Ɛksodɔs 19:5 - Krio Fɔs Oli Baybul

⁵ So naw, if dɛn obe mi ɛn go akɔdin to mi Kɔvinant, dɛn go bi mi bɔlyay pan ɔl dɛn neshɔn na di wɔl. Ɛn na mi gɛt di wanol wɔl. Na dɛn a dɔn pik,

Ɛksodɔs 19:5 Referans Kwoze

Ditarɔnɔmi 14:2

I tɛl dɛn se dɛn fɔ no se dɛn na pipul dɛn we PAPA GƆD insɛf dɔn pik pan ɔl di ɔda pipul dɛn we de na dis wɔl, fɔ bi in yon pipul dɛn.

Ditarɔnɔmi 7:6

I tɛl dɛn se dɛn na PAPA GƆD in pipul dɛn, ɛn se pan ɔl di ɔda pipul dɛn na di wɔl na dɛn nɔmɔ PAPA GƆD pik fɔ bi in spɛshal pipul dɛn.

Ditarɔnɔmi 26:18

PAPA GƆD insɛf dɔn gri se dɛn nain yon pipul dɛn lɛkɛ we i bin dɔn prɔmis dɛn se, in go du, ɛn i dɔn tɛl dɛn traŋa wan se, dɛn fɔ du ɔl wetin i dɔn se dɛn fɔ de du.

Malakay 3:17

PAPA GƆD Ɔlmayti se na dɛn go bi in yon pipul. I go gi dɛn spɛshal tritmɛnt wɛn i kam fɔ jɔj. I nɔ go mek pin sɛf krach dɛn lɛk aw nɔmɔ man we in bɔypikin de wok fɔ am, nɔ go mek natin du am.

Ɛksodɔs 15:26

I tɛl dɛn se, “If nɔmɔ una du wetin mi PAPA GƆD we na una PAPA GƆD we no wetin rayt bifo mi yay tɛl una fɔ du; dɔn una kip ɔl mi kɔmandmɛnt ɛn ɔda lɔ dɛn, a nɔ go pɔnish una wit ɛniwan pan dɛn sik dɛn we a bin put pan di Ijipshian dɛn. Mi na PAPA GƆD, a nɔ go mek una sɔfa.”

Di Sam Dɛm 135:4

Na PAPA GƆD dɔn pik Jekɔb fɔ bi in yon, ɛn in jɛnareshɔn dɛn fɔ bi in prayvet prɔpati.

Ditarɔnɔmi 4:20

Mozis se PAPA GƆD bin dɔn mek Izrɛl in yon pipul dɛn nain mek i bin pul dɛn kɔmɔt pan di trɔbul we dɛn bin de pan na Ijipt da tɛm de.

Ɛksodɔs 23:22

Bɔt if una obe am ɛn du ɔl wetin a se, a go dil wit una ɛnimi dɛn ɛn fɛt dɛn wan we de fɛt una.

Taytɔs 2:14

I sakrifays in layf fɔ pul wi kɔmɔt pan di bad ɛn dɔti layf we wi bin liv, fɔ mek wi klin so dat wi go bi in yon pipul dɛn we want du wetin gud wit ɔl wi at.

Ditarɔnɔmi 10:14

Mozis se na PAPA GƆD gɛt ɔp di skay te rich ɔp ɔp ɛvin, ɛn di ath ɛn ɔl wetin de de.

Ɛksodɔs 9:29

Mozis ansa di kiŋ se, we i kɔmɔt na dis siti, in go es mi an ɔp ɛn pre to PAPA GƆD. Di tinada go tap fɔ blo ɛn di kayn ren we fiba grabul grabul nɔ go fɔdɔm igen I se dat go mek dɛn nɔ se dis wɔl na PAPA GƆD gɛt am.

Di Sam Dɛm 24:1

Na PAPA GƆD mek di wɔl, so nain gɛt di wɔl; ɔl wetin de na wɔl ɛn ivin di pipul na PAPA GƆD gɛt ɔl.

1 Kɔrint 10:26

Dɛn rayt na Gɔd in Buk se, “Dis wɔl ɛn ɔltin we lib de na Gɔd yon.”

Job 41:11

Udat dɔn gi mi sɔntin we go se a fɔ pe am bak? Ɔl wetin de na dis wɔl, na mi gɛt am.

Ditarɔnɔmi 5:2

I mɛmba dɛn bɔt di Kɔvinant we PAPA GƆD we na dɛn PAPA GƆD bin mek wit dɛn na Mawnt Saynay.

Di Ibru Pipul Dɛn 11:8

Na bikɔs Ebraam bin biliv Gɔd mek i du wetin Gɔd tɛl am fɔ du wɛn Gɔd kɔl am ɛn sɛn am fɔ go na di ples we i prɔmis fɔ gi am. I grap ɛn go, pan ɔl we i nɔ bin no di ples we i de go.

