Di Nɔmba Dɛm 5:18 - Krio Fɔs Oli Baybul

¹⁸ Afta we i bin dɔn put di uman fɔ tinap bifo PAPA GƆD, i fɔ lus in ia ɛn gi am da siks kɔp bali we in man bin briŋ kam, fɔ sho se i de jɛlɔs, fɔ ol. Dɔn in di man we de mek sakrifays fɔ pipul sin fɔ ol di wata we i wan tek fɔ swɛ.

Di Nɔmba Dɛm 5:18 Referans Kwoze

Di Ibru Pipul Dɛn 13:4

Mek ɔlman rɛspɛkt mared layf, di man we mared nɔ fɔ gɛt ɔda uman ɛn di wɛf nɔ fɔ gɛt ɔda man. Una mɛmba se Gɔd go jɔj dɛn wan we liv fri layf, ɛn i go jɔj ɛni mared uman we kip ɔda man ɛn ɛni mared man we kip ɔda uman.

1 Kɔrint 11:6

If di uman nɔ want kɔba in ed, mek i kɔt in ia. Na shem fɔ mek uman shayn in ed ɔ kɔt in ia, so i fɔ kɔba in ed.

Jɛrimaya 2:19

PAPA GƆD Ɔlmayti se, una wikɛdnɛs go pɔnish una, ɛn di fɔsek we una fɔsek mi go jɔj una. Una no ɛn si se na bad bad ɛn bita tin fɔ una fɔ fɔsek PAPA GƆD we na una Gɔd; una nɔ rɛspɛkt mi wan.

Ayzaya 38:17

Yɛs, na bin fɔ mi yon bɛtɛ na dat mek mi at pwɛl bad bad wan; Bɔt yu dɔn briŋ mi layf kam bak mek i nɔ go na ɛl, Bikɔs yu dɔn put mi sin dɛn ɔl biɛn mi.

Ɛkliziastis 7:26

Di tin we a fred pas day na uman we na trap, uman we in at na trap ɛn nɛt, ɛn de fɔ grip ɔltin. Na pɔsin we de du wetin PAPA GƆD want nɔmɔ, in trap nɔ go kech, bɔt i go kech sina izi wan.

Prɔvabs 5:4

bɔt wɛn i chenj pan yu, i go bita lɛk rut ɔ shap lɛk nɛf we dɛn jɛs shap.

1 Samiɛl 15:32

Dɛn Samiɛl se fɔ pul Egag, di Amalɛkayt dɛn kiŋ na do. Egag insɛf waka go mit am. I bin de tink se day dɔn pas oba in ed.

Ditarɔnɔmi 29:18

Mozis advays di Izrɛlayt dɛn fɔ tek tɛm lɛ nɔn pan di man dɛn, ɔl di uman dɛn, ɔl di famili dɛn ɛn ɔl di fambul dɛn, nɔ go bigin de wɔship dɛn ɔda neshɔn dɛn gɔd, lɛ dɛn nɔ go tan lɛk tik we gɛt rut, bɔt de bia frut we bita ɛn gɛt pɔyzin,

Di Nɔmba Dɛm 5:22

Lɛ dis wata we yu de drink so briŋ di swɛ kam pan yu. Dɔn di uman go se “A gri fɔ wetin go bi.

Di Nɔmba Dɛm 5:17

Dɔn i fɔ tek sɔm oli wata kɔmɔt na wan kle jɔg, put dɔst we kɔmɔt na di tɛnt in grɔn insay di wata.

Di Nɔmba Dɛm 5:15

di man ɛn in wɛf dɛn fɔ go to di man we de mek sakrifays fɔ pipul sin. Di man fɔ kɛr lɛkɛ siks kɔp bali to di man we de mek sakrifays fɔ pipul sin fɔ in wɛf. In ɔf insɛf nɔ fɔ put ɔyl ɔ insɛns pan am bikɔs na sakrifays we i de mek bikɔs i de jɛlɔs ɛn want fɔ fɛnɔt if di uman gilti.

Lɛvitikɔs 13:45

Di man we gɛt di bad sik go wɛr chɛr chɛr klos fɔ sho se i nɔ gladi ɛn lɛf in ia chakachaka wan nain ed ɛn kɔba af in fes de ala se, “Una gi rod! A nɔ klin na PAPA GƆD yay!”

1 Kɔrint 11:15

bɔt lɔŋ ia de mek uman gɛt rɛspɛkt. Gɔd gi am lɔŋ ia fɔ kɔba in ed.

Di Nɔmba Dɛm 5:19

PAPA GƆD se di man we de mek sakrifays fɔ pipul sin, fɔ tɛl di uman fɔ swɛ. I fɔ se “If yu nɔ lɛf yu mared man wande go to ɔda man we go gɛt biznɛs wit yu, mek dis bita wata we yu de drink nɔ du yu natin.