Jɔshwa 3:11 - Krio Fɔs Oli Baybul

¹¹ I se PAPA GƆD we na di PAPA GƆD fɔ ɔl di pipul dɛn na di wanol wɔl, in Ak ɔf di Kɔvinant go go bifo ɛn go rich Riva Jɔdan bifo dɛn.

Jɔshwa 3:11 Referans Kwoze

Zɛkaraya 6:5

Di enjɛl se, dɛn na lɛk di fo kayn briz we de na wɔl. Dɛn bin de wit PAPA GƆD ɛn naw dɛn de go du wetin PAPA GƆD se dɛn fɔ du.

Zɛkaraya 4:14

Dɔn i se dɛn stand dɛn de fɔ di tu pipul we PAPA GƆD dɔn pik fɔ de wok na di wɔl fɔ am.

Di Sam Dɛm 24:1

Na PAPA GƆD mek di wɔl, so nain gɛt di wɔl; ɔl wetin de na wɔl ɛn ivin di pipul na PAPA GƆD gɛt ɔl.

Mayka 4:13

Di tɛm dɔn kam fɔ mek dɛn grap ɛn dil wit dɛn ɛnimi. PAPA GƆD se i go mek Jerusɛlɛm traŋa lɛk man kaw we in ɔn tan lɛk ayɛn dɔn i tan lɛk na bras de nain fut dɛn. Dɛn go nyamanyama di ɔda neshɔn dɛn, tek ɔl dɛn jɛntri bay fos ɛn gi PAPA GƆD we na PAPA GƆD fɔ di wanol wɔl.

Jɔshwa 3:13

I se as di man dɛn we de mek sakrifays fɔ pipul sin we de tot PAPA GƆD we na di PAPA GƆD fɔ ɔl di pipul dɛn na di wanol wɔl, in Ak ɔf di Kɔvinant, put dɛn fut insay Riva Jɔdan so, di wata go lɛf fɔ rɔn; di wata we de kɔmɔt ɔp say go jɔs tinap wan ples ay wan.

Zɛkaraya 14:9

Na PAPA GƆD go de rul di wanol wɔl; ɔlman go de wɔship am ɛn kɔl am di sem nem.

Zɛfinaya 2:11

PAPA GƆD insɛf go dil wit dɛn traŋa traŋa wan. Yɛs, i go nyakanyaka dɛn ɛn mek dɛn gɔd nɔ fiba natin to dɛn ɛn ɔlman naw go butu ɛn wɔship am, usay dɛn de, na ɔl di neshɔn dɛn na wɔl.

Jɛrimaya 10:7

Udat de we nɔ go fred yu, Yu we kiŋ fɔ di neshɔn dɛm? Bikɔs ɔlman sɔpoz fɔ rɛspɛkt yu; bikɔs pan ɔl dɛn wan dɛn we gɛt sɛns bad bad wan na di neshɔn dɛm ɛn insay ɔl dɛn kindɔm dɛm, nɔn nɔ de we tan lɛkɛ yu.

Ayzaya 54:5

Bikɔs yu meka na yu man, we na PAPA GƆD Ɔlmayti nain nem; ɛn na di Oli Wan na Izrɛl na yu Ridima, we dɛn kɔl, di Gɔd fɔ di wanol wɔl.

Ayzaya 3:12

Mi pipul dɛn na pikin dɛn de mek mi pipul dɛn sɔfa so, ɛn na uman dɛn de rul dɛm. E mi pipul dɛm, na una lida dɛn de mislid una ɛn miks ɔp di rod we una fɔ pas na layf.

Job 41:11

Udat dɔn gi mi sɔntin we go se a fɔ pe am bak? Ɔl wetin de na dis wɔl, na mi gɛt am.

Ditarɔnɔmi 9:3

Mozis tɛl dɛn se PAPA GƆD we na dɛn PAPA GƆD go go atak dɛn lɛkɛ we big big faya we gɛt pɛtrol de kech, ɛn bifo dɛn de rich de i go dɔn bit di ɛnimi dɛn dɔn jɛs lɛk aw i bin dɔn prɔmis se in go de du, so di Izrɛlayt dɛn go jɛs drɛb di ɛnimi dɛn kɔmɔt de ɛn kil dɛn.

Di Sam Dɛm 97:5

We PAPA GƆD de de so, di mawnten sɛf de mɛlt lɛk kyandul, bifo di sem PAPA GƆD we mek di wanol wɔl.

1 Kronikuls 29:11

PAPA GƆD yu gret, yu gɛt pawa, na yu dɛn de kɔle pan, yu de win ɔltɛm, ɛn di ɔna we pas ɔl ɔna, bikɔs ɔl wetin de na ɛvin ɛn dis wɔl na yu yon. Di kindɔm na yu yon, PAPA GƆD, ɛn na yu de pantap ɔltin.