Lɛvitikɔs 1:14 - Krio Fɔs Oli Baybul

¹⁴ If na bɔd dɛn na di ɔfrin to PAPA GƆD, na bush pijin wit ɔdinari pijin fɔ gi.

Lɛvitikɔs 1:14 Referans Kwoze

Lyuk 2:24

Pantap dat, Josɛf ɛn Meri kɛr tu dɔv ɔ tu pijin pikin go gi di man we de mek sakrifays fɔ pipul sin fɔ mek sakrifays to Gɔd, bikɔs Gɔd in lɔ tɔk igen se fɔ sakrifays tu dɔv ɔ tu pijin pikin.

Lɛvitikɔs 5:7

Bɔt if i nɔ mitɔp fɔ gi yɔŋ ship, dɛn i fɔ gi tu bush pijin ɔ tu yɔŋ ɔdinari pijin as in yon ɔfrin we i de gi to PAPA GƆD, wan as sin ɔfrin ɛn di ɔda wan as bɔn ɔfrin.

Lɛvitikɔs 12:8

If i nɔ mitɔp fɔ bay di yɔŋ ship, dɛn i go kɛr tu yɔŋ bush pijin ɔ tu ɔdinari pijin, wan fɔ di bɔn ɔfrin ɛn di ɔda wan fɔ di sin ɔfrin; ɛn di man we de mek sakrifays fɔ pipul sin go beg padin fɔ am ɛn i go klin na PAPA GƆD yay.

Di Ibru Pipul Dɛn 7:26

So Jizɔs na di edman we de mek sakrifays fɔ pipul sin ɛn i de gi wi ɔl wetin wi fɔ gɛt. I de du wetin rayt ɔltɛm; i nɔ gɛt sin nain layf; sin nɔ gɛt pawa pan am; ɛn i de nain ples we de na ɛvin.

2 Kɔrint 8:12

If una gɛt tin we una want gi bad bad, Gɔd go gri fɔ wetin una gi bay wetin una gɛt, nɔto bay wetin una nɔ gɛt.

Matyu 11:29

Una opin una at fɔ di tru tin dɛn we a de lan una, ɛn una lan ɔl wetin a de tɛl una, bikɔs a de bia wit una ɛn a nɔ de tɔk pan una; if una du dat, una go blo.

Jɛnɛsis 15:9

PAPA GƆD ansa se, “Briŋ wan tri ia ol kaw, wan tri ia ol uman got, ɛn wan tri ia ol man ship wit wan dɔv ɛn wan pijin fɔ mi.

Matyu 21:12

Jizɔs go insay Gɔd in Os, ɛn drɛb ɔl dɛn pipul we bin de bay ɛn sɛl de. I kapsay di tebul dɛn we di pipul dɛn bin de chenj mɔni pan, ɛn di bɛnch dɛn we dɛn wan we bin de sɛl pijin kin sidɔm pan.

Lɛvitikɔs 5:10

Dɛn di sɛkɛn wan go bi bɔn ɔfrin lɛkɛ aw di lɔ se; di man we de mek sakrifays fɔ pipul sin go beg padin fɔ di sin we di pɔsin bin kɔmit ɛn PAPA GƆD go fɔgiv am.

Lɛvitikɔs 5:11

Bɔt if i nɔ mitɔp sɛf fɔ gi di tu bush pijin ɔ tu yɔŋ ɔdinari pijin, dɛn i go gi et kɔp fayn flawa as sin ɔfrin fɔ di sin we i kɔmit; i nɔ fɔ put ɔyl ɔ frankinsɛns pan am bikɔs na sin ɔfrin.