Ayzaya 43:1

Bɔt naw, na dis PAPA GƆD se, in we mek yu, yu Jekɔb, in we mol yu, yu Izrɛl: “Nɔ fred, a dɔn bay yu bak; A dɔn kɔl yu bay yu nem, yu na mi yon.

Ayzaya 41:8

Bɔt yu Izrɛl, we na mi wokman, Jekɔb we a dɔn pik, dɛn na Ebram we na mi padi, in pikin dɛm;

Di Sam Dɛm 25:10

Ɔl udat de obe PAPA GƆD ɛn du wetin i want, in we go klia bikɔs we yu du tin PAPA GƆD in yon we, i de trit yu wit lɔv ɛn i nɔ go ɛva kɔmɔt biɛn yu.

1 Samiɛl 15:22

Nain Samiɛl se “PAPA GƆD want yu fɔ bɔn sakrifays to am ɔ i want yu fɔ du wetin go mek i gladi? No se fɔ du wetin PAPA GƆD se fɔ du, bɛtɛ pas di sakrifays we yu de mek to am.

Jɔshwa 24:24

Nain di pipul dɛn tɛl an bak se na PAPA GƆD na dɛn PAPA GƆD. Nain nɔmɔ dɛn go wɔship ɛn dɛn go du ɔl wetin i se.

Ayzaya 1:19

If una gri fɔ du wetin a se ɛn obe mi, una go ɛnjɔy ɔl di gud tin dɛn na di land.

1 Kiŋ 8:53

PAPA GƆD, wɛn yu bin pul wi papa dɛn kɔmɔt na Ijipt, yu bin tɛl yu savant Mozis se, na dɛn yu dɔn pik pan dɛn ɔda kɔntri dɛn na wɔl se dɛn na yu yon bɔlyay.

Ditarɔnɔmi 28:1

Mozis tɛl di Izrɛlayt dɛn se, if dɛn obe PAPA GƆD we na dɛn PAPA GƆD, ɛn tek tɛm du ɔl wetin i dɔn tɛl dɛn da de de se PAPA GƆD se dɛn fɔ de du, PAPA GƆD we na dɛn PAPA GƆD go mek dɛn bɛtɛ pas ɔl di ɔda neshɔn dɛn na di wɔl.

Ayzaya 56:4

Bikɔs na dis PAPA GƆD se: “Di okobo dɛn we de kip mi de fɔ blo ɛn rɛst, we pik fɔ du di tin dɛn we de mek a gladi ɛn ol mi Kɔvinant tayt,

Ɛksodɔs 24:7

Dɔn i tek di Kɔvinant buk we na de ɔl PAPA GƆD in lɔ rayt ɛn rid am lawd wan to di pipul dɛn. Dɛn ɔl ansa se dɛn go obe PAPA GƆD ɛn du wetin i se.

Jɛrimaya 7:23

Bɔt, na dis kɔmand a bin gi dɛm se, ‘Obe mi vɔys, ɛn a go bi una Gɔd ɛn una go bi mi pipul dɛm; una liv aw a se una fɔ liv, so dat una go ɛnjɔy una layf.’

Ditarɔnɔmi 11:27

I se dɛn go gɛt di blɛsin dɛn if dɛn du ɔl wetin PAPA GƆD se dɛn fɔ du,

1 Kɔrint 10:28

Bɔt if sɔmbɔdi tɛl una se, “Dɛn dɔn sakrifays dis it ya to dɛn tin we mɔtalman de pre to,” una nɔ fɔ it da it de, nɔto bikɔs una go fil bad, bɔt bikɔs if una it am, da pɔsin de go fil bad.

Ditarɔnɔmi 14:21

I se di Izrɛlayt dɛn na oli pipul dɛn, so dɛn nɔ fɔ it animal we day fɔ insɛf. Dɛm kin giwe ɔ sɛl am gi dɛn trenja na dɛn siti dɛn if dɛn want am. Wan tin we dɛn nɔ fɔ ɛva du, na fɔ kuk yɔŋ ship ɔ got pikin we de sɔk bɔbi.

Jɛrimaya 10:16

Di wan we Jekob gɛt nɔ tan lɛkɛ dɛn wan ya, bikɔs nain mek ɔltin, ɛn Izrɛl na di pipul dɛn we i pik fɔ insɛf; na PAPA GƆD Ɔlmayti nain nem.

Sɔlɔmɔn In Siŋ Dɛm 8:12

Mi greps gadin, mi yon yon na fɔ mi; yu Sɔlɔmɔn, yu gɛt lɛk dɛn wan tawzin, ɛn di wan dɛn we de kip di frut dɛn lɛkɛ dɛn tu ɔndrɛd.

