn 20:4

Wɛn dat dɔn, a si dɛn chia we kiŋ kin sidɔm fɔ rul, ɛn a si dɛn wan we bin sidɔm pan dɛn. Sɔmbɔdi bin gi dɛn pawa fɔ jɔj ɔda pipul, ɛn igen a si dɛn spirit we kɔmɔt pan dɛn pipul we dɛn bin kil na wɔl bikɔs dɛn bin de tɔk se Jizɔs na dɛn Masta ɛn dɛn bin de tɛl pipul Gɔd in mɛsej. Dɛn pipul ya nɔ bin fɔdɔm bifo di wayl bif fɔ pre to am ɛn dɛn nɔ bin pre to di tin we dɛn mek fɔ tek mɛmba ɛn rɛspɛkt am, ɛn di wayl bif in mak nɔ bin de pan dɛn fɔrɛd ɔ pan dɛn an. Dɛn gɛt layf bak, dɔn dɛn rul wit Krays fɔ wan tawzin ia.

Jɔn 16:2

Dɛn go drɛb una kɔmɔt na dɛn Ju mitin os, ɛn tɛm de kam we ɛnibɔdi we kil una sɛf go tink se i de du wetin Gɔd want am fɔ du.

Rɛvɛleshɔn 1:9

Mi we de rayt dis buk na Jɔn, una brɔda, we wi ɔl de fala Jizɔs. Wi ɔl tinap traŋa pan ɔl di sɔfa we wi de sɔfa bikɔs wi tek Jizɔs Krays fɔ wi Kiŋ. Dɛn bin kɛr mi go lɛf mi na wan ples we dɛn kɔl Patmɔs we de midul wata, bikɔs a bin de tɛl pipul di mɛsej we Gɔd sɛn, we Jizɔs insɛf se na tru.

Rɛvɛleshɔn 2:13

A no usay una de, una de na di say we Setan de rul. A no se wande una nɔ dinay se mi na una Masta. Di tɛm sɛf we dɛn kil Anti pas we bin biliv pan mi wit ɔl in at bikɔs i tɔk opin wan se in biliv pan mi, pan ɔl we dɛn kil am da say de we una de, ɛn we Setan insɛf de, dat nɔ mek una dinay se unasɛf biliv pan mi.

Sɛkɛn Lɛta To Timoti 1:8

So yu nɔ fɔ fred fɔ tɔk bɔt wi Masta in wok; ɛn yu nɔ fɔ shem fɔ mi we de na jel fɔseka di Masta. Bɔt, yu fɔ gɛt yu yon pan di sɔfa we dɛn Kristiɛn de sɔfa fɔseka di Gud Nyuz, wit di pawa we Gɔd gi yu fɔ mek yu ebul bia.

Rɛvɛleshɔn 16:7

Dɛn a yɛri vɔys na di tebul we dɛn de mek sakrifays to Gɔd. Di vɔys de tɔk se, “Masta, Gɔd we gɛt pawa pas ɔl! Yu de jɔj rayt, ɛn yu de tɔk tru ɔltɛm!”

Rɛvɛleshɔn 14:18

Dɛn wan ɔda enjɛl we bin de gyad di faya, kɔmɔt klos di tebul we dɛn bin de mek sakrifays to Gɔd, kam. I ala lawd wan tɛl di enjɛl we ol di nɛf se, “Tek yu nɛf, kɔt dɛn greps we dɛn go tek mek wayn, dɛn dɔn rɛp!”

Rɛvɛleshɔn 1:2

Jɔn dɔn tɔk ɔl dɛn tin we i si; i dɔn rayt di mɛsej we Gɔd sɛn, we Jizɔs Krays insɛf sho am se na tru.

Lɛta Fɔ Filipay 1:23

Sɔntɛm a kin want liv, sɔntɛm a kin want day: a want kɔmɔt na dis wɔl ɛn go to Jizɔs Krays, ɛn dat go bɛtɛ fɔ mi fawe pas fɔ de na dis wɔl,

2 Kɔrint 5:8

Wi at nɔ de pwɛl ɛn wi bin ivin want kɔmɔt insay dis bɔdi we na wi os go de na wi ɔda os wit di Masta.

Lɛvitikɔs 4:7

Dɔn di man we de mek sakrifays fɔ pipul sin go put sɔm pan di blɔd pan di ɔn dɛn na di insɛns ɔlta bifo PAPA GƆD we de na di tɛnt usay dɛn kin mit PAPA GƆD, ɛn di wan we lɛf pan di man kaw in blɔd, i go put am bɔtɔm na di ɔlta we dɛn kin bɔn di sakrifays we de na di domɔt na di tɛnt usay dɛn kin mit PAPA GƆD.

Rɛvɛleshɔn 19:10

Dɛn a fɔdɔm na di pɔsin, we de tɔk, in fut fɔ bigin prez am. Na de di pɔsin se, “Grap, nɔ du dat! Misɛf na Gɔd in savant lɛkɛ yu, ɛn misɛf na wan pan yu kɔmpin dɛn we bin biliv di tru wɔd we Jizɔs tɔk! Na Gɔd in fut yu fɔ fɔdɔm fɔ prez am!” Di tru wɔd we Jizɔs tɔk, nain dɛn prɔfɛt dɛnsɛf de tɔk.

Rɛvɛleshɔn 8:3

Wan ɔda enjɛl kam tinap klos di tebul we dɛn bin de mek sakrifays to Gɔd, i bin ol wan insɛns pɔt we dɛn mek wit gold; sɔmbɔdi kam gi am plɛnti insɛns, i put am na di insɛns pɔt, dɛn i jɔyn am to di pre we Gɔd in pipul dɛn de pre; dɔn i put am na di gold tebul we dɛn bin de mek sakrifays to Gɔd, we de bifo di ay chia we Gɔd sidɔm.

Sɛkɛn Lɛta To Timoti 4:6

Fɔ mi yon pat, di tɛm dɔn rich fɔ mek a day lɛkɛ sakrifays fɔ Gɔd; di tɛm dɔn kam fɔ mek a lɛf dis layf.

Rɛvɛleshɔn 9:13

Dɛn di enjɛl we mek siks blo in trɔmpɛt. Na de a yɛri vɔys de kɔmɔt na di fo kɔna dɛn na di gold tebul we de bifo Gɔd, da tebul we dɛn de mek sakrifays to Gɔd.

Lɛta Fɔ Filipay 2:17

If dɛn gɛt fɔ kil mi sɛf ɛn di day we a day go tan lɛk sakrifays ɛn wit unasɛf yon sakrifays we una de mek to Gɔd dat na di biliv we una biliv pan Krays, a gladi ɛn a de mek una no se a gladi; so dat unasɛf go gladi wit mi.

Jɛnɛsis 4:10

Nain PAPA GƆD se, “Wetin mek yu dɔn du dis bad tin ya so? Yu brɔda in blɔd de kray to mi frɔm di grɔn.

Ɛksodɔs 29:12

Yuz yu fiŋa tek sɔm pan di kaw in blɔd ɛn rɔb am pan di fo kɔna dɛn na di ɔlta, dɔn yu tɔn di balans blɔd na di grɔn na di ɔlta.

Di Ibru Pipul Dɛn 12:23

Una de wit Gɔd in pikin dɛn we dɔn gɛda na ɛvin. Gɔd bin dɔn rayt dɛn nem na di buk we de na ɛvin. Una dɔn kam bifo Gɔd we de jɔj ɔlman. Una dɔn de wit dɛn pipul we tret na Gɔd yay, dɛn wan we Gɔd dɔn mek dɛn layf bi wetin i fɔ bi.