Jems 1:27 - Krio Fɔs Oli Baybul

²⁷ Pɔsin we de fala Gɔd fɔ de ɛp dɛn pikin we nɔ gɛt mama ɛn papa ɛn dɛn uman we dɛn man dɔn day. I fɔ tek tɛm mek dɛn bad pipul na wɔl nɔ mek insɛf bigin du bad. Na so Gɔd we na di Papa want pɔsin we de fala am fɔ tan.

Jems 1:27 Referans Kwoze

Lɛta Fɔ Rom 12:2

Una nɔ fɔ de du lɛkɛ aw di pipul dɛn na dis wɔl de du, bɔt una fɔ lɛ Gɔd chenj una at so dat ɔl wetin una de tink ɛn du go chenj. Dat go mek una ebul no wetin Gɔd want; dat na: wetin gud, wetin Gɔd lɛk, ɛn wetin nɔbɔdi nɔ go ebul fɛn fɔlt pan.

Jems 4:4

Una tan lɛkɛ uman we nɔ tret wit in man! Una nɔ no se wɛn una lɛk dɛn tin we de na wɔl, dat go mek una nɔ lɛk Gɔd? Ɛnibɔdi we want dɛn tin na wɔl dɔn bi pɔsin we nɔ lɛk Gɔd.

Fɔs Lɛta To Timoti 5:4

Bɔt if uman we in man dɔn day gɛt pikin ɔ grampikin, in pikin ɔ grampikin fɔ du wetin ɔl pikin ɛn grampikin fɔ du fɔ dɛn mami ɛn dadi ɛn fɔ dɛn grani ɛn grandadi dɛn fɔ gi dɛn ɔl wetin dɛn fɔ gɛt, bikɔs if dɛn du dat, Gɔd go satisfay wit dɛn.

Di Sam Dɛm 119:1

Dɛn pipul we liv aw PAPA GƆD se dɛn fɔ liv, gɛt blɛsin bikɔs dɛn nɔ go gɛt bɔt na dɛn layf.

Fɔs Lɛta To Timoti 1:5

Gɔd sɛn wi fɔ ɛp pipul mek dɛn gɛt da lɛk we kɔmɔt insay klin at, ɛn we pɔsin we de tray fɔ du ɔl wetin rayt, gɛt, ɛn we pɔsin we biliv Gɔd fɔ tru, gɛt.

Lyuk 1:6

Zakaraya ɛn Ilizabɛt bin de waka tret wit Gɔd. Dɛn bin de kip ɔl di Ju Lɔ ɛn dɛn bin de du ɔl wetin Gɔd tɛl dɛn fɔ du.

Di Sam Dɛm 68:5

Nain na papa to udat nɔ gɛt papa, ɛn i de fɛt fɔ poman. In na di PAPA GƆD na ɛvin.

Matyu 5:8

“Dɛn wan we gɛt klin at, gɛt blɛsin, bikɔs dɛn go de usay Gɔd de!

Ayzaya 1:23

Una bigman dɛn ɔl na rebɛl ɛn de waka wit tifman dɛm. Ɔlman lɛk fɔ tek brayb dɛn de rɔnata prɛzɛnt. Dɛn nɔ fɛt fɔ di wan dɛn we dɛn papa dɔn day, ɛn nɔ bisin bɔt dɛn uman dɛn we dɛn man dɔn day, dɛn kes.

Jɔn In Fɔs Lɛta 5:18

Wi no se ɛni bɔdi we de waka wit Gɔd nɔ de sin, bikɔs Gɔd in Pikin de gyad am ɛn Setan nɔ ebul am.

Jems 3:17

Di sɛns we Gɔd de gi, na pɔsin wit klin at i de gi, na di fɔs tin dat. Pɔsin we gɛt da kayn sɛns de nɔ de mek plaba, i nɔ de ambɔg, i de du tin saful saful, ɛn i lɛk fɔ ɛp pipul; i gɛt sɔri at ɛn i de du plɛnti plɛnti gud; ɔl in at de fɔ Gɔd, i nɔ ipokrit.

Lɛta Fɔ Galeshya 6:14

Fɔ mi yon pat, a go bost nɔmɔ bɔt di day we Masta Jizɔs Krays day na di krɔs. Na di day we Jizɔs day na di krɔs mek natin nɔ ful mi yay na dis wɔl, ɛn a jɛs tan lɛkɛ dayman; dis wɔl nɔ gɛt natin fɔ du wit mi.

Lɛta Fɔ Galeshya 1:4

Krays bin gri fɔ mek dɛn kil am fɔseka di bad tin dɛn we wi de du, so dat i go pul wi kɔmɔt na di wɔl we de naw we bad plɛnti. Di day we Krays day sho wi se i du wetin Papa Gɔd want.

