Mak 13:6 - Krio Fɔs Oli Baybul

⁶ Plɛnti pipul go tek mi nem kam, dɛn go se dɛn na di Mɛsaya, dɛn go mek plɛnti pipul ful.

Mak 13:6 Referans Kwoze

Mak 13:22

Bikɔs sɔm pipul go kam we go lay se dɛn na di Mɛsaya ɛn sɔm go kam we go lay se dɛn na prɔfɛt, ɛn dɛn go du plɛnti wɔndaful wok ɛn sho plɛnti sayn, so dat da we de, dɛn kin mek dɛn pipul ful we Gɔd dɔn pik fɔ sev, if dɛn ebul du dat.

Jɔn In Fɔs Lɛta 4:1

Mi padi dɛn we a lɛk, nɔto ɔl spirit una fɔ biliv, bɔt una fɔ tray di spirit dɛn fɔ no if na to Gɔd dɛn kɔmɔt, bikɔs plɛnti lay prɔfɛt dɛn dɔn kam na di wɔl.

Jɔn 8:24

Na dat mek a tɛl una se, una go day wit ɔl una sin. Ɛn una go day wit una sin, if una nɔ biliv se ‘Mi na di pɔsin we a bi.’”

Jɔn 5:43

Na mi Papa sɛn mi, nain mek i kam, bɔt una nɔ gri lisin to mi; bɔt wɛn ɔda pɔsin kam fɔ insɛf, nɔbɔdi nɔ sɛn am, una go lisin to am.

Matyu 24:11

Plɛnti prɔfɛt we nɔ de tɔk tru go kam ɛn mek plɛnti pipul ful.

Matyu 24:5

Plɛnti man dɛn go tek mi nem kam, ɛn dɛn go kam se dɛn na di Mɛsaya ɛn dɛn go mek plɛnti pipul ful.

Jɛrimaya 14:14

Nain PAPA GƆD tɛl mi se; “Di prɔfɛt dɛm de yuz mi nem fɔ gi lay lay prɔfisi; A nɔ sɛn dɛm ɛn a nɔ tɛl dɛm fɔ tɔk to dɛm. Na lay lay prɔfisi dɛn de gi una; na lay lay vishɔn dɛn de pul na dɛn ed de lay gi una.

Mak 13:5

Jizɔs ansa se, “Una tek tɛm mek nɔbɔdi nɔ mek una ful.

Mak 13:7

Ɛn una nɔ fɔ wɔri wɛn una yɛri bɔt wa we de klos una ɔ wɛn una yɛri bɔt wa we de fawe. Dɛn tin de mɔs bi, bɔt di wɔl nɔ go ɛnd yet!

Jɔn 8:28

So Jizɔs se, “Wɛn una lif Mɔtalman Pikin ɔp, una go no se, ‘Mi na di pɔsin we a bi;’ da tɛm de, una go no se a nɔ de du ɛnitin bay misɛf, na wetin mi Papa tɛl mi fɔ tɔk nɔmɔ a de tɔk.