Rɛvɛleshɔn 20:12 - Krio Fɔs Oli Baybul

¹² Dɛn a si dɛn pipul we bin dɔn day, dɛn bigman ɛn dɛn ɔdinari pipul, dɛn ɔl tinap bifo di chia. Sɔmbɔdi opin sɔm buk dɛn, dɔn i opin wan ɔda buk we dɛn pipul we gɛt layf sote go dɛn nem bin rayt. Ɔl wetin dɛn pipul we bin dɔn day bin du bifo dɛn day, bin rayt insay di fɔs buk dɛn, ɛn nain Gɔd tek jɔj dɛn.

Rɛvɛleshɔn 20:12 Referans Kwoze

2 Kɔrint 5:10

Wi ɔl gɛt fɔ tinap bifo Krays fɔ mek i jɔj wi. Ɔlman go gɛt wetin i wok fɔ wɛn i bin de na dis layf, if na gud i wok fɔ, i go gɛt gud; if na bad igen, i go gɛt bad.

Matyu 16:27

Mɔtalman Pikin go kam wit Gɔd in enjɛl dɛn ɛn i go kam wit in Papa in wɔndaful pawa; i go gi ɔlman dɛn pe fɔ wetin dɛn du.

Daniɛl 7:10

Bɔku faya bin kɔmɔt de kech bifo am; tawzin tawzin pipul bin de wok fɔ am; ɛn tɛn tawzin tayms tɛn tawzin bin de advays am; di kot bin de ɔn ɛn di buk dɛn bin opin.

Ɛkliziastis 12:14

PAPA GƆD go jɔj ɔltin we pipul du, we insay de yu gɛt di sikrit tin dɛn we pipul ayd du; di gud wan dɛn ɛn di bad wan dɛn.

Rɛvɛleshɔn 22:12

Jizɔs se, “Lisin, di tɛm we a go kam nɔ fa igen. A go kam fɔ gi ɔlman di pe we dɛn wok fɔ.

Rɛvɛleshɔn 2:23

A go mek ɔl dɛn wan we de fala am sik ɛn day. Dat go mek ɔl dɛn Kristiɛn ɔlɔbɔt no se a no wetin ɔlman na wɔl de tink ɛn a de si insay dɛn at. A go mek ɔlman gɛt di pe fɔ wetin i du.

Rɛvɛleshɔn 11:18

Dɛn pipul we nɔto yu yon pipul bin vɛks bad pan yu, bɔt di tɛm fɔ mek yu sho se yu vɛks pan dɛn, dɔn rich; na di tɛm dis we yu go jɔj dɛn wan we dɔn day. Na di tɛm dis fɔ gi ɔl dɛn pipul we na yu yon dɛn pe, dat na dɛn prɔfɛt we de wok fɔ yu ɛn ɔl dɛn wan we rɛspɛkt yu, dɛn wan we gɛt pawa ɛn dɛn wan we nɔ gɛt pawa. Di tɛm dɔn rich fɔ kil dɛn wan we bin de pwɛl di wɔl!”

Jɛrimaya 17:10

“Mi PAPA GƆD, sach mɔtalman maynd ɛn tɛst mɔtalman at, fɔ pe ɔlman bay wetin i du, di pe we i fɔ gɛt fɔ di kayn wok we i wok.”

Rɛvɛleshɔn 3:5

Dɛn pipul we go stil tinap traŋa afta Setan dɔn tray dɛn, dɛnsɛf go wɛr wayt klos. Ɛn a nɔ go pul dɛn nem kɔmɔt na di buk we dɛn pipul we gɛt layf, dɛn nem rayt. A go tɔk bifo mi Papa ɛn bifo in enjɛl dɛn se dɛn pipul de na mi yon.

Rɛvɛleshɔn 20:13

Ɔl dɛn wan we bin dɔn day na wata kɔmɔt na di wata kam ɔp; ɔl dɛn wan we bin dɔn day we bin de na grev, rayz; di wan we bin sidɔm na di chia we kiŋ kin sidɔm, jɔj dɛn ɔl bay di wok we dɛn bin du na wɔl.

Rɛvɛleshɔn 21:27

Bɔt natin we bad nɔ go go insay de, ɛnibɔdi we de du dɛn dɔti dɔti tin nɔ go go insay de, semwe so, dɛn pipul we de lay, ɛn pipul dɛn lɛkɛ dat, nɔ go go insay de. Dɛn pipul we go go insay de, na di wan dɛn nɔmɔ we dɛn nem bin dɔn rayt na di Ship in buk we dɛn de rayt dɛn pipul we gɛt layf sote go dɛn nem.

Apɔsul Dɛn Wok 24:15

A biliv lɛkɛ aw dɛnsɛf biliv se Gɔd go mek ɔlman, gud ɔ bad, rayz frɔm dɛn grev.