Lɛta Fɔ Galeshya 5:6

Wans wi gɛt wanwɔd wit Krays, if wi sakɔmsayz ɔ wi nɔ sakɔmsayz, dat nɔ min natin. Bɔt di tin we gud pas ɔl nain dis: pipul fɔ no se wi biliv pan Krays bay aw wi lɛk wi kɔmpin mɔtalman.

Ditarɔnɔmi 14:29

so dat di Livayt we dɛn nɔ gɛt land, di trenja dɛn, di pikin dɛn we dɛn mami ɛn dadi dɛn dɔn day ɛn di uman dɛn we dɛn man dɛn dɔn day, go go de lɛ dɛn gi dɛn tin dɛn we dɛn go de it. We dɛn gɛt it fɔ mek dɛn bɛlful, PAPA GƆD we na dɛn PAPA GƆD go gladi ɛn i go blɛs ɔltin we dɛn put an pan.

Di Sam Dɛm 146:9

PAPA GƆD bisin bɔt di trenja ɛn de luk afta dɛn pikin we nɔ gɛt papa ɛn dɛn uman we dɛn man dɔn day, bɔt i nɔ de lɛ di bad man si bɛtɛ pan ɛnitin we i put in an pan.

Matyu 12:32

Gɔd go padin ɛnibɔdi we tɔk sɔntin we nɔto tru bɔt Mɔtalman Pikin, bɔt Gɔd nɔ go padin ɛnibɔdi we tɔk bad bɔt in Spirit; i nɔ go padin am na dis wɔl, i nɔ go padin am na nɛks wɔl.

Lɛta Fɔ Rom 2:13

Nɔto we pɔsin yɛri wetin di Lɔ se de mek Gɔd padin am ɛn briŋ am kam bak to insɛf, bɔt na we i du wetin di Lɔ se.

Lɛta Fɔ Galeshya 3:11

Na tru se nɔto we pɔsin du wetin di Ju Lɔ se, go mek ɔltin rayt bitwin in ɛn Gɔd, bikɔs wi rid na Gɔd in Buk se, “Na we pɔsin biliv Gɔd, na dat mek Gɔd go mek ɔltin rayt bitwin in ɛn insɛf ɛn na dat go mek i liv tru layf.”

Lɛta Fɔ Ɛfisɔs 2:2

Da tɛm de una bin de du ɔl dɛn bad tin we di pipul dɛn na di wɔl de du. Una bin de du wetin di dɛbul dɛn edman we de ɔlɔbɔt tɛl una fɔ du, nain de rul dɛn pipul we nɔ de du wetin Gɔd tɛl dɛn fɔ du.

Taytɔs 2:12

We i gud, i de sho wi se wi fɔ lɛf fɔ liv lɛkɛ pipul we nɔ no am, wi fɔ lɛf dɛn bad tin we wi want du na di wɔl, ɛn lan fɔ kɔntrol wisɛf, fɔ waka tret, ɛn fɔ waka wit am na dis wɔl,

Jems 3:9

Tɛm de we wi kin tek wi mɔt tɛl wi Masta ɛn wi Papa tɛnki, bɔt ɔda tɛm wi kin tek di sem mɔt kɔs mɔtalman we Gɔd mek lɛkɛ insɛf.

Pita In Sɛkɛn Lɛta 1:4

Na dat mek Gɔd dɔn gi wi dɛn wɔndaful blɛsin we mɔni nɔ kin bay, we i bin dɔn prɔmis, so dat we una gɛt dɛn tin ya, una nɔ go de fala una at fɔ du dɛn bad tin we dɔn pwɛl di wɔl, bɔt una go du dɛn tin we Gɔd insɛf kin du.

Pita In Sɛkɛn Lɛta 2:20

If pipul dɔn no wi Masta Jizɔs Krays, ɛn i dɔn pul dɛn kɔmɔt pan dɛn layf we de pwɛl pɔsin na dis wɔl, dɔn dɛn tɔn bak go liv dɛn kayn bad layf de bak ɛn dɛn nɔ ebul lɛf dɛn igen, dɛn layf go bad pas aw i bin tan bifo dɛn no Jizɔs Krays.

Pita In Sɛkɛn Lɛta 3:14

So, mi padi dɛn we a lɛk, we una de wet fɔ dis nyu ɛvin ɛn dis nyu wɔl ya, una fɔ tray mek Gɔd nɔ fɛn ɛni fɔlt na una layf ɛn una go gɛt kol at fɔseka dat.