Rɛvɛleshɔn 11:3 - Krio Fɔs Oli Baybul

³ A go sɛn tu pipul we go tɔk bɔt mi, dɛn go wɛr di kayn klos we pipul kin wɛr wɛn dɛn gɛt bɛrin, ɛn fɔ wan tawzin, tu ɔndrɛd ɛn siksti de, dɛn go tɛl pipul di mɛsej we Gɔd gi dɛn.”

Rɛvɛleshɔn 11:3 Referans Kwoze

Rɛvɛleshɔn 12:6

Di uman rɔnawe go na di dɛzat, na di say we Gɔd bin dɔn mek fɔ am, na de i go de fɔ wan tawzin, tu ɔndrɛd ɛn siksti de, ɛn pɔsin go de mɛn am.

Rɛvɛleshɔn 11:2

Bɔt nɔ mɛnshɔ di sɛkɛn opin ples we de rawnd Gɔd in Os bikɔs da ples de na fɔ dɛn pipul we nɔto Gɔd yon pipul, ɛn dɛn pipul de go mas Gɔd in tɔŋ ɔnda dɛn fut fɔ fɔti-tu mɔnt.

Rɛvɛleshɔn 13:5

Dɛn bin gri fɔ mek di wayl bif tɔk ɔl kayn bad tin bɔt Gɔd ɛn tɔk dɛn tin we sho se i prawd; ɛn dɛn bin gri fɔ mek i rul fɔ fɔti-tu mɔnt.

Ditarɔnɔmi 19:15

Mozis tɛl dɛn se wan witnɛs nɔto witnɛs, so dɛn nɔ fɔ se pɔsin gilti fɔ ɛnitin we dɛn se i du pas dɛn gɛt tu ɔ tri witnɛs.

Apɔsul Dɛn Wok 13:31

Jizɔs sho insɛf plɛnti tɛm to dɛn pipul we fala am kɔmɔt Galili go Jerusɛlɛm, ɛn dɛn pipul ya bin de tɛl ɔda pipul dɛn na Izrɛl bɔt am.

Apɔsul Dɛn Wok 1:8

Wɛn Gɔd in Spirit kam pan una, i go gi una pawa fɔ mek una tɔk bɔt mi na Jerusɛlɛm, na Judia, na Sameria ɛn ɔlɔbɔt na wɔl.”

Lyuk 24:48

Unasɛf dɔn si ɔl dɛn tin ya ɛn una fɔ tɛl ɔda pipul bɔt dɛn.

Ayzaya 22:12

Da de de, PAPA GƆD Ɔlmayti bin se ɔlman fɔ kray ɛn fil sɔri, fɔ krep ed ɛn wɛr saklɔth;

Jɛnɛsis 37:34

Jekɔb chɛr in yon klos we i bin wɛr, dɔn i wɛr munin. I munin fɔ in pikin fɔ lɔŋ.

2 Kɔrint 13:1

Na di tɔd tɛm dis we a de kam fɛn una. Dɛn rayt na Gɔd in Buk se, “If pɔsin se ɛnibɔdi du bad, tu ɔ tri pɔsin fɔ de we si.”

Apɔsul Dɛn Wok 2:32

Gɔd dɔn mek Jizɔs rayz frɔm di grev ɛn wi, we nain apɔsul dɛn de tɛl una bɔt wetin bin bi we wisɛf si.

Jɔn 15:27

Ɛn unasɛf go tɔk bɔt mi, bikɔs una dɔn de wit mi frɔm di tɛm we a bin bigin lan pipul.

Matyu 18:16

Bɔt if i nɔ gri se in du bad, kɛr wan ɔ tu Kristiɛn dɛn go mit am, so dat tu ɔ tri witnɛs go de fɔ no wetin yu tɛl am.

Lamɛnteshɔn 2:10

Di bigman dɛn na Jerusɛlɛm sidɔm na grɔn kwayɛt wan; dɛn dɔn put dɔst na dɛn ed ɛn dɔn wɛr saklɔth; di yɔŋgyal dɛn na Jerusɛlɛm dɔn butu dɛn ed na grɔn.

Job 16:15

Na munin klos go bi mi sɛkɛn bɔdi, a dɔn giv ɔp ɛn nɔ ebul du natin igen

1 Kronikuls 21:16

Devid es in yay ɛn in i si PAPA GƆD in enjɛl tinap midul di skay, ɛn i bin ol wan sɔd nain an we i tret oba Jerusɛlɛm. Nain Devid ɛn di bigman dɛn we bin wɛr saklɔth ɛn butu dɛn fes na grɔn.

Di Nɔmba Dɛm 11:26

Na dɛn siksti-et bin de de. Tu pan dɛn we na Ɛldad ɛn Medad bin lɛf na di kamp. Dɛn nɔ bin go na di Tɛnt. Pan ɔl dat, dɛnsɛf fil di Spirit ɛn bigin tɔk PAPA GƆD wɔd de na di kamp.

