Rɛvɛleshɔn 17:3 - Krio Fɔs Oli Baybul

³ Di Spirit fɔdɔm pan mi, na de di enjɛl kɛr mi go na wan dɛzat. Dɛn a si wan uman sidɔm pan wan rɛd wayl bif we bin gɛt sɛvin ed ɛn tɛn ɔn; ɔlɔbɔt nain bɔdi plɛnti bad nem dɛn we nɔ sho rɛspɛkt fɔ Gɔd, bin rayt.

Rɛvɛleshɔn 17:3 Referans Kwoze

Rɛvɛleshɔn 12:3

Wɛn dat dɔn, wan ɔda wɔndaful tin bin bi ɔp na di klawd. Wan big big rɛd snek we dɛn kɔl dragɔn bɔs kɔmɔt, i bin gɛt sɛvin ed ɛn tɛn ɔn, ɛn ɔl di sɛvin ed dɛn bin gɛt wan wan krawn pan dɛn.

Rɛvɛleshɔn 17:18

“Di uman we yu si, na da big tɔŋ we gɛt pawa oba dɛn wan we de rul na di wɔl.”

Rɛvɛleshɔn 12:6

Di uman rɔnawe go na di dɛzat, na di say we Gɔd bin dɔn mek fɔ am, na de i go de fɔ wan tawzin, tu ɔndrɛd ɛn siksti de, ɛn pɔsin go de mɛn am.

Rɛvɛleshɔn 17:4

Di uman bin wɛr rɛd klos we dia, ɛn i bin drɛs fayn wit plɛnti gold tin, dɛn shayn shayn ston ɛn fayn fayn bid. I bin ol wan gold kɔp nain an, we bin ful wit dɛn dɔti dɔti dɔti tin we in fri layf briŋ.

Rɛvɛleshɔn 12:14

Sɔmbɔdi bin gi di uman tu wiŋs, dat na da bɔd we dɛn kɔl igul, in big wan, in wiŋ dɛn, fɔ mek i flay go na di ples we de na di dɛzat, we dɛn bin dɔn kip fɔ am, dɛn go de mɛn am de fɔ tri ɛn af ia mek di dragɔn nɔ go ebul du am bad.

Daniɛl 7:25

I go tɔk bad tin bɔt PAPA GƆD we ay pas ɔl, ɛn i go mɔna dɛn wan dɛn we biliv pan PAPA GƆD ɛn i go tink fɔ chenj aw tin tan, ɛn di lɔ; ɛn i go gɛt di pawa fɔ tri ɛn di af ia.

Daniɛl 7:20

Ɛn igen, di tɛn ɔn we bin de nain ed, ɛn di ɔda ɔn we bin bɔs midul dɛn, we na bifo am tri pan dɛn bin fɔdɔm; da ɔn de we bin gɛt yay ɛn mɔt we de tɔk impɔtant tɔk, ɛn we bin luk lɛk se i gɛt pawa pas ɔl in kɔmpin dɛn.

Daniɛl 7:8

A bin de wach di ɔn dɛn, nain a si wan ɔda wan bɔs midul dɛn, wan smɔl wan, ɛn dɛn jɔg tri pan di fɔs ɔn dɛn kɔmɔt na dɛn rut; ɛn a si se dis ɔn ya bin gɛt yay dɛn we tan lɛk mɔtalman yon, ɛn mɔt we de tɔk impɔtant tin dɛn.

Rɛvɛleshɔn 21:10

Gɔd in Spirit kam pan mi, na de di enjɛl tek mi go ɔp wan ay ay il. Wɛn wi rich de, di enjɛl sho mi Gɔd in tɔŋ we dɛn kɔl di nyu Jerusɛlɛm as di tɔŋ de kɔmɔt to Gɔd na ɛvin kam dɔŋ.

Izikɛl 8:3

I bin pul sɔntin na do we tan lɛkɛ an, ɛn es mi ɔp bay wan pan di dada na mi ed; ɛn di spirit kɛr mi go ɔp bitwin ath ɛn ɛvin, ɛn i briŋ mi insay PAPA GƆD in vishɔn dɛm kam na Jerusɛlɛm, usay fɔ pas go insay di get na di insay kɔt we tɔn to di nɔt, ɛn usay di imej we nem Jɛlɔs ɛn we de mek pipul dɛn jɛlɔs, sidɔm.

