Jɛrimaya 16:19 - Krio Fɔs Oli Baybul

¹⁹ E PAPA GƆD, we de gi mi trɛnk ɛn we de protɛkt mi, yu we de kɔba mi we a gɛt trɔbul, na to yu di neshɔn dɛn go kam we go kɔmɔt ɔlsay kan tɔk se: “Dɛn nɔ lɛf natin gi wi fɔstɛmpapa dɛm pas lay lay, wɔtlɛs tin dɛm we nɔ go min natin to dɛm.

Jɛrimaya 16:19 Referans Kwoze

Ayzaya 25:4

Bɔkɔs na yu po man abop pan, di pɔsin we di wan we nɔ gɛt, abop pan we i gɛt prɔblɛm, di wan we de ayd pipul wɛn tinada de blo, ɛn di wan we de kɔba pipul we san wam; bikɔs wɛn dɛn wan we de du bad ɛn nɔ luk biɛn kin shek, i kin tan lɛk we tinada de blo pan wɔl,

Neum 1:7

PAPA GƆD na gud PAPA GƆD, i de pul pɔsin kɔmɔt pan trɔbul; i nɔ de lɛf udat go to am fɔ ɛp am to insɛf.

Jɛrimaya 17:17

Nɔ mek a fred yu; Na yu a fɔ go ayd to we a gɛt trɔbul.

Pita In Fɔs Lɛta 1:18

Unasɛf no se nɔto tin lɛkɛ silva ɛn gold we de pwɛl, dɛn tek pe fɔ pul una kɔmɔt pan di yuslɛs layf we una grampapa papa dɛn bin liv ɛn we unasɛf bin liv;

Jɛrimaya 10:5

Dɛn lay lay gɔd dɛm na lɛkɛ Ta bebi na wata mɛlɔn fam, ɛn dɛn nɔ de tɔk; pas dɛn tot dɛm, bikɔs dɛn nɔ ebul waka. Nɔ fred dɛm, bikɔs dɛn nɔ ebul du yu bad, semweso, i nɔ de pan dɛn fɔ du gud.”

Jɛrimaya 2:11

Neshɔn de we dɔn chenj in gɔd dɛm, ɔl we dɛn nɔto tru tru gɔd dɛm? Bɔt mi pipul dɛn dɔn chenj dɛn glori, fɔ tin we nɔ de bɛnifit nɔbɔdi.

Ayzaya 44:10

Udat de mek dɛn laylay gɔd, ɔ mek dɛn imej we nɔ gud fɔ natin?

Di Sam Dɛm 86:9

PAPA GƆD na yu mek ɔl dɛn neshɔn ɔl dɛn neshɔn de go kam wɔship yu; dɛn ɔl go jɔyn fɔ prez yu nem

Malakay 1:11

PAPA GƆD Ɔlmayti se, frɔm we san grap na mɔnin te di tɛm we i de go dɔŋ, nain in nem big to ɔl di neshɔn dɛn na wɔl ɛn ɔlsay we dɛn de mek sakrifays to am, nɔ kin bi bamfa wan bikɔs ɔl di neshɔn dɛn na wɔl no se in na big PAPA GƆD.

Zɛkaraya 2:11

PAPA GƆD se da tɛm de bɔku dɛn ɔda neshɔn go go ɔnda in rul ɛn insɛf go tap midul dɛn, dɔn dɛnsɛf go bi in pipul dɛn ɛn ɔlman go no se na PAPA GƆD sɛn am.

Abakɔk 3:19

Na PAPA GƆD de gi mi trɛnk. I de mek mi fut dɛn trɔŋ na grɔn lɛk aw dia yon tan we kin mek i rɔn fast dɔn i de put mi ɔp na ay ples fɔ mek natin nɔ du mi. Dis na to di kwayamasta fɔ striŋ yuz instrumɛnt dɛn lɛk ap fɔ ple am.

Izikɛl 11:16

So tɛl dɛn se, “Papa Gɔd we na Gɔd se: ɛn pan ɔl we a dɔn pul dɛn go fawe kɔmɔt nia dɛn neshɔn dɛm, ɛn pan ɔl we a dɔn skata dɛm na di difrɛn difrɛn kɔntri dɛm, a bin stil de wit dɛn fɔ lili wayl na di kɔntri dɛn we dɛn bin dɔn go.’

