Jɛrimaya 30:18 - Krio Fɔs Oli Baybul

¹⁸ Na dis PAPA GƆD se: A de tɛl una, a go gi Izrɛl dɛn jɛntri bak, ɛn sɔri fɔ in pipul dɛm; a go bil di siti bak pantap in il, ɛn di kiŋ in os go tinap bak di say we i bin de.

Jɛrimaya 30:18 Referans Kwoze

Di Sam Dɛm 102:13

Yu go tinap ɛn sɔri fɔ Zayɔn, di tɛm dɔn rich fɔ mek yu mek in at swit.

Jɛrimaya 30:3

PAPA GƆD se, Bikɔs di tɛm de kam we a go gi mi pipul dɛm we na Izrɛl ɛn Juda, dɛn jɛntri bak, ɛn a go briŋ dɛm kam bak na di land we a bin gi dɛn fɔstɛmpapa dɛm, ɛn dɛn go tek am fɔ dɛnsɛf.”

Jɛrimaya 33:7

A go gi Juda dɛn jɛntri bak, ɛn gi Izrɛl dɛn jɛntri bak, ɛn bil dɛm bak lɛkɛ aw dɛm bin de fɔstɛm.

Jɛrimaya 49:39

PAPA GƆD se, “bɔt leta, a go gi Ilam dɛn jɛntri bak. Na so PAPA GƆD se.

Jɛrimaya 23:3

Dɔn a go gɛda di wan dɛn we lɛf pan mi ship dɛm kɔmɔt na ɔl di difrɛn kɔntri dɛm we a dɔn drɛb dɛm go, ɛn a go briŋ dɛm kam bak na dɛn os, ɛn dɛn go ebul bɔn ɛn dɛn go plɛnti.

Zɛkaraya 1:16

Dat mek PAPA GƆD se, naw, in dɔn go bak to Jerusɛlɛm wit in sɔri-at; dɛn go bil in os insay de ɛn i go mek shɔ se Jerusɛlɛm bi wetin i bin bi bak.

Jɛrimaya 46:27

“Bɔt nɔ fred, Yu Jekob we na mi wokman, nɔ pwɛlat, Yu Izrɛl; bikɔs tabi tabi nɔ de, a go de fawe a sev una, ɛn a go sev una pikin dɛm kɔmɔt na di land we dɛn mek dɛm slev. Jekob go tɔn bak kam ɛn de wit kolat ɛn alafia, ɛn nɔbɔdi nɔ go gi am kɔtat.

Jɛrimaya 49:6

PAPA GƆD se, “Bɔt afta dat, a go gi di Amonayt dɛm, dɛn jɛntri bak.”

Ayzaya 44:26

we de pruv wetin in wokman se, ɛn de mek shɔ se wetin in mɛsenja dɛn se, bi; we tɔk bɔt Jerusɛlɛm se, ‘Pɔsin dɛn go tap de,’ ɛn bɔt di siti dɛn na Juda, se, ‘Dɛn go bil dɛn ɛn a go mek ɔl usay brok brok, bak’;

Jɛrimaya 31:4

A go ɛstablish una bak, ɛn yu go establish, Yu Izrɛl we na vajin! Una go mek una tamborin dɛn bak, ɛn una go de dans wit dɛn wan we de mek gladi gladi.

Jɛrimaya 33:11

pipul dɛn de ɛnjɔy ɛn gladi gladi; ɔkɔ ɛn yawo go gladi gladi, yu go yɛri dɛn wan dɛm we de siŋ dɛn vɔys, we dɛn de briŋ tɛl Gɔd tɛnki ɔfrin dɛm kam na PAPA GƆD in os: ‘Tɛl PAPA GƆD Ɔlmayti tɛnki, bikɔs PAPA GƆD gud, bikɔs in lɔv we nɔ de chenj go de sote go!’ Bikɔs a go gi di land in jɛntri bak lɛk aw i bin de fɔstɛm. Na so PAPA GƆD se.

1 Kronikuls 29:19

Gi Sɔlɔmɔn we na mi bɔypikin di pawa fɔ du ɔl wetin yu tɔk traŋa wan se wi fɔ de du, kip in tɛstimoni ɛn di lɔ dɛn, so dat i go ebul bil di kiŋ os we a dɔn gɛda ɔltin fɔ bil.

Jɛrimaya 29:14

una go fɛn mi ɛn a go gi una ɔl una jɛntri bak ɛn gɛda una kɔmɔt na ɔl di neshɔn dɛn ɛn ɔl di ples dɛn we a bin dɔn drɛb una go, ɛn a go briŋ una bak na di ples we a drɛb una kɔmɔt go ɛgzayl. Na so PAPA GƆD se.

Ayzaya 44:28

we tɔk bɔt Sayrɔs se, ‘In na mi shɛpad, ɛn i go du ɔl wetin a plan’; I tɔk bɔt Jerusɛlɛm se, “Dɛn go bil am,’ ɛn bɔt di tɛmpul se, ‘Dɛn go le yu fawndeshɔn.’”

Jɛrimaya 31:38

PAPA GƆD se, “A de tɛl una, di tɛm de kam we dɛn go bil di siti bak, frɔm Ananɛl Tawa to di Kɔna Get, fɔseka PAPA GƆD.

Jɛrimaya 31:23

Na dis PAPA GƆD Ɔlmayti we na Izrɛl dɛn Gɔd se: “wan tɛm mɔ, dɛn go yuz dɛn wɔd ya na Juda ɛn in siti dɛm, we a go gi dɛm dɛn jɛntri bak: “PAPA GƆD GO blɛs yu, yu we nainsay yu raychɔsnɛs tap, Yu oli il!’

