Jɛrimaya 5:24 - Krio Fɔs Oli Baybul

²⁴ Dɛn nɔ de tɔk na dɛn at se, ‘Lɛ wi fred PAPA GƆD we na wi Gɔd, we de gi wi ren, ren sizin, di amatan ren, ɛn di draysizin ren, ɛn de kip, di wik dɛm fɔ di avɛst, fɔ wi.’

Jɛrimaya 5:24 Referans Kwoze

Di Sam Dɛm 147:8

I kɔba di skay wit klawd; i mek ren fɔdɔm na wɔl ɛn gras gro pantap dɛn il.

Joɛl 2:23

I se di pipul na Zayɔn fɔ gladi dɛn fɔ fil gud fɔseka PAPA GƆD, we na dɛn GƆD bikɔs i dɔn sɛn ren kwik fɔ mek dɛn no se i min wetin i se. I sɛn di ren bɔku bɔku wan kam dɔŋ di wan we kam kwik o ɛn di wan we kam leta lɛk aw dɛn fɔ kam.

Jɛnɛsis 8:22

Wans di wɔl nɔ dɔn yet, tɛm go de fɔ plant ɛn tɛm go de fɔ avɛst; di ples go kol ɛn di ples go wam; Sɔma ɛn Winta” go de; do go klin, nɛt go kam. Ɔl dis nɔ go ɛva tap.

Apɔsul Dɛn Wok 14:17

Bɔt stil i bin de sho ɔlman udat i bi bay di gud we i kin du fɔ dɛn ɔl. Gɔd kin gi una ren. Di ren kin fɔdɔm frɔm di klawd, ɛn mek wetin una plant bia wɛn di tɛm rich, so dat una go gladi.”

Matyu 5:45

so dat una go bi una Papa, we de na ɛvin, in pikin dɛn. Una Papa de mek di san shayn pan dɛn bad pipul ɛn pan dɛn gud wan. I de mek ren kam pan dɛn pipul we gud ɛn dɛn wan we bad.

Jɛrimaya 14:22

Ɛni pan dɛn neshɔn dɛn lay lay gɔd dɛn we de mek ren kam, de wit una? Ɔ di klawd insɛf ebul mek ren kam? Nɔto yu na di wan we de mek ɔl dat bi, PAPA GƆD we na wi Gɔd? Na yu wi abop pan, bikɔs na yu de du ɔl dɛn tin ya.

Rɛvɛleshɔn 11:6

Dɛn gɛt pawa fɔ ol di ren mek i nɔ fɔdɔm di tɛm we dɛn de tɛl pipul di mɛsej we Gɔd sɛn. Ɛn igen, dɛn gɛt pawa fɔ mek wata we bɔs na grɔn tɔn blɔd; dɛn gɛt pawa fɔ sɛn ɛni kayn bad bad tin kam na di wɔl, ɛnitɛm we dɛn lɛk.

Jems 5:7

Mi kɔmpin Kristiɛn dɛn, una fɔ bia sote di Masta kam. Una mɛmba aw dɛn pipul we de mek fam kin bia wet sote di tɛm rich fɔ pik wetin dɛn bin plant.

Zɛkaraya 10:1

Aks PAPA GƆD fɔ ren, ren sizin. Na PAPA GƆD de mek di klawd dak we de briŋ ren kam, so dat mɔtalman go gɛt ren ɛn di plant dɛnsɛf go gɛt.

Emɔs 4:7

A ol di ren mek wan drɔp nɔ fɔdɔm di tɛm we una plant dɛn fɔ gro. A mek ren kam na wan siti, ɛn mek ren nɔ kam na di ɔda wan. Wan fam gɛt wata ɛn di ɔda wan nɔ gɛt natin ɛn dray.

Ozie 6:1

Una kam mek wi go bak to PAPA GƆD. Nain dɔn nyamanyama wi so i go gɛda wi bak; i dɔn wund wi so i go mɛn wi bak.

