Rɛvɛleshɔn 1:1 - Krio Fɔs Oli Baybul

¹ Insay dis buk dɛn rayt dɛn tin we Jizɔs Krays sho dɛn pipul we de du Gɔd wok. Na Gɔd fɔs sho Jizɔs Krays dɛn tin ya, so dat i kin mek dɛn wan we de du in wok no dɛn tin we mɔs bi. I sɛn in enjɛl go mit Jɔn we bin de wok fɔ am fɔ mek di enjɛl sho Jɔn dɛn tin ya.

Rɛvɛleshɔn 1:1 Referans Kwoze

Rɛvɛleshɔn 22:16

“Mi, Jizɔs dɔn sɛn mi enjɛl go tɛl una dɛn tin ya fɔ mek una tɛl dɛn Kristiɛn na dɛn chɔch. Mi na wan pan Devid in grampikin pikin dɛm ɛn mi na di mɔnin sta we de shayn brayt.”

Rɛvɛleshɔn 22:6

Dɛn di enjɛl se, “Dɛn wɔd ya na tru ɛn pipul fɔ biliv dɛn. Gɔd, wi Masta, we gi di prɔfɛt dɛn pawa fɔ tɔk in mɛsej, nain sɛn in enjɛl fɔ kam sho dɛn wan we de waka wit am dɛn tin we gɛt fɔ bi, i nɔ go te igen.”

Lɛta Fɔ Galeshya 1:12

Nɔto pɔsin tɛl mi di Gud Nyuz ɛn nɔto pɔsin lan mi bɔt di Gud Nyuz. Na Jizɔs Krays insɛf sɛf mek a ɔndastand di Gud Nyuz.

Emɔs 3:7

PAPA GƆD we na GƆD, nɔ de wande du sɔntin we i nɔ de tɛl in savant dɛn we na prɔfɛt.

Lɛta Fɔ Ɛfisɔs 3:3

Gɔd dɔn sho mi di plan we i bin ayd. A bin dɔn rayt una lili bit bɔt dat.

Rɛvɛleshɔn 1:19

Rayt ɔl dɛn tin ya we yu dɔn si na buk dɛn tin we de bi naw ɛn dɛn tin we go bi bambay.

Daniɛl 9:23

Di tɛm we yu bin bigin beg PAPA GƆD, wɔd bin kɔmɔt, ɛn a kam fɔ tɛl yu wetin dɛn se, bikɔs ɔlman lɛk yu; so, tink bɔt wetin a go tɛl yu ɛn ɔndastand di vishɔn.

Rɛvɛleshɔn 1:9

Mi we de rayt dis buk na Jɔn, una brɔda, we wi ɔl de fala Jizɔs. Wi ɔl tinap traŋa pan ɔl di sɔfa we wi de sɔfa bikɔs wi tek Jizɔs Krays fɔ wi Kiŋ. Dɛn bin kɛr mi go lɛf mi na wan ples we dɛn kɔl Patmɔs we de midul wata, bikɔs a bin de tɛl pipul di mɛsej we Gɔd sɛn, we Jizɔs insɛf se na tru.

Jɔn 3:32

Di wan we kɔmɔt ɛvin de tɔk bɔt wetin i dɔn si ɛn yɛri; pan ɔl dat nɔbɔdi nɔ de put at pan wetin i de tɔk.

Daniɛl 9:21

We a bin de pre, di man we nem Gebrɛl, we a bin dɔn si insay di fɔs vishɔn, bin flay kam usay a bin de, wit spid. Dat apin di tɛm we wi kin mek di ivintɛm sakrifays.

Jɔn 15:15

A nɔ de kɔl una bɔy igen, bikɔs bɔy nɔ no wetin in masta de du, bɔt a de kɔl una mi padi dɛn, bikɔs a dɔn tɛl una ɔl wetin mi Papa dɔn tɛl mi.

Daniɛl 8:16

Ɛn a yɛri wan man vɔys de kɔmɔt bitwin di tu say dɛn pan di riva Ulay ɛn de kɔl se, “Gebrɛl, sho dis man mek i ɔndastand wetin di vishɔn min.”

Di Sam Dɛm 25:14

Na udat gɛt rɛspɛkt fɔ PAPA GƆD i de tɛl in sikrit, ɛn mek dɛn no se i nɔ gɛt fɔ chenj in Kɔvinant.

Rɛvɛleshɔn 4:1

Wɛn dat dɔn dɔn a si ɔda tin; a si do opin na ɛvin: a yɛri di vɔys bak we bin sawnd lɛkɛ trɔmpɛt de tɔk to mi. Di vɔys se, “Kam ɔp ya, so dat a kin sho yu dɛn tin we mɔs apin bambay.”

Jɔn 12:49

Na so i bi, bikɔs a nɔ jɛs de tɔk wetin mi want tɔk, na mi Papa we sɛn mi tɛl mi wetin a fɔ tɔk.

