Rɛvɛleshɔn 20:4 - Krio Fɔs Oli Baybul

⁴ Wɛn dat dɔn, a si dɛn chia we kiŋ kin sidɔm fɔ rul, ɛn a si dɛn wan we bin sidɔm pan dɛn. Sɔmbɔdi bin gi dɛn pawa fɔ jɔj ɔda pipul, ɛn igen a si dɛn spirit we kɔmɔt pan dɛn pipul we dɛn bin kil na wɔl bikɔs dɛn bin de tɔk se Jizɔs na dɛn Masta ɛn dɛn bin de tɛl pipul Gɔd in mɛsej. Dɛn pipul ya nɔ bin fɔdɔm bifo di wayl bif fɔ pre to am ɛn dɛn nɔ bin pre to di tin we dɛn mek fɔ tek mɛmba ɛn rɛspɛkt am, ɛn di wayl bif in mak nɔ bin de pan dɛn fɔrɛd ɔ pan dɛn an. Dɛn gɛt layf bak, dɔn dɛn rul wit Krays fɔ wan tawzin ia.

Rɛvɛleshɔn 20:4 Referans Kwoze

Daniɛl 7:27

Di kindɔm ɛn di pawa ɛn di kindɔm in pawa ɔnda di wanol ɛvin go go to di pipul dɛn we biliv pan PAPA GƆD we ay pas ɔl; dɛn kindɔm go de sote go ɛn ɔl ɔda pawa dɛn go wok fɔ dɛn ɛn go obe dɛn.’

Daniɛl 7:18

Bɔt di oli wan dɛm we biliv pan PAPA GƆD we ay pas ɔl, go gɛt di kindɔm sote go.

Matyu 19:28

Jizɔs se, “A de tɛl una se, nɛks wɔl wɛn Mɔtalman Pikin go sidɔm nain chia fɔ rul di wɔl wit in wɔndaful pawa na ɛvin, una twɛlv we dɔn de wit mi, go sidɔm pan twɛlv chia fɔ rul di twɛlv neshɔn dɛn we de na Izrɛl.

Rɛvɛleshɔn 6:9

Dɛn di Ship opin di pepa we rol na di say we mek fayv we bin fasin. Dɛn a si di tebul we dɛn de mek sakrifays to Gɔd, ɔnda am, a si dɛn pipul we dɛn bin kil na wɔl dɛn spirit; dɛn bin kil dɛn bikɔs dɛn bin de tɔk se Gɔd in wɔd na tru ɛn dɛn bin de tɛl pipul bɔt Gɔd.

Rɛvɛleshɔn 3:21

Ɛnibɔdi we go stil tinap traŋa afta Setan dɔn tray am, a go mek i sidɔm wit mi na di say we a sidɔm fɔ rul jɛs lɛkɛ aw misɛf bin stil tinap traŋa afta Gɔd dɔn tray mi ɛn a kam sidɔm wit mi Papa na di say we i sidɔm de rul.

Sɛkɛn Lɛta To Timoti 2:12

If wi nɔ lɛf fɔ bia, wi go rul wit am. If wi se wi nɔ no am, insɛf go se in nɔ no wi.

Daniɛl 7:22

ɛn i bin de win dɛn, te di wan we bin dɔn de lɔlɔntɛm kam, ɛn i gi jɔjmɛnt fɔ seka di wan dɛn we biliv pan PAPA GƆD we ay pas ɔl, ɛn di tɛm rich wɛn di wan dɛn we biliv pan PAPA GƆD gɛt di kindɔm.

Rɛvɛleshɔn 20:6

Ɔl dɛn pipul we fɔs kam gɛt layf bak afta dɛn bin dɔn day na pipul we gɛt blɛsin, dɛn gɛt wɔndaful blɛsin. Di sɛkɛn day nɔ go du dɛn natin; dɛn go bi pipul we de mek sakrifays to Gɔd ɛn Krays, ɛn dɛn go rul wit am fɔ wan tawzin ia.

Daniɛl 7:9

As a bin de luk, nain dɛn kan put tron dɛn ɛn di wan we bin dɔn de lɔlɔntɛm, kam sidɔm; in klos bin wayt lɛk sno, ɛn in ia nain ed tan lɛk tru tru wul; na faya dɛn tek mek in tron, ɛn in wil dɛn na faya we de kech.

Lyuk 22:30

Una go it ɛn drink wit mi na di say we a de rul, ɛn we una de rul una go jɔj di twɛlv neshɔn dɛn we de na Izrɛl.

