Matyu 8:16 - Krio Fɔs Oli Baybul

¹⁶ Da ivintɛm de, plɛnti pipul briŋ dɛn wan we bin gɛt dɛbul insay dɛn kam to Jizɔs. Jizɔs drɛb di dɛbul dɛn wit di wɔd we i tɔk, ɛn i mɛn ɔl di wan dɛn we bin sik.

Matyu 8:16 Referans Kwoze

Ɛksodɔs 15:26

I tɛl dɛn se, “If nɔmɔ una du wetin mi PAPA GƆD we na una PAPA GƆD we no wetin rayt bifo mi yay tɛl una fɔ du; dɔn una kip ɔl mi kɔmandmɛnt ɛn ɔda lɔ dɛn, a nɔ go pɔnish una wit ɛniwan pan dɛn sik dɛn we a bin put pan di Ijipshian dɛn. Mi na PAPA GƆD, a nɔ go mek una sɔfa.”

Lyuk 4:40

Da sem de de, ivintɛm, dɛn bin briŋ pipul we bin gɛt ɔl kayn sik kam to Jizɔs. I le in an pan ɔl di sik pipul dɛn ed, wan bay wan, ɛn dɛn ɔl wɛl.

Matyu 14:14

As Jizɔs kɔmɔt na di bot go na di sho, i mit plɛnti pipul; i sɔri fɔ dɛn ɛn mɛn di sik wan dɛn.

Apɔsul Dɛn Wok 5:15

Wɛn dɛn si di wɔndaful tin dɛn we di apɔsul dɛn bin de du, pipul kɛr dɛn sik pipul go na trit ɛn mek dɛn ledɔm na dɛn bed, so dat we Pita de pas, in shado go go pan sɔm di sik pipul dɛn ɛn mek dɛn wɛl.

Mak 5:8

Di man tɔk dat bikɔs Jizɔs tɛl di dɛbul fɔ kɔmɔt insay di man.

Matyu 12:22

Sɔm pipul dɛn briŋ wan blɛnyay ɛn mumu man kam mit Jizɔs. Di man bin blɛn ɛn na bin mumu bikɔs dɛbul bin de insay am. Jizɔs mɛn am ɛn di man ebul fɔ tɔk ɛn si.

Mak 2:3

Wɛn i de tɔk, nain sɔm pipul briŋ wan man we paralayz. Na fo man dɛn bin tot am fɔ kɛr am go to Jizɔs.

Matyu 9:2

Sɔm pipul kɛr wan man we paralayz go mit am, di man bin ledɔm na mata. Wɛn Jizɔs si se dɛn biliv se in go mɛn di man, i se, “Mi pikin, nɔ mek yu at pwɛl; Gɔd dɔn padin yu sin dɛn.”

Mak 9:25

Wɛn Jizɔs si se mɔ ɛn mɔ pipul de rɔn kam gɛda rawnd dɛn, i tɔk pan di dɛbul; i se, “Yu dɛbul we de mek pɔsin tɔn mumu, ɛn mek pɔsin dɛf, a de tɛl yu fɔ kɔmɔt insay dis bɔbɔ, ɛn nɔ fɔ go insay am igen!”

Matyu 8:33

Di man dɛn we bin de mɛn di ɔg dɛn rɔn go na di tɔŋ, ɛn tɛl di pipul dɛn ɔl wetin bi to di tu man dɛn we dɛbul bin de insay.

Matyu 8:15

Jizɔs tɔch di uman in an, di uman wɛl wantɛm, i grap go fɛn sɔntin fɔ Jizɔs fɔ it.

Lyuk 4:41

Dɛbul dɛn bin kɔmɔt pan plɛnti pipul ɛn ala se, “Fɔ tru, yu na Gɔd in Pikin.” Jizɔs tɔk pan di dɛbul dɛn fɔ mek dɛn sɛt mɔt ɛn i nɔ gri mek dɛn tɔk natin, bikɔs dɛn bin no se in na di Mɛsaya.

Lyuk 13:12

Wɛn Jizɔs si di uman, i kɔl am ɛn tɛl am se, “Uman, frɔm tide yu dɔn wɛl!”