Rɛvɛleshɔn 19:15 - Krio Fɔs Oli Baybul

¹⁵ I bin ol wan sɔd nain mɔt, we i go tek fɛt ɛn win ɔl dɛn neshɔn we nɔ de fala am. Na ayɛn staf i go tek rul dɛn, ɛn i go mas mas dɛn greps na di say we dɛn de mas dɛn fɔ pul dɛn wata, we go sho se Gɔd, we gɛt pawa pas ɔl, vɛks bad bad wan.

Rɛvɛleshɔn 19:15 Referans Kwoze

Rɛvɛleshɔn 1:16

I bin ol sɛvin sta dɛn nain raytan; sɔd we shap tu say bin kɔmɔt nain mɔt; in fes bin de shayn lɛkɛ aw san de shayn twɛlv oklɔk santɛm.

Rɛvɛleshɔn 2:27

jɛs lɛkɛ we mi Papa dɔn gi misɛf pawa oba dɛn. Dɛn go tek lɔŋ ayɛn lɛkɛ di wan we chif de ol, rul oba dɛn neshɔn ya ɛn dɛn go skata dɛn pispis lɛkɛ kɔntri pɔt we pɔsin ib dɔŋ.

Di Sam Dɛm 2:9

PAPA GƆD tɛl am se, i go mek i ol dɛn wit traŋa an ɛn nyamanyama dɛn lɛkɛ we kle pɔt skata.

Sɛkɛn Lɛta Fɔ Tɛsalonayka 2:8

Na da tɛm de di wan we de fɛt Gɔd go sho insɛf. Bɔt wɛn Masta Jizɔs go kam, i go kil am wit di briz we de kɔmɔt nain mɔt ɛn wit di brayt layt we de rawnd am.

Ayzaya 11:4

Bɔt na bay wetin rayt na PAPA GƆD in yay, i go jɔj di po man, ɛn go disayd di sem we fɔ kwayɛt pipul na wɔl, ɛn i go pɔnish di wɔl wit traŋa wɔd dɛn we i de tɔk, ɛn na di briz we de kɔmɔt nain mɔt i go tek kil wikɛd pipul.

Rɛvɛleshɔn 19:21

Dɔn, di sɔd we di pɔsin we bin de rayd di ɔs bin gɛt, nain mɔt, dɛn tek am kil ɔl di ɔda soja man dɛn; dɛn, ɔl dɛn bɔd dɛn kam it dɛn bɔdi; dɛn it te dɛn bɛlful pasmak.

Rɛvɛleshɔn 12:5

I nɔ tu te, di uman bɔn wan bɔy pikin, we go rul oba ɔl dɛn neshɔn wit staf we dɛn tek ayɛn mek. Bɔt sɔmbɔdi jɔg di pikin rɔn kɛr am go to Gɔd we sidɔm na di ay chia we kiŋ kin sidɔm fɔ rul.

Rɛvɛleshɔn 2:16

So una fɔ lɛf fɔ du dɛn bad tin ya, if nɔ so, i nɔ go te igen, a go kam mit una, a go tek dis sɔd we de na mi mɔt fɛt di pipul dɛn we de du dɛn bad tin ya.

Rɛvɛleshɔn 2:12

“Rayt dis mɛsej ya sɛn am go to di enjɛl we de gyad di Kristiɛn dɛn na Pagamɔm: “Na di pɔsin we gɛt da sɔd we shap tu say, na im sɛn dis mɛsej ya go to di Kristiɛn dɛn na Pagamɔm:

Ayzaya 30:33

Bikɔs ples fɔ bɔn pɔsin bin dɔn rɛdi lɔlɔntɛm. Yɛs, dɛn bin dɔn rɛdi am fɔ di kiŋ. Di say we dɛn mek fɔ bɔn pɔsin, bin dip ɛn wayd, wit faya ɛn wud abɔmpa. Wɛn PAPA GƆD blo wit in mɔt, i go tan lɛk brim ston riva, ɛn nain go layt di faya.

Joɛl 3:13

Put di nɛf we fɔ tek avɛst de bikɔs di tin dɛn fɔ avɛst dɔn rɛp. Fɔ go usay dɛn de mek wayn bikɔs di ples dɔn ful. Di kyas dɛn fɔ di wayn ful te dɛn rɔnoba, bikɔs di bad we de pan dɔn pasmak.

Malakay 4:6

I se, nain go mek papa lɛk in pikin bak ɛn pikin lɛk in papa bak, ɔ nɔ so in go kam pwɛl di land.

Rɛvɛleshɔn 14:10

insɛf go drink Gɔd in yon wayn, dat na di pɔnish we i go pɔnish bikɔs Gɔd vɛks pan am, da pɔnishmɛnt de tan lɛkɛ bita wayn we nɔ miks wit wata we i gɛt fɔ drink. Ɔl dɛn pipul we de du dɛn tin ya go pɔnish bifo Gɔd in enjɛl dɛn ɛn Gɔd in Ship insay faya we sɔlfa de bɔn.