Di Nɔmba Dɛm 12:6 - Krio Fɔs Oli Baybul

⁶ i se, “Una lisin to mi gud. Na bay vishɔn a de sho misɛf to ɛni PAPA GƆD in prɔfɛt dɛn, dɔn a de tɔk to dɛn pan drim.

Di Nɔmba Dɛm 12:6 Referans Kwoze

1 Kiŋ 3:5

Na Gibiɔn i bin de wan nɛt we PAPA GƆD tɔk to am na drim se lɛ i aks am fɔ ɛnitin we i want, in go gi am.

Jɛnɛsis 46:2

PAPA GƆD tɔk to am da nɛt de na vishɔn. I kɔl am “Jekɔb, Jekɔb!” Dɛn Jekɔb ansa se, “Yɛs sa.”

Lyuk 1:22

Wɛn i kam na do, i nɔ bin ebul fɔ tɔk to di pipul dɛn, na dat dɛn tek no se i si sɔntin insay Gɔd in Os. I nɔ ebul tɔk wan wɔd sɛf, i bin jɛs de mek sayn wit in an.

Lyuk 1:11

Wantɛm, Zakaraya si enjɛl bifo am na di raytan say na di ples, we i de bɔn di insɛns.

Daniɛl 10:8

So na mi waŋren bin lɛf ɛn si dis big big vishɔn, ɛn a bin wik bad bad wan ɛn mi fes we bin de shayn brayt wan bin chenj bad bad wan, ɛn ɔl mi bɔdi bin wik.

Izikɛl 1:1

Di ia we mek tati, insay di nɔmba fo mɔnt ɛn di de we mek fayv, as a bin de wit di wan dɛn we bin de na ɛgzayl, nia Riva Chɛba, di klawd bin opin ɛn a si bɔku vishɔn bɔt PAPA GƆD.

Apɔsul Dɛn Wok 10:11

Aw Pita sɛt in yay, na de i si ɛvin opin ɛn sɔntin we fiba big bedshit de kam dɔŋ te i rich na grɔn.

Matyu 1:20

Wɛn Josɛf bin de tink bɔt wetin i go du, nain Gɔd sɛn enjɛl kam to am na drim. Di enjɛl se, “Josɛf, yu we na Kiŋ Devid in grampikin pikin nɔ fred fɔ mared Meri, bikɔs na Gɔd in Spirit kam pan am we i gɛt bɛlɛ.

Daniɛl 8:2

Insay di vishɔn, we a luk, a bin de na Susa, di kapital siti we de na Ɛlam prɔvins; ɛn a si misɛf insay di vishɔn se a de na di riva Ulay

Matyu 2:19

Afta Kiŋ Ɛrɔd day, Gɔd sɛn enjɛl na drim to Josɛf wɛn i bin de na Ijipt.

Daniɛl 7:1

Di fɔs ia we Bɛlshaza, Babilɔn dɛn kiŋ bin de na pawa, Daniɛl bin drim ɛn si vishɔn we i bin lidɔm nain bed. So i rayt dɔn di drim ɛn tɔk ɔl wetin i si.

Jɛrimaya 23:28

PAPA GƆD se, Lɛ di prɔfɛt we drim, tɔk bɔt di drim, bɔt lɛ di wan we gɛt mi wɔd, prich mi wɔd wit ɔl in at. Ɛnitin de pan strɔ we mek in ɛn wit fiba?

Di Sam Dɛm 105:15

I kin se “Nɔ tɔch di Kiŋ ɔ di prɔfɛt we a pik fɔ tɔk fɔ mi; nɔ du bad to ɛniwan pan dɛn.”

Di Sam Dɛm 89:19

Wan tɛm, PAPA GƆD apia na vishɔn to in pipul we de du wetin i se ɛn tɛl dɛn se, in dɔn gi wan yɔŋman we de fɛt, ɛkstra trɛnk, ɛn pik am fɔ de pantap in pipul.

Job 33:15

Na drim ɔ vishɔn na nɛt, we mɔtalman dɔn slip dip, we dɛn de slip na dɛn bed,

Job 4:13

We a kin tink bɔt di drim we a kin drim na nɛt we mɔtalman kin slip dip,

Ɛksodɔs 7:1

PAPA GƆD tɛl Mozis se, “A go mek yu lɛkɛ PAPA GƆD to di kiŋ. Yu brɔda Erɔn go bi yu prɔfɛt ɛn i go de tɔk fɔ yu.