Zɛkaraya 12:6

I se, da de de, i go mek di Juda fambul lɛk pɔt we de na faya insay bush, lɛk opin faya usay dray gras de; ɛn dɛn go nyakanyaka ɔl di neshɔn dɛn we lɛf, ɛn Jerusɛlɛm go lɛf usay i de, di sem Jerusɛlɛm.

Di Sam Dɛm 78:69

I bil in os na ay ples, I mek am trɔŋ lɛk di wɔl we i mek fɔ de sote go.

Nɛimaya 7:4

Jerusɛlɛm na bin wan big siti we gɛt opin spes bɔt bɛtɛ pipul nɔ bin tap de ɛn dɛn nɔ bin bigin bil di os dɛn bak yet.

Di Sam Dɛm 85:1

E PAPA GƆD! Yu bin dɔn mek bɛtɛ de fala wi, yu bin dɔn gi wi bak, wi papa Jekɔb in jɛntri.

Zɛkaraya 14:10

Di wanol ples go tɔn to flat grɔn frɔm Giba te rich Rimɔn we de sawt insay Jerusɛlɛm. Bɔt Jerusɛlɛm in go lɛf ay wan usay i de frɔm di Bɛnjamin Get te rich di ples usay di fɔs get bin de, to di Kɔna Get ɛn frɔm di Ananɛl Tawa te rich di say we dɛn kin de mek wayn fɔ di kiŋ.

Jɛrimaya 31:40

Di wanol dedebɔdi vali ɛn di ashis, ɛn ɔl di fil dɛm sote rich kidrɔn watasay, to di Ɔs Get kɔna we yu de go ist, fɔ oli to PAPA GƆD. Dɛn nɔ go atak am ɔ nyakanyaka am igen sote go.”

1 Kronikuls 29:1

Devid we na di kiŋ tɛl dɛn ɔl di wan dɛn we gɛda de se, “Sɔlɔmɔn mi bɔypikin, we nain wangren PAPA GƆD dɔn pik, yɔŋ ɛn in nɔ gɛt ɛkspiriɛns, ɛn di wok big; bikɔs di kiŋ os nɔto fɔ mɔtalman, bɔt na fɔ Papa Gɔd we na Gɔd.

Di Sam Dɛm 48:3

PAPA GƆD de sho ɔlman se in na dɛn sikyɔriti; so wans dɛn de wit am, dɛn gɛt sikyɔriti.

Di Sam Dɛm 48:13

luk di traŋa wɔl dɛn, ɛn di ples we dɛn bil fɔ pipul fɔ go fɔ protɛkt dɛnsɛf, so dat yu go tɛl di smɔl wan dɛn aw PAPA GƆD bin de tek kia ɔf in pipul.

Di Sam Dɛm 122:7

Lɛ ɔl rawnd Jerusɛlɛm wit di bigman dɛn os gɛt sikyɔriti.”

Jɛrimaya 29:11

PAPA GƆD se, bikɔs A no de plan dɛm we A gɛt fɔ una, plan dɛm fɔ una bɛtɛ wan, fɔ mek una abop ɛn bɛtɛ bambay.

Jɛrimaya 32:15

Bikɔs na dis PAPA GƆD Ɔlmayti we na Izrɛl dɛn Gɔd se; Dɛn go bay os ɛn land ɛn greps bak na dis land.

Izikɛl 36:11

Ɛn a go ad mɔ ɛn mɔ mɔtalman, ɛn bist dɛm pan una; ɛn dɛn go plɛnti mɔ ɛn mɔ ɛn dɛn go bia bɔku frut dɛm; ɛn a go mek dɛn tap wit una lɛk aw dɛn bin de bifo, ɛn du mɔ gud pas wetin dɛn bin ɛva de du bifo, to una. Na datɛnde dɛn go no se na mi na PAPA GƆD.

Emɔs 9:14

A go briŋ mi pipul kam bak na dɛn land, dɛn go bil dɛn siti bak ɛn tap de; dɛn go plant vayn ɛn drink in wayn, dɛn go plant ɛn it wetin dɛn plant.

Zɛkaraya 1:12

Dɛn di enjɛl aks PAPA GƆD if i nɔ go sɔri naw fɔ Jerusɛlɛm ɛn Juda. I se i dɔn vɛks pan dɛn fɔ sɛvinti ia naw.

Zɛkaraya 12:7

PAPA GƆD go mek di wan dɛn we tap na Juda fɔs win so dat pipul go si aw Devid in os fayn ɛn di fayn we Jerusɛlɛm go fayn go pas wetin dɛn si na Juda.

Di Sam Dɛm 102:14

Yu pipul lɛk di siti pan ɔl we ɔltin dɔn pwɛl; dɛn de sɔri fɔ am as i tan lɛk bɛtɛ nɔ de so dɛn de fil am we in ston dɛn dɔn brok brok de na grɔn lɛk dɔti.

Jɛrimaya 32:44

Dɛn go bay land wit mɔni, ɛn dɛn go sayn ɛn witnɛs kɔnveans dɛm, na di land ɔf Bɛnjamin, na di ples rawnd Jerusɛlɛm, ɛn na di siti dɛn na Juda, di siti dɛn na di il kɔntri, di Shɛfɛla dɛn siti dɛn, ɛn na di siti dɛn we de na di Nɛgɛb; bikɔs a go gi dɛm dɛn jɛntri bak. Na so PAPA GƆD se.”