Rɛvɛleshɔn 5:14 - Krio Fɔs Oli Baybul

¹⁴ Di fo tin dɛn we gɛt layf ansa se, “Emɛn!” Dɔn di twɛnti-fo bigman dɛn ledɔm flat na grɔn ɛn prez di wan we sidɔm pan di ay chia we kiŋ kin sidɔm ɛn di Ship.

Rɛvɛleshɔn 5:14 Referans Kwoze

Rɛvɛleshɔn 19:4

Dɛn di twɛnti-fo bigman ɛn dɛn fo tin we gɛt layf fɔdɔm bifo Gɔd we bin sidɔm pan di chia we kiŋ kin sidɔm fɔ rul ɛn prez am fɔ in pawa, ɛn se, “Emɛn! Aliluya, lɛ wi prez Gɔd!”

Rɛvɛleshɔn 5:8

As i tek am so, di fo tin dɛn we gɛt layf ɛn di twɛnti-fo bigman dɛn fɔdɔm bifo di Ship. Dɛn ɔl bin gɛt wan wan tin fɔ ple myuzik we dɛn kɔl ap, ɛn gold besin dɛn we insɛns ful insay; dɛn insɛns ya na dɛn pre we Gɔd in pipul dɛn de pre.

Rɛvɛleshɔn 5:6

Dɛn a si wan Ship tinap klos di fɔs ay chia we kiŋ kin sidɔm pan, dɛn fo tin we gɛt layf ɛn dɛn bigman dɛn tinap rawnd am. Di Ship fiba lɛkɛ se dɛn bin dɔn sakrifays am. I bin gɛt sɛvin ɔn dɛn nain ed ɛn sɛvin yay dɛn we na Gɔd in sɛvin Spirit dɛn we i dɔn sɛn ɔlɔbɔt na wɔl.

Rɛvɛleshɔn 7:12

Dɛn bin de se, “Emɛn! Na wi Gɔd gɛt prez, nain wɔndaful, nain gɛt sɛns, nain gɛt ɔna, nain gɛt pawa ɛn nain na kiŋ sote go; wi de tɛl am tɛnki! Emɛn!”

1 Kɔrint 14:16

Wɛn una tɛl Gɔd tɛnki wit una spirit nɔmɔ, aw pɔsin we kam chɔch, bɔt we nɔ sabi bɔt dɛn tin ya, go se “Emɛn” wɛn una dɔn dɔn? Aw i go sabi wetin una de tɔk bɔt?

Rɛvɛleshɔn 4:4

Twɛnti-fo ɔda ay chia we kiŋ kin sidɔm pan bin de rawnd di fɔs ay chia; a si twɛnti-fo bigman dɛn sidɔm pan di chia dɛn; dɛn bin wɛr wayt klos; ɛn dɛn tin we kiŋ kin wɛr we dɛn kɔl krawn, bin de na dɛn ed, na gold dɛn bin tek mek di krawn dɛn.

Rɛvɛleshɔn 4:6

Bifo di sem ay chia a si sɔntin lɛkɛ wata we tan lɛkɛ se dɛn tek glas mek am. Ɔlɔbɔt klos di chia, frɔnt, bak ɛn sayd, fo tin we gɛt layf bin tinap, dɛn bin gɛt yay ɔlɔbɔt na dɛn bɔdi; bifo ɛn biɛn.

Rɛvɛleshɔn 5:11

As a es mi yay ɔp bak, na de a si enjɛl dɛn we bɔku lɛkɛ anch ɛn a yɛri dɛn vɔys! Dɛn tinap rawnd di fo tin dɛn we gɛt layf ɛn di twɛnti-fo bigman dɛn we bin de rawnd di ay chia we kiŋ kin sidɔm.