Rɛvɛleshɔn 22:5 - Krio Fɔs Oli Baybul

⁵ Nɛt nɔ go de na da tɔŋ de; pipul nɔ go nid lamp ɛn di san in layt igen, bikɔs Gɔd we na wi Masta nainsɛf go bi di layt we go layt di tɔŋ. Ɛn di pipul dɛn we de na ɛvin go rul lɛkɛ kiŋ sote go.

Rɛvɛleshɔn 22:5 Referans Kwoze

Rɛvɛleshɔn 20:4

Wɛn dat dɔn, a si dɛn chia we kiŋ kin sidɔm fɔ rul, ɛn a si dɛn wan we bin sidɔm pan dɛn. Sɔmbɔdi bin gi dɛn pawa fɔ jɔj ɔda pipul, ɛn igen a si dɛn spirit we kɔmɔt pan dɛn pipul we dɛn bin kil na wɔl bikɔs dɛn bin de tɔk se Jizɔs na dɛn Masta ɛn dɛn bin de tɛl pipul Gɔd in mɛsej. Dɛn pipul ya nɔ bin fɔdɔm bifo di wayl bif fɔ pre to am ɛn dɛn nɔ bin pre to di tin we dɛn mek fɔ tek mɛmba ɛn rɛspɛkt am, ɛn di wayl bif in mak nɔ bin de pan dɛn fɔrɛd ɔ pan dɛn an. Dɛn gɛt layf bak, dɔn dɛn rul wit Krays fɔ wan tawzin ia.

Daniɛl 7:18

Bɔt di oli wan dɛm we biliv pan PAPA GƆD we ay pas ɔl, go gɛt di kindɔm sote go.

Daniɛl 7:27

Di kindɔm ɛn di pawa ɛn di kindɔm in pawa ɔnda di wanol ɛvin go go to di pipul dɛn we biliv pan PAPA GƆD we ay pas ɔl; dɛn kindɔm go de sote go ɛn ɔl ɔda pawa dɛn go wok fɔ dɛn ɛn go obe dɛn.’

Lɛta Fɔ Rom 5:17

Na tru se, bikɔs wan man sin, frɔm da tɛm de, ɔlman bin gɛt fɔ day fɔseka di tin we di wan man du. Bɔt di tin we bi fɔseka wetin Jizɔs Krays du pas di tin we bi fɔseka di sin we wan man sin. Ɔl dɛn pipul we nɔ fit we Gɔd sho se in lɛk pan ɔl dat, we i sev dɛn bikɔs i mek ɔltin rayt bitwin in ɛn dɛn, ɛn dɛn nɔ gɛt fɔ pe fɔ dat, dɛn go gɛt pawa na dis layf fɔ fɛt sin fɔseka wetin Krays du fɔ dɛn.

Di Sam Dɛm 36:9

Na yu de gi layf ɛn nainsay yu wi de si wi we klia na layf.

Rɛvɛleshɔn 11:15

Dɛn di enjɛl we mek sɛvin blo in trɔmpɛt. Na de a yɛri plɛnti vɔys de tɔk lawd wan na ɛvin se, “Na Gɔd we na wi Masta ɛn Mɛsaya we i sɛn kam na dis wɔl dɔn gɛt di pawa naw fɔ rul, ɛn i go rul sote go!”

Rɛvɛleshɔn 3:21

Ɛnibɔdi we go stil tinap traŋa afta Setan dɔn tray am, a go mek i sidɔm wit mi na di say we a sidɔm fɔ rul jɛs lɛkɛ aw misɛf bin stil tinap traŋa afta Gɔd dɔn tray mi ɛn a kam sidɔm wit mi Papa na di say we i sidɔm de rul.

Sɛkɛn Lɛta To Timoti 2:12

If wi nɔ lɛf fɔ bia, wi go rul wit am. If wi se wi nɔ no am, insɛf go se in nɔ no wi.

Matyu 25:34

Dɔn di Kiŋ go tɛl dɛn pipul we tret na Gɔd in yay se, ‘Una kam, una we mi Papa dɔn blɛs! Una kam, tek di ples we una fɔ gɛt ɔnda Gɔd in rul, i bin dɔn rɛdi da ples de fɔ una frɔm we i mek di wɔl.

Di Sam Dɛm 84:11

Bikɔs PAPA GƆD we na wi Gɔd na san we de gi layt ɛn big shild we de protɛkt wi; i de sho wi in lɔv bay aw i de mek bɛtɛ fala wi; I nɔ go se i nɔ de gi wi gud tin dɛn wans i nɔ fɛn fɔlt pan wetin wi de du.

Rɛvɛleshɔn 18:23

lamp nɔ go layt de igen; man ɛn uman nɔ go mared de igen. Dɛn wan we bin de tredin insay de na bin dɛn bigman we ɔlman na wɔl, no. I bin de tek wich mek ɔl dɛn pipul na ɔl dɛn neshɔn ful.”

Matyu 25:46

Dɛn Jizɔs se, “A go mek dɛn pipul ya go say we dɛn go pɔnish sote go, bɔt di wan dɛn we du wetin Gɔd want dɛn fɔ du go go na di say we dɛn go gɛt layf sote go.”

Ayzaya 24:23

Di mun go sɔprayz, ɛn di san go shem; bikɔs PAPA GƆD Ɔlmayti go ren na Mawnt Zayɔn ɛn insay Jerusɛlɛm ɛn na frɔnt di bigman dɛn i go sho in pawa.

Ayzaya 30:26

Pantap dat, di mun in layt go tan lɛk di san in layt, ɛn di san in layt go brayt sɛvin tɛm mɔ, lɛk sɛvin de layt, di de we PAPA GƆD go tay usay de at in pipul dɛn ɛn mɛn di wund dɛn we dɛn bin wund we i bin pɔnish dɛm.

Zɛkaraya 14:7

ɛn di ples go bi de tɛm ɔl di tɛm; nɔbɔdi nɔ go de tɔk bɔt de tɛm ɔ nɛt bikɔs di ples go brayt so ivintɛm.

Matyu 19:28

Jizɔs se, “A de tɛl una se, nɛks wɔl wɛn Mɔtalman Pikin go sidɔm nain chia fɔ rul di wɔl wit in wɔndaful pawa na ɛvin, una twɛlv we dɔn de wit mi, go sidɔm pan twɛlv chia fɔ rul di twɛlv neshɔn dɛn we de na Izrɛl.

Rɛvɛleshɔn 20:6

Ɔl dɛn pipul we fɔs kam gɛt layf bak afta dɛn bin dɔn day na pipul we gɛt blɛsin, dɛn gɛt wɔndaful blɛsin. Di sɛkɛn day nɔ go du dɛn natin; dɛn go bi pipul we de mek sakrifays to Gɔd ɛn Krays, ɛn dɛn go rul wit am fɔ wan tawzin ia.

Rɛvɛleshɔn 21:11

Gɔd in brayt layt bin de shayn insay de; di tɔŋ bin de shayn lɛkɛ wan fayn fayn ston we dɛn kɔl jaspa, ɛn i bin de shayn lɛkɛ glas.