Rɛvɛleshɔn 2:5 - Krio Fɔs Oli Baybul

⁵ so una mɛmba di we we una bin lɛk mi bifo una tap, ɛn una bigin fɔ lɛk mi bak lɛkɛ aw una bin lɛk mi di fɔs tɛm we una bigin waka wit mi. If una nɔ gri fɔ sɔri fɔ wetin una du so ɛn chenj, a go kam mit una, a go pul una lampolda kɔmɔt di say we i de;

Rɛvɛleshɔn 2:5 Referans Kwoze

Rɛvɛleshɔn 3:19

Dɛn pipul we a lɛk na dɛn a kin tɛl se dɛn de du rɔŋ tin ɛn a kin pɔnish dɛn mek dɛn go gɛt sɛns fɔ du wetin rayt. So una kechɔp unasɛf, ɛn lɛf fɔ sin.

Rɛvɛleshɔn 2:16

So una fɔ lɛf fɔ du dɛn bad tin ya, if nɔ so, i nɔ go te igen, a go kam mit una, a go tek dis sɔd we de na mi mɔt fɛt di pipul dɛn we de du dɛn bad tin ya.

Ozie 14:1

Izrɛl, una kam bak to PAPA GƆD una Gɔd bikɔs una dɔn fɔm we una sin.

Rɛvɛleshɔn 2:19

A no di tin dɛn we una de du, a no se una lɛk pipul ɛn una nɔ lɛf fɔ biliv pan mi, una de wok wit ɔl una at ɛn una de bia insay di waala we de mit una. Ɛn a no se dɛn tin we una de du naw bɛtɛ pas di tin dɛn we una bin de du fɔstɛm.

Rɛvɛleshɔn 1:20

A de kam tɛl yu wetin dɛn sɛvin sta ya we a ol na mi raytan ɛn dɛn sɛvin gold lampolda, min; di sɛvin sta dɛn na di sɛvin enjɛl dɛn we de gyad dɛn sɛvin chɔch. Di sɛvin lampolda dɛn na di sɛvin chɔch dɛnsɛf.”

Izikɛl 20:43

Ɛn na de una go mɛmba una bievyɔ dɛm, ɛn ɔl di tin dɛn we una bin de du, we una bin tek fɔ dɔti unasɛf; ɛn una go et unasɛf fɔ ɔl di bad bad tin dɛn we una dɔn du.

Lyuk 1:17

I go gɛt Gɔd in Spirit ɛn pawa lɛkɛ Ilayja, da prɔfɛt we bin de lɔntɛm. I go waka na di rod we Gɔd sho am ɛn yus in pawa fɔ mek dɛn dadi lɛk dɛn pikin; ɛn fɔ mek dɛn pipul we nɔ de du wetin Gɔd want bigin mɛmba Gɔd ɛn du wetin i want; i go mek di Masta in pipul dɛn rɛdi fɔ am.”

Malakay 4:6

I se, nain go mek papa lɛk in pikin bak ɛn pikin lɛk in papa bak, ɔ nɔ so in go kam pwɛl di land.

Ayzaya 1:26

Ɛn a go put una jɔj dɛn bak lɛk fɔstɛm, ɛn una advays dɛn, jɛs lɛk aw una bin bigin. Afta dat, dɛn go kɔl una di siti we de waka tret na PAPA GƆD in yay, siti we de kip Gɔd wɔd.”

Lyuk 20:16

I go kam kil dɛn ɔl ɛn rɛnt di gadin gi ɔda pipul.” Wɛn di pipul dɛn yɛri wetin Jizɔs tɔk, dɛn se, “Lɛ Gɔd nɔ mek dat bi!”

Mak 12:9

Jizɔs aks in lanin bɔy dɛn se, “Wetin una tink se di man we gɛt di gadin go du dɛn pipul ya? I go kil dɛn ɔl ɛn rɛnt di gadin gi ɔda pipul.

Izikɛl 36:31

Dɛn una go mɛmba una ivul bievyɔ ɛn di tin dɛn we una bin de du we nɔ gud, ɛn una go et unasɛf fɔ una bad bad wikɛdnɛs ɛn di wikɛd tin dɛn we una bin de du we de briŋ etrɛd ɛn bad bad fred fred.