Rɛvɛleshɔn 22:5

Nɛt nɔ go de na da tɔŋ de; pipul nɔ go nid lamp ɛn di san in layt igen, bikɔs Gɔd we na wi Masta nainsɛf go bi di layt we go layt di tɔŋ. Ɛn di pipul dɛn we de na ɛvin go rul lɛkɛ kiŋ sote go.

Rɛvɛleshɔn 12:11

Wi kɔmpin Kristiɛn dɛn tek di Ship in blɔd ɛn di tru wɔd we dɛn bin de tɛl pipul bɔt Gɔd win am, we i bin de fɛt dɛn; ɛn pantap dat, dɛn gri fɔ wok fɔ Gɔd ɛn day fɔ am.

Rɛvɛleshɔn 1:9

Mi we de rayt dis buk na Jɔn, una brɔda, we wi ɔl de fala Jizɔs. Wi ɔl tinap traŋa pan ɔl di sɔfa we wi de sɔfa bikɔs wi tek Jizɔs Krays fɔ wi Kiŋ. Dɛn bin kɛr mi go lɛf mi na wan ples we dɛn kɔl Patmɔs we de midul wata, bikɔs a bin de tɛl pipul di mɛsej we Gɔd sɛn, we Jizɔs insɛf se na tru.

Lɛta Fɔ Rom 8:17

We wi na Gɔd in pikin dɛn, wi go gɛt dɛn blɛsin we Gɔd dɔn prɔmis in pipul dɛn, semwe so, wi gɛt pan wetin Gɔd bin kip fɔ Krays. If wi sɔfa lɛkɛ aw Krays sɔfa, Gɔd go mek di wɔndaful layf we Krays gɛt bi wi yon.

Rɛvɛleshɔn 15:2

Dɛn a si sɔntin we fiba big wata we tan lɛkɛ se dɛn tek glas mek am, faya bin de bɔn insay am. Pantap dat, a si dɛn pipul we bin dɔn win di wayl bif, we na nɔmba tinap fɔ in nem, ɛn di tin we pipul bin mek fɔ tek de mɛmba ɛn rɛspɛkt am. Dɛn bin tinap klos di big glas wata ɛn dɛn bin ol ap fɔ tek ple myuzik, we Gɔd bin dɔn gi dɛn.

Rɛvɛleshɔn 14:11

Di faya nɔ go tap fɔ mek smok we go de tɔmɛnt dɛn sote go, so dɛn pipul we de pre to di wayl bif ɛn di tin we dɛn mek fɔ tek mɛmba ɛn rɛspɛkt am, ɛn we gɛt in mak nɔ go gɛt blo; de ɛn nɛt, dɛn go de pan tɔmɛnt.”

Rɛvɛleshɔn 11:7

Wɛn dɛn dɔn tɛl pipul di mɛsej dɔn, di wayl bif we kɔmɔt insay di ol we nɔ gɛt bɔtɔm go kam fɛt dɛn. I go win dɛn ɛn kil dɛn,

Jɔn 14:19

I nɔ go te igen, di pipul dɛn na wɔl nɔ go si mi igen, bɔt una go si mi; ɛn bikɔs a gɛt layf, unasɛf go gɛt di tru layf.

Daniɛl 2:44

Ɛn dɛn tɛm dɛn de we di kiŋ dɛn go de rul, PAPA GƆD na ɛvin go briŋ in yon kindɔm we nɔ go ɛva fɔdɔm, ɛn in pawa nɔ go go na ɔda pipul an; ɛn I go brok ɔl dɛn kindɔm we bin dɔn de bifo am pyɛt pyɛt, ɛn dɔn dɛn kpatakpata wan; in go tinap sote go;

Rɛvɛleshɔn 17:8

Di wayl bif we yu si bin gɛt layf fɔstɛm, bɔt i nɔ gɛt layf igen, i nɔ go te igen i go kɔmɔt na di ol we nɔ gɛt bɔtɔm, dɛn i go go na ples we dɛn go go kil am. Dɛn pipul we de na wɔl, we dɛn nem nɔ bin dɔn rayt bifo Gɔd mek di wɔl, na di buk we dɛn rayt dɛn pipul we gɛt layf sote go dɛn nem, dɛn ɔl go wɔnda wɛn dɛn de luk di wayl bif. I bin gɛt layf fɔstɛm, dɛn i day, bɔt i go kam bak.

