Lɛta Fɔ Galeshya 3:1 - Krio Fɔs Oli Baybul

¹ Una dɛn pipul we kɔmɔt Galeshya, una nɔ gɛt sɛns! Udat de wich una mek una nɔ ebul no wetin una de du? A bin dɔn tɛl una plen wan aw pipul bin kil Jizɔs Krays na di krɔs.

Lɛta Fɔ Galeshya 3:1 Referans Kwoze

2 Kɔrint 11:3

A de fred mek sɔm ɔda tin dɛn nɔ go na una ed we go mek una nɔ de fɔ Krays in wangren, jɛs lɛkɛ aw di snek bin tek kɔni sɛns mek Iv ful.

Rɛvɛleshɔn 2:20

Bɔt na wan tin a de blem una fɔ, una de gri mek da uman we dɛn kɔl Jɛzibɛl sidɔm wit una. I de se na Gɔd in pawa in de tek tɔk di wɔd dɛn we i de tɔk, bɔt na lay i de lay gi mi pipul dɛn; i de mek dɛn ful ɛn dat go mek dɛn wan we dɔn mared, liv fri layf; ɛn mek pipul it it we dɛn bin dɔn gi dɛn tin we mɔtalman de pre to.

Lɛta Fɔ Galeshya 1:6

A wɔnda pan una we kwik kwik wan so una dɔn lɛf fɔ fala Gɔd we kɔl una bikɔs Krays gud to una. Una de tek ɔda mɛsej se na di Gud Nyuz.

Pita In Fɔs Lɛta 4:17

Di tɛm we Gɔd go jɔj di wɔl nɔ fa igen, ɛn nain yon pipul dɛn fɔs i go jɔj. If Gɔd bigin wit wi we nain yon, aw tin go tan fɔ dɛn wan we nɔ biliv di Gud Nyuz we Gɔd sɛn to mɔtalman?

Pita In Sɛkɛn Lɛta 2:18

Dɛn de bost bost we nɔ min natin ɛn dɛn liv fri layf; na dat dɛn de tek drɔ dɛn pipul we jɛs bigin lɛf dɛn bad we fɔ mek dɛn fala dɛn, fɔ bigin liv bad layf bak.

Di Ibru Pipul Dɛn 11:8

Na bikɔs Ebraam bin biliv Gɔd mek i du wetin Gɔd tɛl am fɔ du wɛn Gɔd kɔl am ɛn sɛn am fɔ go na di ples we i prɔmis fɔ gi am. I grap ɛn go, pan ɔl we i nɔ bin no di ples we i de go.

Lɛta Fɔ Ɛfisɔs 4:14

Da tɛm de wi nɔ go liv lɛkɛ pikin we kin chenj wetin dɛn biliv wɛn dɛn yɛri nyu tin, ɔ wɛn pɔsin mek dɛn ful.

Lɛta Fɔ Galeshya 4:9

Bɔt we una dɔn no Gɔd, ɔ a fɔ se, Gɔd dɔn no una; wetin mek una want tɔn bak go bi slev to di spirit dɛn we nɔ gɛt pawa ɛn we nɔ min natin? Wetin mek una want go bi dɛn slev bak?

Lɛta Fɔ Galeshya 3:3

Una nɔ gɛt sɛns? Gɔd in Spirit dɔn mek una bigin fɔ liv dis nyu layf. Una min se na bay una yon pawa una go liv di nyu layf we una dɔn bigin liv, sote go?

Pita In Fɔs Lɛta 1:22

Naw we una de fala dɛn tru tin we dɛn lan una bɔt Jizɔs Krays, we mek una dɔn lɛf fɔ du bad, ɛn mek una layf dɔn klin, ɛn mek una lɛk una kɔmpin Kristiɛn dɛn fɔ tru, una fɔ lɛk dɛn naw wit ɔl una at.

Di Ibru Pipul Dɛn 5:9

Wɛn Jizɔs dɔn sho se in ebul du ɔltin, i kam bi di wan we de sev ɔl dɛn pipul we de du wetin i tɛl dɛn fɔ du, ɔltɛm.

Lɛta Fɔ Ɛfisɔs 5:15

Una tek tɛm aw una liv una layf, una nɔ du lɛkɛ dɛn pipul we nɔ gɛt sɛns.

Fɔs Lɛta To Timoti 6:4

da pɔsin de prawd bad ɛn i nɔ sabi natin; i jɛs lɛk fɔ de agyu ɛn mek plaba fɔ wan wan wɔd dɛn, ɛn dat bad bikɔs i de mek pipul jɛlɔs dɛn kɔmpin, i de mek dɛn nɔ gɛt wanwɔd, i de mek dɛn kɔs dɛn kɔmpin ɛn mek dɛn luk se dɛn kɔmpin want du dɛn bad;

Lɛta Fɔ Galeshya 2:14

Wɛn a si se dɛn nɔ de du di rayt tin we de na di Gud Nyuz, a tinap bifo ɔl di ɔda Kristiɛn dɛn ɛn tɛl Pita se, “Yu na Ju man, bɔt yu de du lɛkɛ se yu nɔto Ju. Wetin mek yu de pin naw se dɛn pipul we nɔto Ju fɔ de du lɛkɛ aw dɛn Ju de du?”