Jɛnɛsis 20:7

So naw, sɛn di uman go bak to in man. Na prɔfɛt, i go pre fɔ yu, ɛn yu nɔ go day. Mek a wɔn yu. If yu nɔ sɛn am go bak, no se yu wangren nɔ go day, yu ɛn ɔl yu pipul dɛn go day.”

Jɛnɛsis 15:1

Afta ɔl wetin bin dɔn apin, PAPA GƆD apia to Ebram na vishɔn. I tɛl am se, “Nɔ fred, Ebram. A go kɔba yu ɛn a go gi yu ɔlkayn gud tin.”

Rɛvɛleshɔn 11:10

Di pipul dɛn na wɔl go gladi we dɛn tu pipul ya day. Dɛn go mek pati ɛn dash dɛn kɔmpin bikɔs dɛn tu prɔfɛt ya bin de tɛl pipul Gɔd in mɛsej we bin de tɔmɛnt dɛn.

Rɛvɛleshɔn 11:3

A go sɛn tu pipul we go tɔk bɔt mi, dɛn go wɛr di kayn klos we pipul kin wɛr wɛn dɛn gɛt bɛrin, ɛn fɔ wan tawzin, tu ɔndrɛd ɛn siksti de, dɛn go tɛl pipul di mɛsej we Gɔd gi dɛn.”

Lɛta Fɔ Ɛfisɔs 4:11

Nain bin mek wi sabi fɔ du difrɛn difrɛn wok. Sɔm pan di wok dɛn we i gi wi fɔ du na dɛn dɛn wan ya: I mek sɔm pan wi bi apɔsul; sɔm bi prɔfɛt; sɔm bi ivanjɛlist, dat na dɛn pipul we de tɛl ɔda pipul di Gud Nyuz bɔt Jizɔs Krays; sɔm bi pastɔ; ɛn sɔm bi ticha.

Apɔsul Dɛn Wok 10:17

Di tin we Pita si mek i wɔnda ɛn i bin want no wetin dat min. Da sem tɛm de, dɛn pipul we Kɔnilyɔs sɛn bin dɔn rich na di os we Saymɔn Pita de ɛn dɛn bin tinap na di get.

Lyuk 20:6

If wi se, ‘Na mɔtalman sɛn am’ ɔl di pipul dɛn go ston wi bikɔs dɛn biliv se Jɔn na bin prɔfɛt.”

Matyu 23:37

“Jerusɛlɛm, Jerusɛlɛm, oya, oya, una de kil dɛn prɔfɛt ɛn ston dɛn mɛsenja we Gɔd sɛn to una! Plɛnti tɛm a kin want gɛda una rawnd mi, lɛkɛ aw kombra fɔl de gɛda in pikin dɛn ɔnda in fɛda, bɔt una nɔba gri!

Matyu 23:34

Na dat mek a go sɛn prɔfɛt, sɛnsman, ɛn ticha dɛn kam to una. Una go kil sɔm, nel sɔm pan krɔs, bit sɔm na di Ju mitin os dɛn, ɛn mek sɔm sɔfa frɔm wan tɔŋ to ɔda tɔŋ.

Matyu 23:31

So una gri se una na dɛn wan we bin kil dɛn prɔfɛt, dɛn grampikin pikin dɛm.

Matyu 27:19

Wɛn Paylet sidɔm na di chia fɔ jɔj Jizɔs, Paylet in wɛf sɛn tɛl am se, “Nɔ gɛt natin fɔ du wit dis man we de waka tret, bikɔs las nɛt di drim we a drim bɔt am bin wɔri mi tumɔs.”

Di Ibru Pipul Dɛn 1:1

Fɔstɛm, Gɔd bin de tɔk to wi grampapa papa dɛn, plɛnti tɛm, ɛn i bin de yus difrɛn difrɛn we. Nain prɔfɛt dɛn i bin de sɛn fɔ tɛl wi grampapa papa dɛn in wɔd.