Jɛrimaya 50:5

Dɛn go aks fɔ di rod fɔ go Zayɔn, ɛn dɛn go tɔn dɛn fes de, de se, “Una kam lɛ wi jɔn wisɛf to PAPA GƆD wit wan Kɔvinant we go de sote go we nɔbɔdi nɔ go ɛva fɔgɛt.’

Jɛrimaya 5:22

PAPA GƆD se, una nɔ de fred mi? Una nɔ de trimbul bifo mi? A put sansan as bawndri fɔ di si, baria we de de ɔltɛm we i nɔ de pas; i lɛk aw di swɛlin dɛn tɔnɔbɔ, dɛn nɔ de pas da bawndri de, i lɛk aw dɛn ala, dɛn nɔ go ebul jomp am.

Ayzaya 64:7

Nɔbɔdi nɔ de we de pre to yu, we de stren insɛf fɔ go grip yu; bikɔs yu dɔn ayd yu fes pan wi, ɛn yu dɔn put wi na wi sin dɛn an.

Job 38:37

Udat gɛt da sɛns de fɔ kɔnt di klawd? Ɔ udat ebul tɔn di tapolin we de na di skay oba lɛ ren go kam,

1 Kiŋ 17:1

Wan Tishbayt we nem Ilayja we kɔmɔt Tishbɛ na Giliad go to kiŋ Eab ɛn tɛl am se, “As lɔŋ as PAPA GƆD, PAPA GƆD fɔ Izrɛl we nain a de sav de alayv, wan drɔp ren ɔ dyu nɔ go fɔdɔm na ya fɔ di nɛks tu-tri ia te a se so.”

Ditarɔnɔmi 28:12

PAPA GƆD go opin in sto we i de kip di ren ɔp di klawd, ɛn mek dɛn gɛt ren di rayt tɛm, so dɛn plant dɛn go gro fayn fayn wan. Ren ɛn san de na PAPA GƆD in an. I go so blɛs dɛn, dat na ɔda neshɔn dɛn go de go lɛnt to dɛn.

Ozie 3:5

Tɛm go kam we di Izrɛlayt dɛn go tɔn bak to PAPA GƆD we na dɛn Gɔd, ɛn Devid go bi dɛn kiŋ; dɔn dɛn go gɛt fred fɔ PAPA GƆD ɛn ɔl di gud we i go du fɔ dɛn bambay.

Job 5:10

nain de mek ren fɔdɔm na wɔl ɛn de wata dɛn bush;

Di Sam Dɛm 65:9

Yu de sho wi aw yu bisin bɔt wi, yu de mek ren kam we go sok di grɔn fayn fɔ plant fɔ gro. Yu nɔ de ɛva mek wata dɔn; yu de gi wi tin fɔ it ɔltɛm, lɛkɛ aw nɔmɔ, yu se.

Jɛrimaya 2:19

PAPA GƆD Ɔlmayti se, una wikɛdnɛs go pɔnish una, ɛn di fɔsek we una fɔsek mi go jɔj una. Una no ɛn si se na bad bad ɛn bita tin fɔ una fɔ fɔsek PAPA GƆD we na una Gɔd; una nɔ rɛspɛkt mi wan.

Jɛrimaya 3:3

Fɔseka dat, wan ren nɔ de kam, ren nɔ de kam ren sizin; pan ɔl dat yu stil yu gɛt rare gyal fɔrɛd, yu nɔ gri shem.

Job 29:23

Dɛn kin wet fɔ mi lɛk we pipul dɛn kin de wet ren fɔ kam; dɛn na lɛk dɛn fama we nɔ ebul bia, we de wet fɔ ren sizin.

Jɛrimaya 10:13

Wɛn i pas kɔmand, di wata dɛn we de ɔp di klawd kin slap slap dɛnsɛf; ɛn i kin mek smok grap kɔmɔt na di las las pat dɛn na di wɔl. I mek laytin fɔseka ren, ɛn i briŋ briz kɔmɔt nain sto.