Jɛrimaya 17:23 - Krio Fɔs Oli Baybul

²³ Pan ɔl dat, dɛn nɔ lisin ɔ pe atɛnshɔn to mi, bɔt dɛn mekɔp dɛn maynd so dat dɛn no go yɛri fɔ tek wetin a se dɛn fɔ du.

Jɛrimaya 17:23 Referans Kwoze

Prɔvabs 29:1

Ɛnibɔdi we de mek traŋayes we dɛn kɔrɛkt am go gɛt trɔbul, ɛn we i nɔ mekɔp, na de i go fɛn in yon day.

Jɛrimaya 19:15

“Na dis PAPA GƆD Ɔlmayti we na Izrɛl dɛn Gɔd se, A de briŋ ɔl di bad bad tin dɛn we a bin dɔn se go apin, pan dis siti ɛn ɔl in tɔŋ dɛm, bikɔs dɛn dɔn traŋayes bad bad wan ɛn nɔ gri yɛri mi wɔd.”

Jɛrimaya 11:10

Dɛn dɔn tɔn bak to dɛn fɔstɛmpapa dɛn we nɔ bin gri yɛri mi wɔd, dɛn sin; dɛn dɔn go fɔ go sav ɔda gɔd dɛm; Izrɛl ɛn Juda dɔn brok mi Kɔvinant we a bin mek wit dɛn fɔstɛmpapa dɛm.

Apɔsul Dɛn Wok 7:51

“Una na traŋayes pipul! Gɔd nɔ de na una at, una nɔ de lisin to Gɔd in mɛsej! Una jɛs tan lɛkɛ una grampapa papa dɛn: unasɛf nɔba gri fɔ du ɛnitin we Gɔd in Spirit tɛl una fɔ du.

Zɛfinaya 3:7

I bin min se di pipul dɛn go fred am ɛn tek kɔrɛkshɔn ɛn nɔ go ɛva fɔgɛt wetin dɛn dɔn pas bɔt i tan lɛk na da tɛm de dɛn de bad mɔ ɛn mɔ.

Izikɛl 20:21

Bɔt di pikin dɛn bin ribɛl agens mi; dɛn nɔ bin du wetin mi lɔ dɛn se, ɛn nɔ bin bisin bɔt mi kɔmand dɛm, we na we mɔtalman du dɛn, dɛn go gɛt lɔŋ layf, ɛn semwe dɛn nɔ bin rɛspɛkt mi de fɔ blo ɛn rɛst. “So a bin tink na mi at se a fɔ put mi bad bad vɛksteshɔn pan dɛm, ɛn put mi krɔs pan dɛm na di say we ɛmti ɛn natin nɔ de.

Jɛrimaya 32:33

Dɛn nɔ tɔn dɛn fes to mi, na dɛn bak dɛn tɔn to mi; ɛn ɔlwe a de tich dɛm a nɔ de taya, dɛn nɔ lisin fɔ mek dɛn lan.

Ayzaya 48:4

Bikɔs a no se yu traŋayes, ɛn yu nɛk na lɛk ayɛn rop ɛn yu fɔrɛd na lɛk bras,

Izikɛl 20:16

bikɔs dɛn tɔn dɛn bak pan mi kɔmand dɛm, ɛn nɔ waka bay aw mi lɔ dɛn se, ɛn nɔ rɛspɛkt mi de fɔ blo ɛn rɛst; dat na bikɔs dɛn at bin de to dɛn laylay gɔd dɛm.

Izikɛl 20:13

Bɔt Izrɛl bin ribɛl agens mi na di say we ɛmti ɛn dray we natin nɔ de; dɛn nɔ bin du wetin mi lɔ se, bɔt tɔn dɛn bak pan mi kɔmand dɛm, we na we mɔtalman du dɛm dɛn go gɛt lɔŋ layf; dɛn disrɛspɛkt mi de fɔ blo ɛn rɛst bad bad wan. So a bin tink se a fɔ put mi vɛksteshɔn pan dɛn na di ɛmti ples we natin nɔ de, so dat dɛn ɔl go day.

Jɛrimaya 35:15

A dɔn sɛn ɔl mi wokman dɛm we na di prɔfɛt dɛn to una ɛn a de sɛn dɛm ɔltɛm se, ‘Ɔlman fɔ lɛf in ivul we ɛn lɛf wetin una de du, ɛn nɔ de biɛn ɔda gɔd dɛm de sav dɛm, datɛnde una go tap na di land we a gi una ɛn una fɔstɛmpapa dɛm.’ Bɔt una nɔ ivin put una yes lisin to mi.

Jɛrimaya 7:28

Ɛn yu go tɛl dɛm se, ‘Na di neshɔn dis we nɔ yɛri PAPA GƆD we na dɛn Gɔ in wɔd, ɛn nɔ gri mek i kɔntrol dɛm; di tru dɔn day; i nɔ de na dɛn mɔt igen

Jɛrimaya 6:8

A de wɔn una o, Jerusɛlɛm, if nɔ so, a go avɔyd una; if nɔ so a mek yu ɛmti ples, land we nɔbɔdi nɔ tap.”

Prɔvabs 8:10

Tek mi advays, i pas silva, pik sɛns, i pas piɔ gold.

Prɔvabs 5:12

na da tɛm de yu go se if a bin no. Yu aks yusɛf se, “Wetin mek a nɔ de lan lɛsin? Wetin mek a nɔ bin de yɛri wɔd?

Prɔvabs 1:5

Udat we dɔn gɛt sɛns go gɛt mɔ sɛns ɛn udat de si fa, in yay go opin mɔ

Prɔvabs 1:3

If yu fala dɛn parebul ɛn advays ya, yu go sabi aw fɔ waka na layf, yu go bi pɔsin we de du tin tret wan, ɛn trit pipul fia wan.

Di Sam Dɛm 50:17

Una et di tin dɛn we a de tɛl una fɔ du ɛn una nɔ tek mi wɔd mek natin.

Di Jɔj Dɛm 6:10

I se, in bin tɛl dɛn se in na PAPA GƆD we na dɛn PAPA GƆD, so dɛn nɔ fɔ butu to di Amɔrayt dɛn we gɛt di land, dɛn gɔd dɛn. Bɔt dɛn nɔ gri du wetin i se.

Jɛrimaya 5:3

E PAPA GƆD, nɔto di tru yu de luk fɔ? Yu dɔn bit dɛm, bɔt dɛn nɔ fil pen; yu dɔn kil sɔm pan dɛm bɔt dɛn nɔ gri tek kɔrɛkshɔn. Dɛn dɔn mek dɛn fes dɛn traŋa pas rɔk; dɛn nɔ gri fɔ chenj.