Rɛvɛleshɔn 11:15

Dɛn di enjɛl we mek sɛvin blo in trɔmpɛt. Na de a yɛri plɛnti vɔys de tɔk lawd wan na ɛvin se, “Na Gɔd we na wi Masta ɛn Mɛsaya we i sɛn kam na dis wɔl dɔn gɛt di pawa naw fɔ rul, ɛn i go rul sote go!”

Rɛvɛleshɔn 11:11

Wɛn di tri ɛn af de dɔn pas, Gɔd blo layf insay di tu pipul dɛn, na de dɛn tinap; ɔl dɛn wan we si dɛn, fred bad.

Rɛvɛleshɔn 11:3

A go sɛn tu pipul we go tɔk bɔt mi, dɛn go wɛr di kayn klos we pipul kin wɛr wɛn dɛn gɛt bɛrin, ɛn fɔ wan tawzin, tu ɔndrɛd ɛn siksti de, dɛn go tɛl pipul di mɛsej we Gɔd gi dɛn.”

Lɛta Fɔ Rom 11:15

Di tɛm we Gɔd nɔ bin gri tek dɛn fɔ bi in yon pipul igen, i bin mek dɛn ɔda pipul na di wɔl bi in padi dɛn. Wɛn Gɔd go tek dɛn fɔ bi in yon pipul dɛn, dɛn go jɛs tan lɛkɛ dayman we gɛt layf bak.

Lyuk 1:17

I go gɛt Gɔd in Spirit ɛn pawa lɛkɛ Ilayja, da prɔfɛt we bin de lɔntɛm. I go waka na di rod we Gɔd sho am ɛn yus in pawa fɔ mek dɛn dadi lɛk dɛn pikin; ɛn fɔ mek dɛn pipul we nɔ de du wetin Gɔd want bigin mɛmba Gɔd ɛn du wetin i want; i go mek di Masta in pipul dɛn rɛdi fɔ am.”

Malakay 4:5

I se, in go sɛn prɔfɛt lɛk Ilayja to dɛn bifo di de we dɛn nɔ go lɛk kam.

Mak 9:11

Dɛn aks Jizɔs se, “Wetin mek di Ju Lɔ ticha dɛn se Ilayja gɛt fɔ kam bak na wɔl bifo dɛn tin ya go bi?”

Mak 6:27

Di kiŋ sɛn soja man fɔ go kɔt Jɔn in ed kɔmɔt ɛn briŋ am kam. Di soja man go na di jel we Jɔn bin de, ɛn kɔt in ed kɔmɔt.

Mak 6:16

Wɛn Kiŋ Ɛrɔd yɛri ɔl wetin Jizɔs bin de du, i se, “Na Jɔn we bin de baptayz! A bin dɔn mek dɛn kɔt in ed kɔmɔt, bɔt naw i dɔn rayz frɔm in grev!”

Matyu 24:10

Ɛn da sem tɛm de plɛnti pipul go tap fɔ biliv pan mi. Dɛn go sɛl dɛn kɔmpin, dɛn go et dɛn kɔmpin.

Lyuk 14:14

If yu du so, yu go gɛt blɛsin bikɔs dɛn kayn pipul de nɔ go ebul fɔ tɔn di gud we yu du fɔ dɛn gi yu bak. Gɔd go gi yu di pe bak fɔ di gud we yu du, da de we in pipul dɛn go rayz frɔm dɛn grev.”

Rɛvɛleshɔn 1:2

Jɔn dɔn tɔk ɔl dɛn tin we i si; i dɔn rayt di mɛsej we Gɔd sɛn, we Jizɔs Krays insɛf sho am se na tru.

Rɛvɛleshɔn 2:26

Dɛn pipul we stil tinap traŋa afta Setan dɔn tray dɛn, ɛn we stil de du dɛn tin we a tɛl dɛn fɔ du, te a kam bak, a go gi dɛn pawa oba ɔl dɛn neshɔn na dis wɔl,

Rɛvɛleshɔn 4:4

Twɛnti-fo ɔda ay chia we kiŋ kin sidɔm pan bin de rawnd di fɔs ay chia; a si twɛnti-fo bigman dɛn sidɔm pan di chia dɛn; dɛn bin wɛr wayt klos; ɛn dɛn tin we kiŋ kin wɛr we dɛn kɔl krawn, bin de na dɛn ed, na gold dɛn bin tek mek di krawn dɛn.

Rɛvɛleshɔn 7:3

I se, “Una nɔ pwɛl di dray grɔn, di wata ɛn dɛn tik, te wi dɔn put Gɔd in stamp pan dɛn wan we de wok fɔ am, dɛn fɔrɛd.”