Jɛnɛsis 28:12

We i de slip, i drim i si ay ay stɛp kɔmɔt na grɔn te rich ɔp na ɛvin, ɛn i si enjɛl dɛn de go ɔp ɛn dɔŋ di stɛp.

Di Nɔmba Dɛm 24:4

Na pɔsin we de yɛri wetin PAPA GƆD de se de tɔk dis mɛsej, pɔsin we kin si aw PAPA GƆD Ɔlmayti want mek i si, pɔsin we de lidɔm na grɔn bifo PAPA GƆD ɛn we PAPA GƆD de opin in yay:

1 Samiɛl 3:15

Samiɛl lidɔm te mɔnin we i grap opin di do dɛn na PAPA GƆD in os. I bin de fred fɔ tɛl Ilaɛl bɔt di vishɔn,

1 Samiɛl 28:6

I aks PAPA GƆD wetin go bi bɔt PAPA GƆD nɔ ansa am. I nɔ yɛri PAPA GƆD in ansa na drim, we i yuz di Yurim ɛn Thumim ɛn di prɔfɛt dɛnsɛf nɔ se natin to am.

1 Kiŋ 3:15

Wɛn Sɔlɔmɔn wek na da tɛm de i no se na drim i bin de drim. I go na Jerusɛlɛm ɛn tinap bifo PAPA GƆD in Kɔvinant Bɔks ɛn mek animal ɛn pis sakrifays; dɔn i mek pati fɔ ɔl in ɔfisa dɛn.

Jɛrimaya 23:25

A dɔn yɛri wetin di prɔfɛt dɛm we de tek mi nem prɔfisay lay lay prɔfisay, se, we dɛn de se, ‘A drim, A drim!

Daniɛl 2:19

Nain PAPA GƆD sho Daniɛl di mistri pan vishɔn na nɛt. So Daniɛl blɛs PAPA GƆD we de na ɛvin.

Jɛnɛsis 28:16

Jekɔb skyad wek na di drim ɛn se, “So PAPA GƆD de na dis ples ɛn a nɔ no natin!”

Jɛnɛsis 37:5

Wan nɛt Josɛf drim, ɛn i tɛl in brɔda dɛn di drim, dat mek dɛn et am mɔ ɛn mɔ.

Jɛnɛsis 37:9

Afta dat Josɛf bin drim ɔda drim bak we i tɛl in brɔda dɛn. I se, i gɛt ɔda drim, ɛn insay dis drim i si di san, di mun, ɛn ilɛvin sta dɛn baw to am.

Ditarɔnɔmi 18:15

Mozis se PAPA GƆD we na dɛn PAPA GƆD go mek wan pan dɛn bi prɔfɛt, ɛn dɛn fɔ lisin to am ɛn du ɔl wetin i go tɛl dɛn fɔ du.

Ditarɔnɔmi 18:18

Mozis tɛl di Izrɛlayt dɛn se PAPA GƆD se in go mek wan pan dɛn bi prɔfɛt fɔ de tɛl dɛn wetin in se, ɛn na wetin in tɛl am fɔ tɔk i go tɔk,

1 Samiɛl 3:21

PAPA GƆD kɔntinyu fɔ apia to Samiɛl na Shaylɔ ɛn mek Samiɛl no mɔ bɔt am aw i de rid in wɔd.

2 Samiɛl 7:4

Bɔt da sem nɛt de PAPA GƆD tɔk to Nethan.

Ozie 12:11

I se if di pipul na Giliad de pan sin, dɛn go pe dia wan fɔ dat; if dɛn de mek sakrifays to ɔda gɔd dɛn na Giliad, i se, i go nyamanyama dɛn ɔlta dɛn we de na dɛn fil dɛn we dɛn dɔn mek fayn.

Joɛl 3:1

PAPA GƆD se we da tɛm de rich we i go gi Juda ɛn Jerusɛlɛm dɛn prɔpati dɛn bak,

Zɛkaraya 1:8

I se, wande na nɛt, wantɛm wantɛm, in si wan man we bin de rayd rɛd ɔs. Di man bin de midul sɔm bush bush dɛn na di vali; dɔn rɛd, ɛn sɔntin lɛk grin ɛn wayt ɔs dɛn bin de biɛn am.