Ayzaya 49:6

I se: “Na smɔl tin fɔ mek yu bi mi wokman fɔ gɛda Jekɔb in difrɛn fambul dɛn ɛn fɔ briŋ di wan dɛn pan Izrɛl we a kip, kam bak; A go mek yu lɛk layt to di neshɔn dɛm, lɛ mi salveshɔn go rich usay di wɔl tap.”

Di Sam Dɛm 62:2

Nain nɔmɔ ebul fɔ kɔba ɛn sev mi; bikɔs i de kɔba mi go shek mi.

Rɛvɛleshɔn 11:15

Dɛn di enjɛl we mek sɛvin blo in trɔmpɛt. Na de a yɛri plɛnti vɔys de tɔk lawd wan na ɛvin se, “Na Gɔd we na wi Masta ɛn Mɛsaya we i sɛn kam na dis wɔl dɔn gɛt di pawa naw fɔ rul, ɛn i go rul sote go!”

Jɛrimaya 3:23

Fɔ tru, di tin dɛn we de apin na di il dɛn de mek pɔsin tink tin we nɔ bi, dat na di kayn wɔship we de na di mawnten dɛm. Fɔ tru, na PAPA GƆD we na wi Gɔd nɔmɔ go sev Izrɛl.

Ayzaya 62:2

Di wanol wɔl go si se dɛn dɔn pul yu ed kɔmɔt, ɛn ɔl di kiŋ dɛn go si di shayn we una de shayn; ɛn dɛn go gi yu nyu nem we na PAPA GƆD in sɛf sɛf go gi una.

Ayzaya 32:2

Ich ɛn ɛvri wan go bi lɛk ples fɔ ayd wɛn briz de blo, ples fɔ ayd we ebi briz de blo, lɛk watasay dɛn we de rɔn na dray ples, lɛk di shed we rɔk de mek usay di land dɔn taya.

Prɔvabs 18:10

PAPA GƆD na lɛkɛ big kɔtintri, pɔsin we de waka tret na PAPA GƆD in yay kin go ayd biɛn am.

Di Sam Dɛm 68:31

Di gɔvmɛnt go sɛn pipul frɔm Ijipt; ɛn di pipul na Ithiopia go ɔri fɔ butu es dɛn an ɛn pre to PAPA GƆD.

Di Sam Dɛm 62:7

PAPA GƆD na di wan we de sev mi ɛn mek a bi sɔmbɔdi; nain na mi sikyɔriti.

Di Sam Dɛm 46:11

PAPA GƆD, we na wi ami kɔmanda de wit wi di PAPA GƆD we wi papa Jekɔb bin de wɔship nain na wi sikyɔriti.

Di Sam Dɛm 46:7

PAPA GƆD, we na wi ami kɔmanda de wit wi di PAPA GƆD we wi papa Jekɔb bin de wɔship nain na wi sikyɔriti.

Di Sam Dɛm 46:1

PAPA GƆD na wi sikyɔriti, i rɛdi fɔ pul wi pan trɔbul ɔltɛm.

Di Sam Dɛm 27:5

We trɔbul kam, PAPA GƆD rɛdi fɔ mek sef ples fɔ mi; sef ples usay di trɔbul nɔ go mit mi.

Di Sam Dɛm 19:14

E PAPA GƆD, a de pre se mek ɔl wetin de kɔmɔt na mi mɔt, ɛn ɔl wetin de na mi at, bi wetin yu go gladi fɔ tek na mi an. Yu na mi PAPA GƆD we de kɔba mi ɛn sev mi!

Lɛta Fɔ Rom 1:25

Dɛn pipul ya nɔ gri fɔ biliv di tru wɔd bɔt Gɔd, dɛn biliv wetin nɔ tru; dɛn de pre to dɛn tin we Gɔd mek ɛn rɛspɛkt dɛn, bɔt dɛn nɔ de pre to Gɔd we mek ɔltin ɛn rɛspɛkt am, ɛn na Gɔd wi fɔ prez sote go! Emɛn.

1 Kiŋ 20:23

Na de di kiŋ na Eram in yon ɔfisa dɛn go tɛl am se di Izrɛlayt dɛn gɔd dɛn na di gɔd dɛn we de inchaj ɔf dɛn il. So na dat mek dɛn nɔ bin ebul di Izrɛlayt dɛn. Dɛn se if dɛn fɛt dɛn na lɛvul grɔn, dɛn go kɔnka dɛn.

