Lɛvitikɔs 19:10 - Krio Fɔs Oli Baybul

¹⁰ Ɛn ivin we na frut dɛn de pik, dɛn nɔ fɔ pik ɔltin na di tik dɛn; dɛn fɔ lɛf sɔm fɔ poman ɔ fɔ ɛni trenja: nain na PAPA GƆD we na dɛn GƆD.

Lɛvitikɔs 19:10 Referans Kwoze

Ayzaya 24:13

Na so i go bi na di wɔl to di difrɛn neshɔn dɛn; lɛk we greps tik ɛmti we dɛn de pik di tu tri we kin lɛf we dɛn kin dɔn pik ɔltin na di tik dɔn.

Ayzaya 17:6

PAPA GƆD we na Izrɛl dɛn Gɔd insay se, af af go lɛf de lɛk we dɛn shek ɔliv tik tu tri bɛri kin lɛf na di branch we ay pas ɔl, fo ɔ fayv kin lɛf na di frut tik in branch dɛn.

Lɛvitikɔs 25:6

I se pan ɔl we dɛn nɔ go gɛt fɔ de plant ɔ avɛst, dɛn go gɛt tin fɔ it, fɔ dɛnsɛf, dɛn man ɛn uman slev dɛn ɛn fɔ ivin dɛn wokman wit ɛni trenja we tap wit dɛn;

Mayka 7:1

Mayka se i de wes in tɛm fɔ natin. I se i tan lɛk we pɔsin nɔ de fɛn frut fɔ it na tik di tɛm we i fɔ bia, ɔ wɛn dɛn dɔn pik ɔl di greps na di tik we i nɔ go gɛt wayn fɔ drink. Natin nɔ de fɔ it ɛn wetin i de aŋri fɔ sɛf, i nɔ go gɛt am.

Obadaya 1:5

I se, una ɛnimi dɛn go pwɛl una kpatakpata. If tifman go na una os nɔto ɔltin dɛn go tif, ɛn dɛn pipul sɛf we de pik greps kin lɛf sɔm na di tik.

Jɛrimaya 49:9

If man dɛm we de pik greps, pik greps fɔ yu, dɛn nɔ go lɛf sɔm na grɔn? If tifman dɛm kam na nɛt, nɔto wetin dɛn ebul pwɛl dɛn go pwɛl nɔmɔ?

Di Jɔj Dɛm 8:2

Nain Gidiɔn ansa dɛn se, dɛn nɔ go ivin kɔmpia wetin dɛn dɔn du to wetin in du; wetin dɛn du we dɛn kam, bɛtɛ pas wetin dɛn we bin de dɔn du.

Lɛvitikɔs 19:9

I se wɛn di pipul go dɔn rich na di land ɛn bigin fɔ avɛst di tin dɛn we dɛn plant, dɛn nɔ fɔ pik ɔltin we dɛn plant lɛkɛ dɛn wan we de na dɛn kɔna ɔ dɛn wan we kin fɔdɔm na dɛn an ɛn lɛf am arara.

Lɛvitikɔs 19:11

I se nɔ fɔ tif nɔ mek dabaru ɔ lay gi dɛn kɔmpin.

Lɛvitikɔs 23:22

I se wɛn dɛn de avɛst di tin dɛn we dɛn plant, dɛn nɔ fɔ pik ɔltin we dɛn plant lɛkɛ dɛn wan we de na dɛn kɔna ɔ dɛn wan we kin fɔdɔm na dɛn an ɛn lɛf am arara; dɛn fɔ lɛf sɔm fɔ poman ɔ fɔ ɛni trenja: I se nain na PAPA GƆD we na dɛn GƆD.

Ditarɔnɔmi 24:19

Mozis se we dɛn kɔt dɛn rɛs, pik dɛn kɔn ɛn ɔda tin dɛn na dɛn fam, ɛn dɔn kɛr dɛn go usay dɛn de kip dɛn, dɛn nɔ fɔ tɔn bak go tek di wan dɛn we dɛn nɔ bin ebul kɔt ɛn kɛr go; dɛn fɔ lɛf dɛn fɔ di trenja dɛn we de wit dɛn, fɔ dɛn pikin we dɛn mami ɛn dadi dɔn day ɛn dɛn uman we dɛn man dɔn day. I se PAPA GƆD we na dɛn PAPA GƆD go blɛs dɛn fɔ dat.

Ditarɔnɔmi 24:20

We dɛn go dɔn pik di ɔliv dɛn na dɛn ɔliv tik dɛn dɔn, ɛn dɔn gɛda dɛn go, dɛn nɔ fɔ go bak go pik di wan dɛn we nɔ bin fɔdɔm. Dɛm fɔ lɛf dɛn fɔ di trenja dɛn we de wit dɛn, di pikin dɛn we dɛn mami ɛn dadi dɔn day, ɛn dɛn uman we dɛn man dɔn day.

Ruth 2:2

Wande, Ruth we na Moabayt uman tɛl Naomi se i wan go na di fam ɛn sɔntɛm pɔsin go sɔri fɔ am ɛn mek i pik di af af dɛn we kin lɛf afta dɛn dɔn avɛst dɔn. Naomi insɛf tɛl am mek i go.

Lɛvitikɔs 11:44

I se in na PAPA GƆD we na dɛn Gɔd. I se so dɛn fɔ de klin wan fɔ am ɛn tan lɛk am bikɔs in na oli Gɔd. I se dɛn nɔ fɔ tek dɛn tin dɛn we de krip na wɔl fɔ ambɔg dɛnsɛf.

Lɛvitikɔs 19:25

Bɔt na te di ia we mek fayv, dɛn fɔ it pan dɛn frut. If dɛn du ɔl wetin PAPA GƆD se, dɛn frut dɛn we dɛn plant go bia bɔku.

Ditarɔnɔmi 24:21

We dɛn dɔn pik dɛn greps dɛn na dɛn greps tik dɛn dɔn, ɛn dɔn gɛda dɛn go, dɛn nɔ fɔ go bak fɔ go pik di wan dɛn we dɛn nɔ bin ebul pik. Dɛn fɔ lɛf dɛn fɔ di trenja dɛn we de wit dɛn, dɛn pikin we dɛn mami ɛn dadi dɔn day ɛn dɛn uman we dɛn man dɔn day.