Mak 6:11 - Krio Fɔs Oli Baybul

¹¹ If una go na ɛni tɔŋ we di pipul dɛn nɔ rɛspɛkt una ɛn dɛn nɔ gri yɛri wetin una de tɛl dɛn; bifo una kɔmɔt de, una fɔ shek di dɔti we de ɔnda una fut, fɔ sho se di pipul dɛn dɔn du bad.”

Mak 6:11 Referans Kwoze

Apɔsul Dɛn Wok 18:6

Di pipul dɛn nɔ bin gri tek wetin Pɔl tɛl dɛn ɛn dɛn bin de tɔk bad bɔt am, so Pɔl shek in klos pan dɛn fɔ sho se in nɔ gri wit dɛn. I tɛl dɛn se, “Una fɔ blem unasɛf fɔ wetin go bi to una if Gɔd kɔndɛm una! Nɔto mi go gɛt di blem; frɔm tide a de lɛf una; a de go tɛl dɛn pipul we nɔto Ju bɔt Gɔd.”

Nɛimaya 5:13

We dɛn tɔk so, a sɛn kɔl ɔl dɛn man we de mek sakrifays fɔ pipul sin ɛn mek ɔl di aristo ɛn bigman dɛn swɛ se dɛn go du ɔl wetin dɛn prɔmis. A ol di ples we fol fol na mi gawn ɛn shek shek am dɔn a tɛl dɛn se if ɛnibɔdi nɔ kip in prɔmis, na so PAPA GƆD go shek insay in os wit ɔl in prɔpati dɛn. We a tɔk so, ɔl di pipul dɛn se, “Emɛn” ɛn prez PAPA GƆD. Dɛn ɔl du wetin dɛn bin prɔmis.

Jud In Lɛta 1:7

Na di sem tin bin bi na Sɔdɔm ɛn Gomɔra ɛn dɛn ɔda tɔŋ we bin de klos dɛn: di pipul dɛn bin de du ɔl kayn dɔti tin wit dɛn bɔdi, man bin de lɛf in wɛf go kip in kɔmpin man, uman bin de lɛf in man go kip in kɔmpin uman. Fɔ mek ɔlman si ɛn bikyaful, Gɔd put dɛn pipul ya na faya we nɔ de ɔt fɔ pɔnish dɛn.

Jɔn In Fɔs Lɛta 4:17

As wi de insay Krays, di lɛk we wi lɛk Krays go de gro mɔ ɛn mɔ, ɛn wi nɔ go wɔri fɔ tinap bifo Gɔd di de we i de jɔj ɔlman na wɔl, bikɔs wi no se na Krays we de insay wi de mek wi liv lɛkɛ aw wi liv na dis wɔl.

Pita In Sɛkɛn Lɛta 3:7

Bɔt Gɔd in wɔd we bin mek ɔl di wɔl we de naw, kip am fɔ mek i bɔn na faya di de we Gɔd go jɔj dɛn pipul we kin de du dɛn tin we i nɔ lɛk ɛn mek dɛn go na ɛl.

Pita In Sɛkɛn Lɛta 2:9

Ɔl dis sho se di Masta de pul gud pɔsin pan waala ɛn i de pɔnish dɛn bad pɔsin te di de we i go jɔj dɛn, rich,

Pita In Sɛkɛn Lɛta 2:6

Gɔd bin jɔj tu tɔŋ, dat na Sɔdɔm ɛn Gomɔra; i bin mek faya bɔn dɛn kam dɔŋ pata pata. I bin du dat fɔ mek pipul si wetin go bi to dɛn pipul we nɔ de fala in yon we.

Lɛta Fɔ Rom 2:16

So, lɛkɛ aw di Gud Nyuz we a de tɛl pipul se, ɔl dɛn tin ya go bi di De we Gɔd go mek Jizɔs Krays jɔj dɛn sikrit tin we mɔtalman de tink.

Lɛta Fɔ Rom 2:5

Bɔt una traŋayes ɛn una at traŋa, na dat mek Gɔd go pɔnish una mɔ di de we i go sho aw i vɛks pan mɔtalman ɛn we i go jɔj dɛn lɛkɛ aw i fɔ jɔj dɛn.

Lyuk 9:5

If una go na ɛni tɔŋ we di pipul dɛn nɔ gri lisin to una, una kɔmɔt na da tɔŋ de, ɛn shek di dɔti we de ɔnda una fut fɔ mek dɛn no se dɛn dɔn du bad.”

Matyu 12:36

“A de tɛl una se, di de we Gɔd go jɔj di wɔl, ɔlman go tɛl Gɔd di kyalɛs wɔd dɛn we i bin dɔn tɔk.

Mak 6:10

Jizɔs se, “Wɛn una go na ɛni tɔŋ, di fɔs os we una go we dɛn gri fɔ mek una tap, na de una fɔ tap sote una kɔmɔt na da tɔŋ de.