Rɛvɛleshɔn 19:10

Dɛn a fɔdɔm na di pɔsin, we de tɔk, in fut fɔ bigin prez am. Na de di pɔsin se, “Grap, nɔ du dat! Misɛf na Gɔd in savant lɛkɛ yu, ɛn misɛf na wan pan yu kɔmpin dɛn we bin biliv di tru wɔd we Jizɔs tɔk! Na Gɔd in fut yu fɔ fɔdɔm fɔ prez am!” Di tru wɔd we Jizɔs tɔk, nain dɛn prɔfɛt dɛnsɛf de tɔk.

Rɛvɛleshɔn 1:5

mek Jizɔs Krays insɛf, we wi kin trɔs, ɛn we de tɛl pipul wetin tru ɔltɛm, sho una aw i gud ɛn gi una kol at. Nain fɔs Gɔd mek rayz frɔm di grev. Ɔl dɛn wan we de rul na dis wɔl de ɔnda am. I lɛk wi ɛn i day fɔseka wi so dat i kin lus wi kɔmɔt pan di tay we wi sin tay wi,

Apɔsul Dɛn Wok 3:15

So, una kil Jizɔs we gɛt pawa fɔ gi tru layf, bɔt Gɔd mek i rayz frɔm di grev. Wi, we nain apɔsul dɛn, si Jizɔs wit wi yon yay afta i rayz frɔm di grev.

Daniɛl 12:7

Di man we bin wɛr linin klos we bin de ɔp say oba di watasay, es in rayt an ɛn lɛf an ɔp to ɛvin, ɛn a yɛri we i de swɛ wit di wan we nɔ de day in nem, se i go bi fɔ tri ɛn af ia. Dɔn i se, na wɛn di oli pipul dɛn pawa go dɔn, ɔl dɛn tin ya go dɔn bi.

Ditarɔnɔmi 17:6

Mozis se bifo dɛn ston pɔsin se i gilti ɔf sɔntin, tu ɔ tri witnɛs dɛn fɔ de fɔ pruv am. I se dɛn nɔ fɔ kil pɔsin we na waŋren witnɛs nɔmɔ de.

Rɛvɛleshɔn 20:4

Wɛn dat dɔn, a si dɛn chia we kiŋ kin sidɔm fɔ rul, ɛn a si dɛn wan we bin sidɔm pan dɛn. Sɔmbɔdi bin gi dɛn pawa fɔ jɔj ɔda pipul, ɛn igen a si dɛn spirit we kɔmɔt pan dɛn pipul we dɛn bin kil na wɔl bikɔs dɛn bin de tɔk se Jizɔs na dɛn Masta ɛn dɛn bin de tɛl pipul Gɔd in mɛsej. Dɛn pipul ya nɔ bin fɔdɔm bifo di wayl bif fɔ pre to am ɛn dɛn nɔ bin pre to di tin we dɛn mek fɔ tek mɛmba ɛn rɛspɛkt am, ɛn di wayl bif in mak nɔ bin de pan dɛn fɔrɛd ɔ pan dɛn an. Dɛn gɛt layf bak, dɔn dɛn rul wit Krays fɔ wan tawzin ia.

Lɛta Fɔ Ɛfisɔs 4:11

Nain bin mek wi sabi fɔ du difrɛn difrɛn wok. Sɔm pan di wok dɛn we i gi wi fɔ du na dɛn dɛn wan ya: I mek sɔm pan wi bi apɔsul; sɔm bi prɔfɛt; sɔm bi ivanjɛlist, dat na dɛn pipul we de tɛl ɔda pipul di Gud Nyuz bɔt Jizɔs Krays; sɔm bi pastɔ; ɛn sɔm bi ticha.

1 Kɔrint 12:28

Na so i bi na di chɔch: fɔs, Gɔd put dɛn apɔsul; sɛkɛn, dɛn prɔfɛt; tɔd, dɛn ticha; dɛn i put dɛn wan we de du wɔndaful wok bay in pawa; afta dɛn i put dɛn wan we i gi pawa fɔ mɛn sik pipul; dɛn i put dɛn wan we i gi pawa fɔ ɛp ɔda pipul; dɛn wan we i gi pawa fɔ tɛl pipul wetin dɛn fɔ du; ɛn dɛn wan we i gi pawa fɔ tɔk dɛn laŋwej we dɛnsɛf nɔ ɔndastand.

Jɔn 3:27

Jɔn tɛl dɛn se, “Natin lɛkɛ dis nɔ de bi to pɔsin pas Gɔd mek i bi.

2 Samiɛl 3:31

Devid tɛl Joab ɛn ɔl di sojaman dɛn wit am fɔ chɛr chɛr dɛn klos ɛn wɛr saklɔth waka bifo di dedebɔdi we dɛn de go bɛr am fɔ sho se dɛn sɔri. Kiŋ Devid insɛf bin de biɛn di bɛrin.

