Jɛrimaya 16:15 - Krio Fɔs Oli Baybul

¹⁵ bɔt dɛn go se, ‘Wans PAPA GƆD de, PAPA GƆD we pul di Izrɛlayt dɛn kɔmɔt na di nɔt kɔntri, ɛn ɔl dɛn difrɛn kɔntri we in bin dɔn drɛb dɛn go.’ Bikɔs a go briŋ dɛm kam bak na dɛn yon land we a bin dɔn gi dɛn fɔstɛmpapa dɛm.

Jɛrimaya 16:15 Referans Kwoze

Jɛrimaya 32:37

Biliv mi, a go gɛda dɛm kɔmɔt na ɔl di kɔntri dɛm we a bin drɛb dɛn go we a bin vɛks ɛn mi at bin wam bad bad wan; a go briŋ dɛn kam bak na ya, ɛn a go mek dɛn sef.

Jɛrimaya 24:6

A go gyad dɛm sote go, ɛn a go briŋ dɛm kam bak na dis land. Nɔto brok a go brok dɛm, na bil a go bil dɛm; nɔto rut a go rut am, na plant a go plant am.

Jɛrimaya 3:18

Dɛn tɛm dɛn de, di Juda fambul go jɔyn wit di Izrɛl fambul, ɛn una go kɔmɔt na di land na di nɔt togɛda, go na di land we a bin gi una fɔstɛmpapa dɛm as dɛn yon prɔpati.

Emɔs 9:14

A go briŋ mi pipul kam bak na dɛn land, dɛn go bil dɛn siti bak ɛn tap de; dɛn go plant vayn ɛn drink in wayn, dɛn go plant ɛn it wetin dɛn plant.

Izikɛl 39:28

Na datɛnde, dɛn go no se na mi PAPA GƆD we na dɛn yon Gɔd, bikɔs a bin sɛn dɛn go ɛgzayl na di neshɔn dɛm, ɛn dɛn, gɛda dɛn kam bak na dɛn yon kɔntri. A nɔ go mek ɛni pan dɛm lɛf pan di neshɔn dɛm igen igen;

Izikɛl 36:24

Fɔ a go tek una kɔmɔt pan di neshɔn dɛm ɛn gɛda una kɔmɔt pan ɔl di kɔntri dɛm ɛn briŋ una kam insay una yon kɔntri.

Di Sam Dɛm 106:47

E PAPA GƆD wi PAPA GƆD, kɛr wi go bak usay wi fɔ de so dat we go tɛl yu tɛnki ɛn blɔf we wi de prez yu oli nem.

Jɛrimaya 31:8

A de tɛl una, a go briŋ dɛn kam kɔmɔt na di nɔt kɔntri, ɛn gɛda dɛm kɔmɔt na di say we far pas ɔl na dis wɔl, ɛn di blɛnyay ɛn di wan dɛn we lem go de pan dɛm, togɛda wit dɛn bɛlɛuman dɛm ɛn di wan dɛn we de lebɔ; dɛn go kam bak as plɛnti plɛnti pipul.

Jɛrimaya 30:10

PAPA GƆD se, so nɔ fred natin. Yu Jekob we na mi wokman, ɛn unasɛf Izrɛl nɔ pwɛlat; bikɔs a ebul sev una ivin we a de fa, ɛn a ebul sev una pikin dɛn kɔmɔt na di land we dɛn mek dɛm slev. Jekob go tɔmbak kam ɛn i go gɛt kolat ɛn alafia, ɛn nɔbɔdi nɔ go gi am kɔtat.

Jɛrimaya 30:3

PAPA GƆD se, Bikɔs di tɛm de kam we a go gi mi pipul dɛm we na Izrɛl ɛn Juda, dɛn jɛntri bak, ɛn a go briŋ dɛm kam bak na di land we a bin gi dɛn fɔstɛmpapa dɛm, ɛn dɛn go tek am fɔ dɛnsɛf.”

Ayzaya 14:1

PAPA GƆD go sɔri fɔ Jekɔb ɛn go pik Izrɛl bak, ɛn go put dɛn na dɛn yon land. Fɔrina dɛn go kam tap wit dɛn, ɛn di Izrɛlayt dɛn go ol dɛn tayt lɛk dɛnsɛf blant Jekɔb in os.

Jɛrimaya 50:19

A go mek Izrɛl go bak na dɛn land, ɛn i go it na Mawnt Kamɛl ɛn na Beshan, ɛn dɛn go gɛt ɔl wetin dɛn want na di il dɛm na Ifrem ɛn na Giliad.

Jɛrimaya 23:8

bɔt go de se, ‘Wans PAPA GƆD de we pul Izrɛl in jɛnareshɔn dɛm ɛn de bifo dɛn fɔ kɔmɔt na di nɔt kɔntri, ɛn ɔl di kɔntri dɛm we i bin dɔn drɛb dɛm go.’ Da tɛm de, dɛn go tap na dɛn yon land.”

Jɛrimaya 23:7

“PAPA GƆD se, fɔseka dat, a de tɛl una, di tɛm de kam we mɔtalman go lɛf fɔ de se, ‘Wans PAPA GƆD we pul Izrɛl kɔmɔt Ijipt, de,’

Jɛrimaya 29:14

una go fɛn mi ɛn a go gi una ɔl una jɛntri bak ɛn gɛda una kɔmɔt na ɔl di neshɔn dɛn ɛn ɔl di ples dɛn we a bin dɔn drɛb una go, ɛn a go briŋ una bak na di ples we a drɛb una kɔmɔt go ɛgzayl. Na so PAPA GƆD se.

Joɛl 3:1

PAPA GƆD se we da tɛm de rich we i go gi Juda ɛn Jerusɛlɛm dɛn prɔpati dɛn bak,

Jɛnɛsis 28:15

Mɛmba se, A go de wit yu ɛnisay yu go. A go gyad yu, ɛn briŋ yu kam bak na dis land. A nɔ go kɔmɔt biɛn yu sote a dɔn du ɔl wetin a dɔn prɔmis yu.”

Jɛrimaya 12:15

Ɛn afta a dɔn rut dɛm kɔmɔt, a go sɔri fɔ dɛm, ɛn a go briŋ dɛn ɔl kam bak, ich to in pipul dɛn, ɛn ich wan, to dɛn land.

Jɛrimaya 23:3

Dɔn a go gɛda di wan dɛn we lɛf pan mi ship dɛm kɔmɔt na ɔl di difrɛn kɔntri dɛm we a dɔn drɛb dɛm go, ɛn a go briŋ dɛm kam bak na dɛn os, ɛn dɛn go ebul bɔn ɛn dɛn go plɛnti.

Emɔs 9:15

A go put mi pipul na di land we a gi dɛn, ɛn nɔbɔdi nɔ go pul dɛn kɔmɔt de igen” Na mi PAPA GƆD dɔn tɔk so.