Lɛvitikɔs 26:5 - Krio Fɔs Oli Baybul

⁵ Dɛn go so gɛt bɔku dat dɛn go de avɛst te di tɛm we dɛn rɛdi fɔ plant, ɛn dɛn go de plant te di tɛm fɔ avɛst. It go de ɔltɛm ɛn ɔlman go gɛt kol at.

Lɛvitikɔs 26:5 Referans Kwoze

Emɔs 9:13

PAPA GƆD se, “Wande wande, di plant go so de gro dat dɛn go jɛs de avɛst ɛn di wayn go so de bɔku wan dat wayn go de mit wayn; fayn fayn wayn go bɔsawt na di mawnten, ɛn ɔl go flo kam dɔŋ di il dɛn.

Joɛl 2:26

I se dɛn go it te dɛn se i du, ɛn prez PAPA GƆD we na dɛn GƆD in nem, we dɔn de du wɔndaful tin fɔ dɛn. Ɛn in pipul nɔ go ɛva shem igen

Joɛl 2:19

PAPA GƆD ansa dɛn ɛn tɛl dɛn se in de gi dɛn sid, wayn, ɛn ɔyl, ɛn dat go mek dɛn satisfay mɔ; i se in nɔ go mek dɛn ɔda neshɔn luk dɛn ɛn sɔktit igen

Prɔvabs 1:33

udat lisin to mi nɔ gɛt natin fɔ fred, i go gɛt kol at ɛn nɔ gɛt wan yagba.”

Ditarɔnɔmi 11:15

Da tɛn de, gras go de plɛnti wan we dɛn kaw, got ɛn ship go it, ɛn dɛnsɛf go gɛt fɔ it bɛlful.

Fɔs Lɛta To Timoti 6:17

As fɔ dɛn wan we jɛntri na dis wɔl, tɛl dɛn mek dɛn nɔ prawd, ɛn mek dɛn nɔ abop pan dɛn jɛntri, we sɔntɛm nɔ go de tumara; mek dɛn abop pan Gɔd we de gi wi ɔltin plɛnti plɛnti fɔ mek wi at gladi.

Pita In Fɔs Lɛta 1:5

Bikɔs una biliv pan Gɔd, Gɔd go kip una wit in pawa, so dat una go gɛt da layf we go de sote go, we dɔn rɛdi naw ɛn we Gɔd go gi una di de we i go jɔj ɔlman.

Apɔsul Dɛn Wok 14:17

Bɔt stil i bin de sho ɔlman udat i bi bay di gud we i kin du fɔ dɛn ɔl. Gɔd kin gi una ren. Di ren kin fɔdɔm frɔm di klawd, ɛn mek wetin una plant bia wɛn di tɛm rich, so dat una go gladi.”

Matyu 23:37

“Jerusɛlɛm, Jerusɛlɛm, oya, oya, una de kil dɛn prɔfɛt ɛn ston dɛn mɛsenja we Gɔd sɛn to una! Plɛnti tɛm a kin want gɛda una rawnd mi, lɛkɛ aw kombra fɔl de gɛda in pikin dɛn ɔnda in fɛda, bɔt una nɔba gri!

Jɛrimaya 23:6

Nain tɛm Juda go sav, ɛn Izrɛl go liv de wit kolat. Ɛn na dis nem dɛn go kɔl am: ‘PAPA GƆD na wi tret waka.’

Prɔvabs 18:10

PAPA GƆD na lɛkɛ big kɔtintri, pɔsin we de waka tret na PAPA GƆD in yay kin go ayd biɛn am.

Di Sam Dɛm 90:1

PAPA GƆD frɔm tɛm, na yu dɔn de kɔba wi.

Ɛksodɔs 16:8

Mozis tɛl dɛn se na go gi dɛn bif fɔ it ivintɛm, ɛn bɔku bɔku bred na mɔnin we go de te i lɛf, bikɔs i dɔn yɛri we dɛn de grɔmbul pan am. I se di grɔmbul we dɛn de grɔmbul nɔto pan in di Mozis ɛn Erɔn bɔt na pan PAPA GƆD.

Ozie 2:18

I se da tɛm de in ɛn ɔl dɛn wayl animal na bush, dɛn bɔd we de flay ɛn dɛn tin sɛf we kin de krip na grɔn go tay bagin ɛn in go mek natin nɔ tɔch am wɛda na bo ɛn aro, ɔ sɔd ɛn if wa fɔdɔm na di kɔntri, so we go lidɔm, natin nɔ go mek i fred.

Di Sam Dɛm 144:13

Lɛ wi sto dɛn pak ful wit ɔlkayn tin fɔ it; ɛn lɛ wi ship dɛn jɛs de bɔn bɔku bɔku ship pikin dɛn;

Ayzaya 1:19

If una gri fɔ du wetin a se ɛn obe mi, una go ɛnjɔy ɔl di gud tin dɛn na di land.

Ayzaya 30:23

Ɛn PAPA GƆD go sɛn ren fɔ di sid we una plant, ɛn rɛs we go gro na di grɔn, go bɔku ɛn i go fayn. Da de de, una kaw dɛn go it na big ples we plɛnti gras de;

Ozie 2:20

A go waka tret wit yu insay di mared am, dɔn yu go biliv se in na PAPA GƆD.

Joɛl 2:22

I se dɛn wayl animal na bush nɔ fɔ fred, bikɔs di ples we dɛn kin it na di land we pɔsin nɔ go ebul tap, grin; di tik de bia frut, di fig tik ɛn di vayn tik de pul wetin dɛn fɔ pul.