Jɔn 8:26

A gɛt plɛnti tin fɔ tɔk bɔt una, ɛn plɛnti tin fɔ kɔndɛm una fɔ. Bɔt di wan we sɛn mi, tru, ɛn a go jɛs tɛl dɛn pipul na wɔl wetin i tɛl mi.”

Rɛvɛleshɔn 21:2

Dɛn a si Gɔd in tɔŋ, we dɛn kɔl, nyu Jerusɛlɛm, i bin de kɔmɔt to Gɔd na ɛvin kam dɔŋ, dɛn bin dɔn mek am fayn fayn rɛdi, lɛkɛ uman we jɛs mared we dɔn drɛs de wet fɔ go to in man.

Lɛta Fɔ Rom 16:25

Una lɛ wi prez Gɔd! Gɔd ebul mek una stil biliv traŋa wan lɛkɛ aw di Gud Nyuz bɔt Jizɔs Krays we a bin dɔn tɛl una mek una biliv; ɛn di Gud Nyuz bɔt Jizɔs Krays na di tru tin we Gɔd bin ayd frɔm we di wɔl bigin.

Jɔn 17:8

A dɔn tɛl dɛn ɔl wetin yu tɛl mi fɔ tɛl dɛn, ɛn dɛn lisin. Dɛn no se na to yu a kɔmɔt, fɔ tru, ɛn dɛn biliv se na yu sɛn mi kam na wɔl.

Taytɔs 1:1

Na mi, Pɔl, we na Gɔd in savant ɛn Jizɔs Krays in apɔsul, de rayt dis lɛta. Gɔd pik mi ɛn sɛn mi to in pipul dɛn we i dɔn pik fɔ mek a ɛp dɛn fɔ biliv pan am, ɛn fɔ no fɔ tru wetin Gɔd want fɔ mɔtalman, we wi bin de lan pipul,

Rɛvɛleshɔn 5:7

A si di Ship waka go tek di pepa we rol kɔmɔt na di Pɔsin we sidɔm pan di ay chia, in raytan.

Rɛvɛleshɔn 17:1

Wɛn ɔl dat dɔn, wan pan di sɛvin enjɛl dɛn we bin ol wan pan di sɛvin kɔp dɛn, kam tɔk to mi, i se, “Kam, mek a go sho yu aw dɛn go pɔnish da uman we liv fri layf we ɔlman no; di uman na da tɔŋ we dɛn bil klos dɛn plɛnti riva.

Rɛvɛleshɔn 19:9

Di enjɛl tɔk to mi, i se, “Rayt dis tin ya: Blɛsin de pan dɛn wan we dɛn kɔl fɔ go it na di Ship in mared.” I tɛl mi se, “Dɛn wɔd ya na di tru wɔd dɛn we Gɔd tɔk.”

Rɛvɛleshɔn 19:10

Dɛn a fɔdɔm na di pɔsin, we de tɔk, in fut fɔ bigin prez am. Na de di pɔsin se, “Grap, nɔ du dat! Misɛf na Gɔd in savant lɛkɛ yu, ɛn misɛf na wan pan yu kɔmpin dɛn we bin biliv di tru wɔd we Jizɔs tɔk! Na Gɔd in fut yu fɔ fɔdɔm fɔ prez am!” Di tru wɔd we Jizɔs tɔk, nain dɛn prɔfɛt dɛnsɛf de tɔk.

Rɛvɛleshɔn 21:9

Wan pan dɛn sɛvin enjɛl dɛn we bin gɛt dɛn sɛvin kɔp we dɛn sɛvin bad bad tin dɛn we bin gɛt fɔ fɔdɔm pan di wɔl bifo di wɔl dɔn, bin de insay, kam tɔk to mi, i se, “Kam mek a sho yu di Ship in yawo.”

Rɛvɛleshɔn 22:1

Di enjɛl tek mi igen go sho mi di riva we di wata we de gi layf bin de rɔn, i bin de shayn lɛkɛ glas. I bɔs kɔmɔt na di chia we Gɔd ɛn di Ship we de rul, kin sidɔm.

Rɛvɛleshɔn 22:8

Mi Jɔn, dɔn yɛri ɔl dɛn tin ya ɛn a dɔn si dɛn wit mi yay. Di tɛm we a yɛri ɛn si dɛn, a fɔdɔm na di enjɛl in fut we sho mi dɛn tin ya, fɔ pre to am.

Rɛvɛleshɔn 22:9

Bɔt i se, “Nɔ du dat! Misɛf de wok fɔ Gɔd lɛkɛ aw yu de wok fɔ am, ɛn lɛkɛ yu kɔmpin dɛn we na prɔfɛt ɛn ɔl dɛn wan we de du dɛn tin we rayt na dis buk. Na Gɔd in fut yu fɔ fɔdɔm fɔ prez am!”