Jɛrimaya 15:6 - Krio Fɔs Oli Baybul

⁶ PAPA GƆD se, yu bin dɔn tɔn yu bak pan mi, ɛn yu bin jɛs de go biɛn; so a tek akshɔn agens yu ɛn nyakanyaka yu; – A nɔ go ebul sɔri fɔ una igen

Jɛrimaya 15:6 Referans Kwoze

Jɛrimaya 7:24

Bɔt dɛn nɔ obe mi ɛn nɔ ivin pe atɛnshɔn to mi, bɔt dɛn bin de du wetin dɛn maynd tɛl dɛm ɛn wetin dɛn stɔbɔn at dɛn se, ɛn bin jɛs de go biɛn; dɛn nɔ go bifo wan stich.

Zɛfinaya 1:4

I se in go pɔnish di pipul dɛn na Juda ɛn ɔl udat tap na Jerusɛlɛm. I se in go pwɛl di balans tin we lɛf pan dɛn tin dɛn we dɛn de yuz fɔ wɔship Beal, wit dɛn man dɛn we de fɔ de mek sakrifays to Beal.

Zɛkaraya 7:11

Bɔt usay! Dɛn nɔ lisin to wetin i se. Bifo dat, dɛn mek traŋayes ɛn kɔk dɛn yes so dat dɛn nɔ go yɛri.

Ozie 11:7

I se sins di pipul dɔn mekɔp fɔ lɛf am to insɛf, na dɛnsɛf dɔn pik se tin fɔ traŋa fɔ dɛn ɛn nɔbɔdi nɔ go ebul ɛp dɛm.

Ayzaya 1:4

E, neshɔn we gɛt sin, pipul we de du so so bad, pikin we bad pipul bɔn, bɔypikin dɛn we kɔrɔpt! Dɛn dɔn kɔmɔt biɛn PAPA GƆD, dɛn nɔ rɛspɛkt di Oli Wan na Izrɛl dɛn dɔn kɔmɔt biɛn am kpatakpata.

Ozie 13:14

I se in nɔ go ebul fɔ mek dɛn nɔ day. In nɔ go tap day fɔ tek dɛn go, so day kin mek dɛn sik ɛn day. Day kin pwɛl dɛn kpatakpata ɛn in nɔ go sɔri fɔ dɛnsɛf.

Izikɛl 25:7

a de tɛl una, a dɔn rɛdi fɔ dil wit una, ɛn gi una lɛk prɛzɛnt to ɔda neshɔn dɛm; ɛn a go pul una kɔmɔt pan di pipul dɛn, ɛn mek una day kɔmɔt lɛf di ɔda kɔntri dɛm; a go dɔnawe wit una. Na da tɛm de una go no se na mi na PAPA GƆD.

Jɛrimaya 6:19

Yɛri o, yu ath, a de briŋ dizasta kam pan dɛn pipul ya, we na di pe we dɛn fɔ gɛt fɔ di wok we dɛn du, bikɔs dɛn nɔ yɛri mi wɔd; as fɔ mi lɔ dɛm, dɛn nɔ de obe dɛm sɛf.

Jɛrimaya 6:11

Fɔseka dat, PAPA GƆD in sem vɛksteshɔn ful insay mi; A dɔn taya fɔ bia kip am insay mi. “Empti am pan dɛn pikin na trit, ɛn igen, pan dɛn yɔŋbɔy dɛm ɔl usay dɛn gɛda; dɛn go kɛr mared man ɛn in wɛf go, di ol grani ɛn grampa dɛm, ɛn di wan dɛnsɛf we dɔn olpasmak.

Jɛrimaya 2:17

Nɔto unasɛf dɔn mek dis apin to una, we una fɔsek PAPA GƆD, we na una Gɔd, we i de bifo una na rod?

Jɛrimaya 1:16

Ɛn a go pas mi jɔjmɛnt agens dɛm, fɔ ɔl dɛn wikɛdnɛs we dɛn fɔseka mi; dɛn dɔn bɔn insɛns to dɛn ɔda gɔd dɛm, ɛn wɔship di tin dɛn we dɛn mek wit dɛn yon an.

Ozie 4:16

I se lɛk aw yɔŋ uman kaw kin traŋayes na so Izrɛl traŋayes; na so PAPA GƆD nɔ go ebul fɔ gi dɛn wetin dɛn want ivin if dɛn de usay gras bɔku.

