Rɛvɛleshɔn 2:14 - Krio Fɔs Oli Baybul

¹⁴ Bɔt sɔm tin dɛn de we a blem una fɔ, sɔm pan una de du dɛn tin we Belam bin tɛl pipul fɔ du; na Belam bin sho Belak aw fɔ trap di Izrɛl pipul dɛn mek dɛn sin. I bin mek dɛn it it we dɛn bin dɔn gi dɛn tin we mɔtalman mek fɔ pre to, ɛn i mek dɛn wan we bin dɔn mared, liv fri layf.

Rɛvɛleshɔn 2:14 Referans Kwoze

Pita In Sɛkɛn Lɛta 2:15

Dɛn ticha ya dɔn kɔmɔt na di rayt rod so dɛn nɔ no usay dɛn de go igen. Dɛn de waka na di rod we Belam, Bosɔ in pikin, bin de waka; Belam na pɔsin we bin lɛk fɔ du tin we nɔ rayt, fɔ gɛt mɔni,

Di Nɔmba Dɛm 31:16

I se na di uman dɛn du wetin Belam se ɛn na dɛn bin mek di Izrɛlayt dɛn pul at pan PAPA GƆD na Peɔ we mek bad bad sik we kil dɛn fɔdɔm pan PAPA GƆD in pipul dɛn.

Rɛvɛleshɔn 2:20

Bɔt na wan tin a de blem una fɔ, una de gri mek da uman we dɛn kɔl Jɛzibɛl sidɔm wit una. I de se na Gɔd in pawa in de tek tɔk di wɔd dɛn we i de tɔk, bɔt na lay i de lay gi mi pipul dɛn; i de mek dɛn ful ɛn dat go mek dɛn wan we dɔn mared, liv fri layf; ɛn mek pipul it it we dɛn bin dɔn gi dɛn tin we mɔtalman de pre to.

Jud In Lɛta 1:11

Trɔbul de bifo dɛn! Na Ken in fut dɛn de fala ɛn fɔseka mɔni dɛn de mek di sem mistek we Belam bin mek, dɛn go day lɛkɛ aw Kɔra bin day wɛn i tɔn pan di wan we bin de oba am.

Apɔsul Dɛn Wok 15:29

una nɔ fɔ it ɛni bif we dɛn dɔn sakrifays to dɛn yon gɔd, una nɔ fɔ it bif we gɛt blɔd pan am, una nɔ fɔ it blɔd, ɛn una nɔ fɔ liv fri layf. I go gud if una nɔ du dɛn tin ya we wi dɔn rayt to una. Una mekes, o!”

Di Ibru Pipul Dɛn 13:4

Mek ɔlman rɛspɛkt mared layf, di man we mared nɔ fɔ gɛt ɔda uman ɛn di wɛf nɔ fɔ gɛt ɔda man. Una mɛmba se Gɔd go jɔj dɛn wan we liv fri layf, ɛn i go jɔj ɛni mared uman we kip ɔda man ɛn ɛni mared man we kip ɔda uman.

Jɔshwa 24:9

PAPA GƆD se na Balak, Zipɔ in pikin we na kiŋ na Moab, bin grap go fɛt Izrɛl, dɔn i sɛn Balaam fɔ go put swɛ pan Izrɛl.

Pita In Fɔs Lɛta 2:8

Dɛn rayt ɔda say na Gɔd in Buk se, “Na di ston dis we go mek pipul bɔk dɛn fut ɛn fɔdɔm.” Dɛn pipul ya bin bɔk dɛn fut bikɔs dɛn nɔ bin biliv se Gɔd in wɔd na tru; na so Gɔd bin dɔn plan fɔ dɛn.

Apɔsul Dɛn Wok 21:25

Naw a want tɔk bɔt dɛn Kristiɛn we nɔto Ju: wi dɔn rayt lɛta to dɛn se dɛn nɔ fɔ it ɛnitin we dɛn dɔn sakrifays to dɛn gɔd, dɛn nɔ fɔ it bif we gɛt blɔd pan am, dɛn nɔ fɔ it blɔd, ɛn dɛn nɔ fɔ liv fri layf.”

Di Nɔmba Dɛm 31:8

Pan di wan dɛn we dɛn kil na Ɛvi, Rɛkɛm, Zɔ, Ɔ, ɛn Rɛba we na di fayv kiŋ na Midian. Dɛn bin kil Belam we na Beɔ in bɔypikin sɛf na di fɛt we dɛn fɛt.

Rɛvɛleshɔn 22:15

As fɔ dɛn pipul we de du dɛn dɔti tin, dɛn wich, dɛn pipul we liv fri layf dɛn pipul we de kil, dɛn wan we ol juju, ɔl dɛn pipul we de lay, ɛn dɛn wan we lɛk fɔ lay, ɔl dɛn kayn pipul ya nɔ go mas fut insay da tɔŋ de.