1 Kiŋ 21:27

Wɛn Eab yɛri wetin Ilayja tɔk, i chɛr in klos, wɛr saklɔth ɛn fast. Na di saklɔth in bin de slip wit. Wɛn i kin de waka na so i kin luk ɔmbul.

2 Kiŋ 19:1

Wɛn Kiŋ Ɛzikaya yɛri wetin di man dɛn se, i chɛr in klos ɛn wɛr saklɔth, dɔn i go insay PAPA GƆD in os.

Nɛimaya 9:1

Di de we mek twɛnti-fo, na di sem mɔnt, di pipul dɛn gɛda bak. Dis tɛm, dɛn bin de fast ɛn wɛr saklɔth ɛn kɔba dɛnsɛf wit dɔst.

Di Sam Dɛm 69:11

Wɛn a wɛr saklɔth, pipul de laf mi.

Jɛrimaya 1:10

Tide, a dɔn put yu oba neshɔn ɛn kindɔm dɛm, fɔ pik kɔmɔt ɛn fɔ brokdɔŋ, fɔ pwɛl ɛn fɔ kapsay fɔ bil ɛn fɔ plant.”

Izikɛl 4:6

Ɛn wɛn yu dɔn dɔn di tri ɔndrɛd ɛn naynti dez na yu lɛf say yu go lidɔm sɛkɛn tɛm, bɔt naw na yu rayt say, ɛn sɔfa fɔ Juda dɛn pɔnishmɛnt; na fɔti de a de gi yu, ɛn na wande fɔ wan ia.

Daniɛl 7:25

I go tɔk bad tin bɔt PAPA GƆD we ay pas ɔl, ɛn i go mɔna dɛn wan dɛn we biliv pan PAPA GƆD ɛn i go tink fɔ chenj aw tin tan, ɛn di lɔ; ɛn i go gɛt di pawa fɔ tri ɛn di af ia.

Daniɛl 8:14

Ɛn i ansa am se, “Fɔ wan tawzin, wan ɔndrɛd ɛn fifti dez, di ples we dɛn de pre go kam bak to di rayt we, aw i bin tan bifo.’

Joɛl 1:13

I se di man dɛn we de mek sakrifays fɔ pipul sin fɔ sɔri ɛn wɛr saklɔth fɔ sho se dɛn sɔri, dɛn fɔ kray as pipul we de sav na di ɔlta. I se dɛn fɔ go insay PAPA GƆD in os wɛr saklɔth fɔ slip. Dɛn we de wok fɔ PAPA GƆD! Bikɔs pipul nɔ ebul mek di gren ɛn drink ɔfrin igen na dɛn PAPA GƆD in os.

Jona 3:5

We i prich, di pipul dɛn na Ninivɛ biliv PAPA GƆD in wɔd; dɔn ɔlman, frɔm big to smɔl, wɛr munin klos fɔ sho aw dɛn sɔri ɛn dɛn ɔl gri se dɛn fɔ fast.

Jona 3:8

bɔt dɛn ɔl fɔ wɛr munin klos ɛn dɛn fɔ beg PAPA GƆD gud, ɛn di mɔtalman dɛn fɔ lɛf fɔ du bad ɛn lɛf fɔ fɛt ɛn wund ɛn chuk pɔsin.

Matyu 11:21

I se, “Bad tin go mit una ɔl we de na Kora zin ɛn Bɛtsayda. If pɔsin bin du dɛn wɔndaful wok we a bin du na una ples, na Taya ɛn Saydɔn, di pipul dɛn we lib de bin fɔ dɔn lɛf fɔ du bad lɔntɛm, ɛn dɛn bin fɔ wɛr bag ɛn rɔb asis pan dɛnsɛf, fɔ sho se dɛn dɔn lɛf fɔ du bad!

Lyuk 10:13

“Bad tin go mit una ɔl we de na Kora zin ɛn Bɛtsayda. If pɔsin bin du dɛn wɔndaful wok we a bin du fɔ una, na Taya ɛn Saydɔn, dɛn pipul de bin fɔ dɔn lɛf fɔ du bad lɔntɛm; dɛn bin fɔ wɛr bag ɛn rɔb asis na dɛn bɔdi fɔ mek ɔlman no se dɛn dɔn lɛf fɔ du bad.

Rɛvɛleshɔn 11:6

Dɛn gɛt pawa fɔ ol di ren mek i nɔ fɔdɔm di tɛm we dɛn de tɛl pipul di mɛsej we Gɔd sɛn. Ɛn igen, dɛn gɛt pawa fɔ mek wata we bɔs na grɔn tɔn blɔd; dɛn gɛt pawa fɔ sɛn ɛni kayn bad bad tin kam na di wɔl, ɛnitɛm we dɛn lɛk.