Jɛrimaya 12:13 - Krio Fɔs Oli Baybul

¹³ Dɛn dɔn plant wit, ɛn dɛn avɛst chuk chuk, dɛn dɔn yagba dɛnsɛf te dɛn dɔn taya, bɔt nɔ prɔfit natin. Dɛn go shem fɔseka dɛn avɛst fɔseka PAPA GƆD in bad bad vɛksteshɔn.”

Jɛrimaya 12:13 Referans Kwoze

Egay 1:6

Dɛn de plant bɔku sid bɔt nɔto ɔl de bia, dɛn de it, bɔt dɛn nɔ de bɛlful; we dɛn wɛr klos sɛf, kol stil de kech dɛn ɛn i tan lɛk we dɛn pe dɛn na bɔs bag dɛn de put di mɔni.

Mayka 6:15

We una plant ɛnitin i nɔ go gro, una nɔ go ivin ebul fɔ yuz di ɔyl we una kwis dɔn una nɔ go drink di wayn we una mek.

Ditarɔnɔmi 28:38

Lokɔs go it ɔl wetin dɛn plant na dɛn fam dɛn.

Ayzaya 55:2

Wetin du una de spɛnd una kɔpɔ pan tin we nɔto tin fɔ it, ɛn put yu lebɔ pan tin we nɔ de mek yu satisfay? Lisin mi gud gud wan, ɛn it wetin gud, ɛn gladi fɔ dɛn rich it dɛn.

Lɛvitikɔs 26:16

na dɛn tin ya i go du: i go mek siriɔs waala mit dɛn we go mek dɛn sik bad wit ay ay fiva we go mek dɛn yay de rɔn wata ɔltɛm ɛn dɛn bɔdi de wes. Ɛn dɛn go plant fɔ natin bikɔs na dɛn ɛnimi dɛn go gɛt fɔ it wetin dɛn plant.

Abakɔk 2:13

Di pipul dɛn we dɛn fos fɔ wok na fɔ natin bikɔs ɔl wetin dɛn bil gɛt fɔ bɔn na faya. Na dat PAPA GƆD go du.

Jɛrimaya 4:26

A luk, eya, da land we plant bin de gro fayn fayn wan, dɔn tɔn ɛmti ples we pipul nɔ go ebul tap, ɛn ɔl in siti dɛn dɔn broko broko bifo PAPA GƆD, ɛn bifo in bad bad vɛksteshɔn.

Lɛta Fɔ Rom 6:21

Wetin una bin gen wɛn una bin de du dɛn tin we una de shem fɔ du naw? Na day dɛn kayn tin de, de briŋ.

Lɛvitikɔs 26:20

da tɛm de dɛn go jɛs de wes dɛn tɛm fɔ natin bikɔs natin nɔ gɛt fɔ gro na di grɔn.

Jɛrimaya 9:5

Ɔlman de disiv in neba, ɛn nɔbɔdi nɔ de tɔk tru; dɛn dɔn lan dɛn mɔt fɔ lay; dɛn de kɔmit sin ɛn kin fil taya pasmak fɔ ripɛnt.

Jɛrimaya 17:10

“Mi PAPA GƆD, sach mɔtalman maynd ɛn tɛst mɔtalman at, fɔ pe ɔlman bay wetin i du, di pe we i fɔ gɛt fɔ di kayn wok we i wok.”

Di Sam Dɛm 78:62

I mek dɛn kil in pipul pan wa. I vɛks bad pan di pipul we i tek fɔ bi in yon.

Ozie 8:7

We dɛn du smɔl bad, na big wande mit dɛn. Rɛs ed we tinap nɔ gɛt ed, so i nɔ go pul natin fɔ it; if i bin gɛt sɛf, na fɔrina dɛn go it am.

Egay 1:9

I se we dɛn kin dɔn plant, dɛn de abop se na bɔku tin dɛn go gɛt, bɔt usay! Di smɔl bit sɛf we dɛn kin briŋ kam na os kin jɛs skata lɛk na briz blo ɔl go. Dis na bikɔs dɛn jɛs lɛf Papa GƆD in os fɔ de brokbrok wan ɛn ɔlman bizi de mek in yon os fayn.