Di Sam Dɛm 62:12

In lɔv fɔ wi nɔ go ɛva chenj. PAPA GƆD yu go mɔs gi ɔlman di pe we i fɔ gɛt.

Di Sam Dɛm 28:4

Na lɛf dɛn fɔ go fri. Mek di bad we dɛn de du fala dɛn; pe dɛn fɔ di bad tin dɛn we dɛn dɔn du ɛn lɛ dɛn gɛt wetin dɛn wok fɔ.

Rɛvɛleshɔn 20:11

Wɛn dat pas, na de a si wan big wayt chia we kiŋ kin sidɔm fɔ rul ɛn di pɔsin we sidɔm pan am. Ɛvin ɛn di wɔl jɛs lɔs bifo am; nɔbɔdi nɔ si dɛn igen.

Rɛvɛleshɔn 19:5

Dɛn a yɛri vɔys na di ay chia we kiŋ kin sidɔm fɔ rul. Di vɔys de tɔk se, “Una we wi ɔl de wok fɔ Gɔd, ɛn una ɔl we fred Gɔd, smɔl wan ɔ big wan, ɛn ɔl dɛn bigman, una, lɛ wi ɔl prez wi Gɔd!”

Lɛta Fɔ Filipay 4:3

Ɛn yu, we na mi tru wokmet, a want mek yu ɛp dɛn tu uman ya, bikɔs dɛn dɔn wok an to an wit mi traŋa wan fɔ prɛd di Gud Nyuz ɔlɔbɔt. Dɛn wok wit mi lɛkɛ aw Klɛmɛnt ɛn sɔm ɔda pipul dɛn ɛp mi pan di wok, ɛn Gɔd dɔn rayt dɛn ɔl nem na di buk we dɛn pipul we gɛt layf sote go dɛn nem de.

Lyuk 10:20

Una nɔ fɔ gladi bikɔs dɛn dɛbul du wetin una tɛl dɛn fɔ du, bɔt una fɔ gladi bikɔs una nem dɔn rayt na ɛvin.”

Prɔvabs 24:12

If yu se nɔto yu biznɛs, yu nɔ tink se PAPA GƆD de si yu? In we de kɔba yu ɛvride ɛn no wetin yu de tink, i nɔ go pe yu fɔ wetin yu du?

Rɛvɛleshɔn 13:8

Ɔl dɛn pipul na di wɔl go pre to di wayl bif, pas nɔmɔ if dɛn nem bin rayt na di Ship we dɛn kil, in buk. Bifo Gɔd mek di wɔl, nain dɛn pipul we gɛt layf sote go dɛn nem bin dɔn rayt na di Ship in buk.

Lɛta Fɔ Rom 2:6

Gɔd go gi ɔlman di pe fɔ wetin i du.

Jɛrimaya 32:19

we sabi plan wit sɛns ɛn kin du wɔndaful tin: I de si ɔl mɔtalman in we, ɛn de pe ɔlman bay in we ɛn bay wetin dɛn mek bi.

Rɛvɛleshɔn 17:8

Di wayl bif we yu si bin gɛt layf fɔstɛm, bɔt i nɔ gɛt layf igen, i nɔ go te igen i go kɔmɔt na di ol we nɔ gɛt bɔtɔm, dɛn i go go na ples we dɛn go go kil am. Dɛn pipul we de na wɔl, we dɛn nem nɔ bin dɔn rayt bifo Gɔd mek di wɔl, na di buk we dɛn rayt dɛn pipul we gɛt layf sote go dɛn nem, dɛn ɔl go wɔnda wɛn dɛn de luk di wayl bif. I bin gɛt layf fɔstɛm, dɛn i day, bɔt i go kam bak.

1 Kɔrint 4:5

So una nɔ fɔ jɔj ɛnibɔdi bifo di rayt tɛm rich, dat na bifo di Masta kam. Dɛn tin we de na dak naw go kam na layt wande ɛn di Masta go mek ɔlman no wetin pipul bin de mekɔp na dɛn at fɔ du. Da tɛm de Gɔd go prez ɔl dɛn wan we fɔ gɛt prez.

Prɔvabs 24:29

Nɔ se yu de tɔn dɛt gi yu kɔmpin ɛn dil wit am fɔ wetin i du yu.

Di Sam Dɛm 69:28

Pul dɛn nem dɛn kɔmɔt na di buk usay yu rayt dɛn pipul we de du wetin yu want dɛn nem; nɔ miks dɛn nem de.

Matyu 11:22

A de tɛl una fɔ tru se, di de we Gɔd go jɔj ɔlman na wɔl, i go sɔri fɔ Taya ɛn Saydɔn pas una.

Rɛvɛleshɔn 20:15

Ɛnibɔdi we in nem nɔ bin rayt insay di buk we dɛn rayt dɛn pipul we gɛt layf sote go dɛn nem, dɛn trowe am insay di wata we faya de kech.