Izikɛl 14:9

Ɛn if dɛn lay gi di prɔfɛt ɛn i tɔk ɛnitin, na mi PAPA GƆD nɔ go dɔn tɔk tru, ɛn a go dil wit am, ɛn a go kil am kɔmɔt midul mi pipul dɛn, we na Izrɛl.

Jɛrimaya 20:9

If a mekɔp se, “A nɔ go tɔk bɔt am, ɔ nɔ tɔk bɔt in nem igen,” sɔntin de insay mi at, we tan lɛk faya insay mi bon dɛm, ɛn a taya fɔ ol am insay, ɛn a nɔ ebul kip am igen

Jɛrimaya 8:5

Wetindu dɛn pipul ya dɔn tɔn dɛn bak pan mi ɛn nɔ gri tɔn bak? Dɛn biliv pan lay lay tin dɛn gud gud wan, ɛn nɔ gri tɔn bak kam to mi.

Jɛrimaya 2:19

PAPA GƆD Ɔlmayti se, una wikɛdnɛs go pɔnish una, ɛn di fɔsek we una fɔsek mi go jɔj una. Una no ɛn si se na bad bad ɛn bita tin fɔ una fɔ fɔsek PAPA GƆD we na una Gɔd; una nɔ rɛspɛkt mi wan.

Jɛrimaya 2:13

bikɔs mi pipul dɛn dɔn du tu bad bad tin; dɛn dɔn fɔsek mi, we na di say we wata we de gi layf de kɔmɔt, ɛn dɛn dɔn dig wɛl dɛm fɔ dɛnsɛf, wɛl dɛn we broko broko we nɔ de ol wata.

Ayzaya 28:13

Na dat mek, to dɛn, PAPA GƆD in wɔd go bi tichin pan tichin, tichin pan tichin, layn bay layn, layn bay layn, lilibit ya, lilibit yanda; so dat dɛn go go, ɛn fɔdɔm wit dɛn bak, ɛn wund, trap kech dɛm ɛn dɛn kapchɔ dɛn.

Ayzaya 31:3

Di Ijipshian dɛn na mɔtalman, dɛn nɔto Gɔd; ɛn dɛn ɔs na flɛsh ɛn blɔd, ɛn nɔto spirit. We PAPA GƆD tret in an, di wan we de ɛp go bɔkfut, ɛn di wan we dɛn ɛp go fɔdɔm, ɛn dɛn ɔl go day togɛda.

Jɛrimaya 6:12

Dɛn go gi ɔda pipul dɛn, dɛn os dɛm, wit dɛn fam ɛn dɛn wɛf dɛm sɛf; bikɔs a go pɔnish di pipul dɛn na di land,” na so PAPA GƆD se.”

Jɛrimaya 7:16

“As fɔ yu, nɔ pre fɔ dɛn pipul dɛn ya, ɔ kray ɔ ala de pre fɔ dɛm, ɛn nɔ tray fɔ chenj mi maynd, bikɔs a nɔ go lisin yu.

Jɛrimaya 8:9

Dɛn go mek di sɛnsman dɛn shem, dɛn go kɔnfyus ɛn dɛn go kech dɛm; wetindu? Dɛn dɔn put PAPA GƆD in wɔd wansay, uskayn sɛns dɛn gɛt naw?

Izikɛl 35:3

ɛn tɛl am se, PAPA GƆD se: una lisin, a de agens yu Mawnt Seir, ɛn a go tret mi an pan yu, ɛn a go mek yu bi wan ples we nɔbɔdi ɛn natin nɔ de.

Jɛrimaya 13:14

PAPA GƆD se, “A go kech tu pɔsin baŋ dɛn pan dɛnsɛf; a go baŋ papa ɛn pikin. A nɔ go fil am fɔ nɔbɔdi, ɔ nɔ go lɛf nɔbɔdi ɔ a sɔri fɔ ɛnibɔdi, we go mek a nɔ dɔnawe wit am.”

Jɛrimaya 44:22

PAPA GƆD nɔ bin ebul bia di bad bad tin dɛm ɛn di tin dɛm we i et bad bad wan we una dɔn du; na dat mek una land dɔn tɔn gud fɔ natin, i dɔn gɛt swɛ ɛn nɔbɔdi nɔ tap de, lɛk aw i de lɛkɛ tide.