Ayzaya 44:20

Na asis i de it; na kɔnfyus maynd dɔn mek i go astre ɛn i nɔ ebul sev insɛf ɔ aks insɛf se, “Nɔto lay dis de na mi raytan so?

Ayzaya 45:14

Na dis PAPA GƆD se: “Ijipt in jɛntri ɛn Itiopia in makit, ɛn di Sabian dɛn we na man dɛn we big ɛn ay, go kam oba to una ɛn go blant una, dɛn go de wit una; dɛn go chen dɛn briŋ dɛn kam oba to una, ɛn dɛn go butu to una. Dɛn go beg una se, “Na una nɔmɔ PAPA GƆD de wit, ɛn nɔn ɔda Gɔd nɔ de, nɔn ɔda gɔd nɔ de apat frɔm am;”

Jɛrimaya 2:8

Di man dɛm we de mek sakrifays fɔ pipul sin nɔ bin aks se, ‘We PAPA GƆD?’ Dɛn wan dɛn we de andul di lɔ nɔ bin no mi; di rula dɛn sin agens mi; di prɔfɛt dɛn bin de prɔfisay se na Beal tɛl dɛn so, ɛn dɛn bin put at pan tin dɛn we nɔ go mek dɛn bɛtɛ.

Jɛrimaya 4:2

ɛn if una swɛ se, ‘Wans PAPA GƆD de,’ fɔseka di tru, fɔ jɔstis sek, ɛn fɔ tretwaka, na da tɛm de ɔl dɛn neshɔn dɛm go blɛs dɛnsɛf insay in nem ɛn na wit in nem dɛn go mek mɔt.”

Jɛrimaya 12:16

Dɔn, if dɛn go tek tɛm lan fɔ liv di we we mi pipul dɛn liv, fɔ tek mi nem swɛ se, ‘Wans PAPA GƆD de,’ lɛk aw dɛn bin lan mi pipul dɛm fɔ swɛ wit Beal in nem, na da tɛm de dɛn go ebul mek ɔp dɛnsɛf we dɛn de wit mi pipul dɛm.

Jɛrimaya 33:9

Ɛn a go de gladi fɔ yɛri dis siti in nem. I go bi prez ɛn glori to ɔl di neshɔn dɛm na wɔl, neshɔn dɛn we go yɛri bɔt ɔl di gud tin we a de du fɔ dɛm: dɛn go fred ɛn trimbul fɔseka ɔl di gud ɛn ɔl di jɛntri we a de provayd fɔ dɛm.

Joɛl 3:16

PAPA GƆD mek nɔys lɛkɛ layɔn na Mawnt Zayɔn. In vɔys lɛk tɛnda na Jerusɛlɛm; ɛn ɛvin ɛn ath go trimbul. Bɔt PAPA GƆD go bi di sikyɔriti fɔ in pipul, di kɔtintri fɔ di Izrɛlayt dɛn.

Emɔs 2:4

PAPA GƆD tɔk se: “Di pipul na Juda dɔn sin bɔku bɔku, ɛn a mɔs pɔnish dɛn fɔ dat. Dɛn nɔ gri kip di lɔ we mi PAPA GƆD gi dɛn, ɛn dɛn nɔ du wetin a se, bifo dat na lay lay gɔd dɛn sidɔm fɔ de wɔship, dɛn gɔd dɛn we dɛn fɔstɛm-papa dɛn bin de wɔship.

Di Sam Dɛm 18:3

A de pre to PAPA GƆD bikɔs i fit fɔ prez, ɛn i de sev mi frɔm mi ɛnimi dɛn an.

Di Sam Dɛm 65:3

Wɛn wi bad bin dɔn tumɔs pan wi, yu fɔgiv wi sin dɛn.

Jɛrimaya 10:3

bikɔs na fɔls kɔstɔm di neshɔn dɛn gɛt. Dɛn kɔt wan tik na di fɔrɛst, ɛn man we de wok wit in an tek aks kav am.

Jɛrimaya 14:8

E ya, yu we na yu Izrɛl abop pan, yu we kin sev am we i gɛt trɔbul, wetin mek yu fɔ tan lɛkɛ trenja na di land, lɛkɛ pɔsin we de travul we kan beg fɔ slip fɔ di nɛt?