Izikɛl 11:24

Nain di Spirit es mi ɔp, ɛn insay di vishɔn we PAPA GƆD in Spirit bin de sho mi, i briŋ mi kam Chaldia to di wan dɛn we de ɛgzayl. Dɛn di vishɔn we a bin de si lɔs pan mi.

Sɛkɛn Lɛta Fɔ Tɛsalonayka 2:4

Di wan we de fɛt Gɔd nɔ go tek dɛn tin ɛn dɛn spirit we pipul de pre to mek natin. I go fil se in gɛt pawa pas ɔl dɛn tin de ɛn i go sidɔm na Gɔd in Os ɛn se in na Gɔd.

Izikɛl 3:12

Nain di spirit es mi ɔp ɛn as PAPA GƆD in glori grap kɔmɔt nain ples, a yɛri big big sawnd biɛn mi lɛk ebi ebi atkwek.

Sɔlɔmɔn In Siŋ Dɛm 8:5

Udat dawande we de kɔmɔt na di dɛzat de liŋ pan in daliŋ? A wek yu ɔnda di apul tik. Da say we in mama in bɛlɛ at am fɔ bɔn yu, na de di wan we bɔn yu in bɛlɛ bin at am.

Rɛvɛleshɔn 1:10

Wan Sɔnde, Gɔd in Spirit kam pan mi, nain a yɛri vɔys de tɔk lawd wan lɛkɛ trɔmpɛt biɛn mi.

Daniɛl 11:36

Di kiŋ go de du wetin in want fɔ du. I go mek prawd ɛn mek insɛf big pas ɔl dɛn gɔd, ɛn i go de tɔk strenj tin dɛn agens PAPA GƆD we ay pas ɔl dɛn gɔd. Bɛtɛ go fala am te i satisfay se in dɔn trit di pipul dɛn bad dɔn; bikɔs wetin i plan fɔ du, i mɔs du am.

2 Kiŋ 2:16

ɛn tɛl am se, na fifti pan dɛn de de, so lɛ i gi dɛn pamishɔn fɔ go fɛn in masta; dɛn se sɔntɛm na PAPA GƆD in spirit dɔn kech am kɛr am go pantap wan mawnten ɔ dɔn ib am na wan vali. Bɔt Ilaɛlsha se nɔ.

1 Kiŋ 18:12

I se in nɔ no usay PAPA GƆD in Spirit go kɛr am go i lɛf am, bikɔs, if in go tɛl Eab se Ilayja dɔn kam, dɔn Eab nɔ ebul fɛn am, Eab go kil am; ɛn i dɔn de wɔship PAPA GƆD frɔm we in smɔl.

Rɛvɛleshɔn 4:2

Wantɛm, Gɔd in Spirit kam pan mi; na de a si wan ay chia we kiŋ kin sidɔm pan, a si sɔmbɔdi sidɔm pan am.

Apɔsul Dɛn Wok 8:39

Wɛn dɛn kɔmɔt insay di wata, di Masta in Spirit kɛr Filip go, di bigman we kɔmɔt Itio pia nɔ si Filip igen. Di bigman gladi wɛn i de go nain os.

Matyu 27:28

Dɛn pul in klos, dɔn dɛn wɛr dak rɛd klos pan am.

Rɛvɛleshɔn 18:12

nɔbɔdi nɔ go bay ɔl dɛn tin we dɛn de sɛl, lɛkɛ gold ɛn silva, dɛn shayn shayn ston ɛn fayn fayn bid; dɛn fayn fayn klos, rɛd wan ɛn mov wan, silk ɛn linin; ɛn dɛn wud we gɛt fayn sɛnt, dɛn tin we dɛn tek ɛlifant tit ɛn dia wud mek ɛn dɛn tin we dɛn tek bras ɔ ayɛn ɔ mabul mek;

Rɛvɛleshɔn 18:16

“Eya, oya! Da tɔŋ de we bin gɛt pawa, dɔn pwɛl, i bin tan lɛkɛ uman we drɛs wit fayn fayn linin, mov ɛn rɛd klos ɛn we kin tek gold ɛn dɛn shayn shayn ston ɛn fayn fayn bid drɛs insɛf!