Rɛvɛleshɔn 2:2

A no ɔl di tin dɛn we una dɔn du, a no se una dɔn wok traŋa ɛn a no aw una kin bia wɛn waala kam. A no se una nɔ de gri mek bad pipul de wit una; una dɔn luk dɛn pipul we se dɛn na apɔsul ɛn una dɔn si se na lay dɛn de lay.

Lɛta Fɔ Galeshya 5:4

Una we fil se na wɛn una du wetin di Ju Lɔ se, nain ɔltin go rayt bitwin una ɛn Gɔd, una dɔn lɛf fɔ mek Krays rul una. Una dɔn tɔn una bak pan di gud we Gɔd want du fɔ una.

Malakay 3:4

Da tɛm de PAPA GƆD go gladi fɔ wetin dɛn de gi am lɛk fɔs.

Ayzaya 14:12

“Luk we yu dɔn fɔdɔm kɔmɔt na ɛvin, Yu De tɛm sta, Doklin bɔypikin! Luk we yu fɔdam kan dɔŋ na grɔn, yu we bin nyama nyama di neshɔn dɛm!

Jud In Lɛta 1:24

Lɛ Gɔd we ebul mek una nɔ sin ɛn we ebul mek sin nɔ de na una layf atɔl, briŋ una wit gladi na una at na di wɔndaful ples we i de. Nain na wi wangren Gɔd, we dɔn sev wi bay Jizɔs Krays, wi Masta, nain gɛt prez, pawa ɛn ɔna frɔm tɛm, naw ɛn sote go! Emɛn.

Di Ibru Pipul Dɛn 10:32

Una fɔ mɛmba aw una bin de du fɔstɛm, wɛn una bin dɔn ɔndastand Gɔd yon we. Da tɛm de, pan ɔl we una bin de sɔfa bad, una bin bia ɛn tinap traŋa.

Ozie 9:10

PAPA GƆD se lɛk aw greps go gro na di ɛmti land we pɔsin nɔ go ebul tap, na so Izrɛl bin tan we i fɛn am. Ɛn lɛk aw di fɔs frut na fig tik kin rɔtin di fɔs tɛm we i bɔn, na so i bin si dɛn fɔstɛm-papa dɛn. Bɔt na so dɛnsɛf bin go na Mawnt Peɔ, go nɔnsɛns dɛnsɛf ɛn gi dɛnsɛf to Beal we mek PAPA GƆD et dɛn bad bad wan

Rɛvɛleshɔn 16:9

Di pipul dɛn we di san in faya bin de bɔn, bigin kɔs Gɔd we gɛt pawa fɔ mek i tap dɛn bad bad tin ya. Bɔt dɛn nɔ gri lɛf fɔ sin ɛn dɛn nɔ gri prez Gɔd we gɛt pawa.

Matyu 5:14

“Una na di layt fɔ di pipul dɛn na di wɔl. Tɔŋ we dɛn bil pantap il nɔ de ayd.

Matyu 5:15

Nɔbɔdi nɔ de layt lamp ɛn put am ɔnda bokit, i de put am na di say we i go shayn we ɔlman na di os go si.

Lɛta Fɔ Filipay 2:15

so dat pipul nɔ go pɔynt fiŋa pan una. Dɛn go si se una na Gɔd in pikin dɛn we gɛt klin at ɛn we nɔ miks pan sin. Pan ɔl we una de na wɔl, wit pipul we wikɛd ɛn we de liv bad layf ɔltɛm, una yon layf fɔ tan lɛkɛ layt fɔ dɛn.

Pita In Sɛkɛn Lɛta 3:17

Mi padi dɛn we a lɛk, we una dɔn no dɛn tin ya bifo dɛn bi, una fɔ tek tɛm mek dɛn pipul ya we nɔ de kip Gɔd in lɔ nɔ drɔ una fɔ fala dɛn ɛn mek una yon at nɔ stɛdi.