Rɛvɛleshɔn 21:8

Bɔt as fɔ dɛn pipul we dɛn maynd wik, dɛn wan we nɔ biliv Gɔd in mɛsej, dɛn wan we de du dɛn dɔti dɔti tin, dɛn wan we de kil dɛn kɔmpin, dɛn wan we liv fri layf, dɛn wan we de wich, dɛn wan we de fala mɛrɛsin, dɛn wan we de lay, ɔl dɛn pipul we de du dɛn kayn tin ya, dɛn go trowe dɛn ɔl insay da wata we faya de kech ɛn sɔlfa de bɔn. Na di sɛkɛn day dat.”

1 Kɔrint 7:2

Bɔt bikɔs fri layf plɛnti na wɔl, i bɛtɛ fɔ lɛ man gɛt in wɛf ɛn mek man mared.

Matyu 18:7

I bad fɔ ɔlman bikɔs tin dɛn de na di wɔl we de mek pipul dɛn nɔ biliv pan mi. Dɛn tin ya mɔs bi, bɔt i go bad fɔ di pɔsin we mek dɛn bi.

Izikɛl 3:20

Igen, if wan man we de du di kɔrɛkt tin dɛn, kan chenj frɔm di kɔrɛkt tin dɛn we i bin de du ɛn bigin du bad bad tin dɛn, a go put ston bifo am we i go bɔk in fut pan, fɔdɔm ɛn day; ɛn bikɔs yu nɔ bin wɔn am, i go day fɔ di bad we i bin de du ɛn dɛn nɔ go mɛmba di kɔrɛkt tin dɛn we i bin dɔn de du; bɔt a go ol yu fɔ in blɔd.

Di Nɔmba Dɛm 24:14

Belam tɛl am se i de go bak to in yon pipul dɛn, bɔt i wɔn Belak bɔt wetin di pipul dɛn we i bin want am fɔ ib swɛ pan gɛt fɔ du am.

Lɛta Fɔ Rom 14:21

Di rayt tin we una fɔ du, nain dis: una nɔ fɔ it bif, ɔ drink wayn, ɔ du ɛni ɔda tin we go mek una kɔmpin Kristiɛn sin.

Lɛta Fɔ Rom 14:13

So wi fɔ lɛf fɔ jɔj wi kɔmpin, wi fɔ mekɔp nɔ fɔ du ɛnitin we go mek wi kɔmpin Kristiɛn sin.

Izikɛl 44:12

Bikɔs dɛn bin minista to dɛm, frɔnt dɛn lay lay gɔd dɛm, ɛn dɔn bi wan bad bad wikɛd blɔk we Izrɛl pipul de bɔk dɛn fut pan; fɔseka dat, a dɔn swɛ bɔt dɛn se dɛn go bia dɛn pɔnishmɛnt, PAPA GƆD tɔk se.

Jɛrimaya 6:21

Fɔseka dat na dis PAPA GƆD se: “A de tɛl una, A go put blɔk we de mek pɔsin fɔdɔm bifo dɛn pipul ya, blɔk we de mek pɔsin fɔdɔm we dɛn go bɔk dɛn fut pan; di papa dɛm ɛn di bɔypikin dɛm togɛda, neba ɛn padi go day.”

Rɛvɛleshɔn 2:4

Bɔt na wan tin una de du we a nɔ lɛk, una nɔ lɛk mi lɛkɛ aw una bin lɛk mi fɔstɛm;

1 Kɔrint 1:23

Bɔt wi de tɛl pipul se Krays day na di krɔs, dat de mek di Ju pipul dɛn vɛks ɛn di pipul dɛn we nɔto Ju dɛn se na nɔnsɛns.

Lɛta Fɔ Rom 11:9

Ɛn Kiŋ Devid se: “Mek dɛn tin we dɛn de it ɛn ɛnjɔy tɔn trap fɔ kech dɛn; lɛ Gɔd mek dɛn fɔdɔm ɛn mek i pɔnish dɛn!

Lɛta Fɔ Rom 9:32

If pɔsin aks wetindu dɛn nɔ fɛn da lɔ de, a go se, na bikɔs dɛn nɔ bin biliv pan Gɔd, dɛn bin abop pan di wok we dɛn de du. Dɛn bɔk dɛn fut pan di “ston we de mek pipul bɔk dɛn fut.”

Ayzaya 57:14

Ɛn dɛn go se, “Bil am, yɛs, bil am, rɛdi di rod, pul ɔltin we de blɔk dɛm kɔmɔt usay mi pipul dɛn fɔ pas.”