Mak 14:6 - Krio Fɔs Oli Baybul

⁶ Jizɔs se, “Una lɛf fɔ tɔk pan di uman! Wetin du una de ambɔg am? Na gud wok i dɔn du fɔ mi so!

Mak 14:6 Referans Kwoze

Di Ibru Pipul Dɛn 13:21

A de pre mek Gɔd gi una ɔl dɛn gud tin we una nɔ gɛt, so dat una go yus dɛn gud tin de fɔ du wetin i want una fɔ du. A de pre mek Gɔd mek Jizɔs Krays in pawa wok na wi ɔl at, so dat wi go bi aw i want wi fɔ bi. A de pre mek pipul prez ɛn rɛspɛkt Jizɔs Krays sote go! Emɛn.

Di Ibru Pipul Dɛn 10:24

Una lɛ wi tink aw wi go ɛp wisɛf mek wi go lɛk wi kɔmpin dɛn ɛn du gud to dɛn.

Taytɔs 3:14

Sho wi pipul aw fɔ yus dɛn tɛm fɔ du gud wok, so dat dɛn kin ɛp ɔda pipul fɔ gɛt wetin dɛn fɔ gɛt; dɛn nɔ fɔ du ɛni wok we nɔ go ɛp ɔda pipul.

Taytɔs 2:14

I sakrifays in layf fɔ pul wi kɔmɔt pan di bad ɛn dɔti layf we wi bin liv, fɔ mek wi klin so dat wi go bi in yon pipul dɛn we want du wetin gud wit ɔl wi at.

Sɛkɛn Lɛta To Timoti 2:21

So if pɔsin lɛf fɔ du ɔl kayn bad tin, Gɔd go yus am fɔ du dɛn spɛshal wok bikɔs di pɔsin dɔn gi in Masta ɔl in layf ɛn i de du ɔl di wok we in Masta gi am fɔ du, ɛn i rɛdi fɔ du ɔl kayn gud wok.

Lɛta Fɔ Ɛfisɔs 2:10

Na Gɔd mek wi ɛn bikɔs wi gɛt wanwɔd wit Jizɔs Krays, Gɔd dɔn gi wi nyu layf. Gɔd bin dɔn plan lɔntɛm se we wi dɔn gɛt dis nyu layf, wi go de ɛp ɔda pipul.

Apɔsul Dɛn Wok 9:36

Wan uman bin de na Jɔpa we bin nem Tabita. (Dɛn Grik pipul de kɔl am Dɔkas we min, bif we dɛn kɔl dia.) Dis uman ya bin biliv pan Jizɔs ɛn ɔltɛm i kin de du gud ɛn i kin de ɛp dɛn po pipul.

Matyu 26:10

Jizɔs bin no wetin dɛn de tɔk, so i aks dɛn se, “Wetin du una de ambɔg di uman? I dɔn du fayn ɛn big wok fɔ mi.

Taytɔs 3:8

Na tru tin a de tɛl yu so, ɛn yu fɔ biliv am. A want fɔ mek yu mek shɔ se dɛn du dɛn tin ya, so dat dɛn wan we biliv pan Gɔd go want du gud wok we go ɛp ɔlman.

Taytɔs 2:7

Yusɛf, bay aw yu de du ɔl wetin yu de du, na yu pipul fɔ de fala fɔ du gud. Wɛn yu de tich pipul, yu fɔ sho dɛn se yu min wetin yu de tɔk ɛn yu fɔ siriɔs.

Sɛkɛn Lɛta To Timoti 3:17

so dat ɛnibɔdi we de du Gɔd wok go gɛt ɔl wetin i fɔ gɛt ɛn bi wetin i fɔ bi so dat i go ebul du ɔl kayn gud wok lɛkɛ aw i fɔ du am.

Fɔs Lɛta To Timoti 6:18

Dɛn yon jɛntri fɔ bi di plɛnti plɛnti gud wok we dɛn de du, dɛn fɔ fri an ɛn dɛn fɔ lɛk fɔ sheb wetin dɛn gɛt.

Fɔs Lɛta To Timoti 5:10

ɛn ɔlman fɔ no am fɔ di gud tin dɛn we i de du: i fɔ bi uman we tren in pikin dɛn gud, we kin du gud fɔ trenja, we kin wok fɔ di Kristiɛn dɛn, we kin ɛp dɛn pipul we de pan trɔbul, ɛn we kin du ɔl kayn gud wok.

Sɛkɛn Lɛta Fɔ Tɛsalonayka 2:17

kɔrej una ɛn ɛp una fɔ du ɛn tɔk ɔl wetin gud.

Lɛta Fɔ Kɔlɔse 1:10

Dat go mek una ebul du wetin di Masta want, ɛn ɔltɛm una go de du di tin we go mek i gladi; una go de du ɔl kayn gud wok, ɛn una go de no mɔ ɛn mɔ bɔt Gɔd.

2 Kɔrint 10:18

Pɔsin we Gɔd gri fɔ, na pɔsin we in tɔk se du wɛl, nɔto pɔsin we nainsɛf de tɔk se in de du wɛl.

2 Kɔrint 9:8

Ɛn Gɔd ebul gi una ɔl wetin una nid fɔ gɛt, ɛn mɔ, so dat una go gɛt ɔl wetin una nid fɔ gɛt fɔ unasɛf, ɛn plɛnti mɔ we una go tek ɛp ɔda pipul.

Ayzaya 54:17

Nɔn wɛpɔn we dɛn mek fɔ kil yu, nɔ go wok; ɛn ɛnibɔdi we jɔj yu, yu go pruv am rɔŋ. Dis na wetin go apin to PAPA GƆD in wokman dɛn, ɛn di fri we dɛn fri to mi. Na so PAPA GƆD se.”

Pita In Fɔs Lɛta 2:12

Di we we una liv wit dɛn pipul we nɔ no Gɔd fɔ fayn, so dat wɛn dɛn go de tɔk se una de du bad, dɛnsɛf go si se una dɔn du gud wok, fɔ tru, ɛn dat go mek, di de we Gɔd go kam fɔ jɔj di wɔl, dɛn go prez Gɔd.

Mak 14:5

Pɔsin bin fɔ gɛt lɛkɛ tri ɔndrɛd silva kɔpɔ so, if i bin sɛl di sɛnt ɛn sheb di kɔpɔ gi dɛn pipul we nɔ gɛt natin.” Dɛn bigin tɔk pan di uman.

Mak 14:7

Dɛn pipul we nɔ gɛt natin de wit una ɔltɛm, ɛn una kin du gud fɔ dɛn ɛnitɛm we una want. Bɔt mi nɔ go de wit una ɔltɛm.