1 Kɔrint 11:26

Sote di Masta kam bak, ɛnitɛm una de it dis bred ɛn drink dis wayn, una de mek pipul no se di Masta day fɔ mɔtalman.

1 Kɔrint 2:2

Ɔl di tɛm we a bin de wit una, a bin mekɔp fɔ jɛs de tɔk nɔmɔ bɔt Jizɔs Krays we dɛn kil na di krɔs.

Lɛta Fɔ Rom 6:17

Wi fɔ tɛl Gɔd tɛnki, bikɔs fɔs tɛm una na bin slev ɔnda sin, bɔt naw una dɔn tay una at fɔ du ɔl dɛn tru tin we dɛn bin lan una bɔt Gɔd.

Lɛta Fɔ Rom 2:8

Bɔt ɔda pipul jɛs liv fɔ dɛnsɛf ɛn dɛn nɔ de gri fɔ du wetin dɛn fɔ du, dɛn de du wetin dɛn nɔ fɔ du; Gɔd go vɛks pan dɛn ɛn pɔnish dɛn.

Apɔsul Dɛn Wok 6:7

Na dat mek Gɔd in wɔd go ɔlsay ɛn mɔ ɛn mɔ pipul biliv pan Jizɔs na Jerusɛlɛm, ɛn plɛnti pan dɛn man we de mek sakrifays fɔ pipul sin gri fɔ biliv pan Jizɔs Krays.

Rɛvɛleshɔn 18:3

Na so i bi, bikɔs ɔl dɛn pipul na ɔl dɛn neshɔn dɔn drink in wayn, dat na di fri layf we dɛn dɔn liv wit am; dɛn wan we de rul na di wɔl dɛnsɛf dɔn liv di sem fri layf wit am, ɛn bikɔs i lɛk fɔ bay plɛnti plɛnti tin dɛn, dɛn wan we de tredin na dis wɔl dɛnsɛf dɔn jɛntri bikɔs i de bay to dɛn.”

Sɛkɛn Lɛta Fɔ Tɛsalonayka 1:8

faya we de kech go de fɔ pɔnish dɛn pipul we nɔ gri mek Gɔd kam na dɛn layf ɛn dɛn pipul we nɔ gri tek wetin di Gud Nyuz bɔt wi Masta Jizɔs tɛl dɛn.

Lɛta Fɔ Ɛfisɔs 3:8

A nɔ gud rich ɛnibɔdi we na Kristiɛn, bɔt Gɔd dɔn pik mi ɛn i dɔn gi mi di chans fɔ go tɛl ɔda pipul we nɔto Ju bɔt di big big blɛsin dɛn we Krays gɛt we mɔtalman nɔ ebul ɔndastand.

2 Kɔrint 10:5

wi de tek dɛn pwɛl dɛn tin we de mek pipul prawd we mek dɛn nɔ want fɔ no Gɔd; wi de yus dɛn fɔ mek pɔsin tap fɔ tink ɛnitin we go mek i nɔ du wetin Gɔd se i fɔ du, so i go chenj ɛn i go want du wetin Gɔd se i fɔ du.

1 Samiɛl 13:13

Samiɛl ala pan am. I se, “Na bigful tin yu du so! Yu nɔ du wetin PAPA GƆD we na yu PAPA GƆD tɛl yu; if yu bin du wetin i se, yu ɛn ɔl yu jɛnareshɔn dɛn afta yu bin fɔ bi kiŋ.

Lɛta Fɔ Rom 10:16

Bɔt nɔto ɔlman biliv di Gud Nyuz. Ayzaya insɛf tɔk se, “Masta, udat dɔn biliv di mɛsej frɔm we wi de tɔk am?”

Ditarɔnɔmi 32:6

Na so dɛn fulish pipul dɛn de we nɔ gɛt sɛns fɔ trit PAPA GƆD? In nɔto dɛn papa we mek dɛn, we mek dɛn bi wanol neshɔn?

Lyuk 24:25

Jizɔs tɛl dɛn se, “Una nɔ gɛt sɛns, una at fɔ biliv ɔl wetin dɛn prɔfɛt bin dɔn tɔk!

Matyu 24:24

Bikɔs sɔm pipul go kam we go lay se dɛn na di Mɛsaya ɛn sɔm go kam we go lay se dɛn na prɔfɛt, ɛn dɛn go du plɛnti wɔndaful wok ɛn sho plɛnti sayn, so dat da we de dɛn kin mek dɛn pipul ful we Gɔd dɔn pik fɔ sev, if dɛn ebul du dat.

Matyu 7:26

“Bɔt ɛnibɔdi we yɛri wetin a tɔk ɛn i nɔ du wetin a tɛl am, da pɔsin de tan lɛk fulman we bil in os pan sansan.

Apɔsul Dɛn Wok 16:6

Pɔl ɛn in kɔmpin dɛn go ɔlsay na Fri jya ɛn Galeshya bikɔs Gɔd in Spirit nɔ gri mek dɛn tɔk Gɔd in mɛsej na wan smɔl ples we dɛn kɔl Eshya.

Lɛta Fɔ Galeshya 5:11

Mi Kristiɛn pipul dɛn, una luk mi yon trɔbul, if a de tɛl pipul fɔ sakɔmsayz, wetindu dɛn stil de mek a sɔfa? If na so a de du, pipul nɔ fɔ vɛks wɛn a tɛl dɛn bɔt di day we Krays day na di krɔs.