Di Ibru Pipul Dɛn 8:9

Dis nyu agrimɛnt ya nɔ go tan lɛkɛ di wan we a bin mek wit dɛn granpapa-papa dɛn, da tɛm we misɛf bin tek dɛn kɔmɔt na Ijipt. Dɛn bin pwɛl di agrimɛnt we a mek wit dɛn, so a bin lɛf dɛn to dɛnsɛf.

Pita In Fɔs Lɛta 2:9

Bɔt una na lɛkɛ wan neshɔn, Gɔd dɔn pik una, una na pipul we de mek sakrifays to Gɔd ɛn we de wok fɔ Gɔd we na una Kiŋ; una na neshɔn we dɔn gi unasɛf to Gɔd, una na Gɔd in yon pipul dɛn we i pik fɔ tɔk bɔt di wɔndaful wok dɛn we i de du. Na Gɔd pul una kɔmɔt na dak briŋ una kam nain wɔndaful layt.

Jɛnɛsis 17:9

PAPA GƆD tɛl Ebraam se, “Yusɛf ɛn yu jɛnareshɔn dɛn, ɛn ivin dɛn wan we nɔ bɔn yet gɛt sɔntin fɔ du fɔ kip di Kɔvinant.

Ɛksodɔs 6:7

A go mek una bi mi yon pipul dɛn ɛn a go bi dɛn PAPA GƆD. Da tɛm de dɛn go no se mi na dɛn PAPA GƆD we a pul dɛn kɔmɔt pan slev layf na Ijipt.

Ɛksodɔs 8:22

Bɔt na Goshɛn, usay di Izrɛlayt dɛn tap, wan flay nɔ go de de. Dis go mek i no se na mi na PAPA GƆD na di kɔntri.

Ditarɔnɔmi 28:9

PAPA GƆD go mek dɛn in yon oli pipul dɛn, jɛs lɛk aw i bin dɔn prɔmis, if dɛn obe PAPA GƆD we na dɛn PAPA GƆD ɛn du wetin i se paopa, dɛn fɔ du.

1 Kronikuls 17:22

Ɛn yu mek Izrɛl we na yu pipul dɛn, fɔ bi yu pipul dɛn sote go; ɛn na yu, PAPA GƆD, dɔn bi dɛn PAPA GƆD.

Izikɛl 16:8

“Wɛn a bin pas nia una ɔda tɛm, ɛn luk una, a si se una dɔn du fɔ mek lɔv, so a kɔba una wit mi skat ɛn kɔba una nekɛdnɛs; yɛs, a bin prɔmis fɔ mared una ɛn a mek Kɔvinant wit una, ɛn una kam blant mi, na so Papa Gɔd we na Gɔd se.

Emɔs 3:2

“Na una a pik pan ɔl dɛn pipul na di wɔl, so a go pɔnish una gud fashin fɔ wetin una du.”

Emɔs 6:1

Waala go mit una dɛn bigman dɛn we liv izi layf na Zayɔn, una dɛn agbagba dɛn we fil se ɔltin ɔrayt wit una na Sameria, una dɛn bigman dɛn na da wɔndaful kɔntri we nem Izrɛl, we na una di pipul kin de go to fɔ ɛp dɛn!

Ɛksodɔs 34:9

Mozis tɔk to PAPA GƆD se, if fɔ tru tru se PAPA GƆD lɛk am, lɛ i go wit dɛn. I se di pipul dɛn traŋayes bad, bɔt lɛ i fɔgiv dɛn sin ɛn tek dɛn as in yon pipul.

Lɛvitikɔs 20:24

Bɔt PAPA GƆD in dɔn tɛl dɛn se, dɛn go gɛt di land as dɛn prɔpati, dɛn go kapchɔ am, land we fayn fɔ plant ɛn mɛn animal dɛn. I se nain na PAPA GƆD we na dɛn PAPA GƆD ɛn nain dɔn mek dɛn difrɛn frɔm ɔda pipul.

Ditarɔnɔmi 9:29

I tɛl PAPA GƆD se di Izrɛlayt dɛn na PAPA GƆD in yon pipul dɛn ɛn i bin dɔn du plɛnti wɔndaful tin dɛn wit in pawa fɔ dɛn sek, we i bin pul dɛn kɔmɔt slevri na Ijipt.

Ditarɔnɔmi 26:19

Mozis tɛl dɛn se, PAPA GƆD dɔn prɔmis dɛn se, in go mek Izrɛl shayn na di wanol wɔl; i go mek dɛn gɛt pawa pas ɔl ɔda neshɔn dɛn na di wɔl, dɛn go yɛri bɔt dɛn, tɔk dɛn gud nem, ɛn rɛspɛkt dɛn ɔlsay na di wɔl.

Job 41:3

I go beg yu lɛ yu nɔ kil am? I go bɛl yu wit fayn fayn tɔk?

Jɛrimaya 13:11

Bikɔs, lɛk aw skintayt kin grip pɔsin wes, na semweso a bin mek di wanol Izrɛl ɛn di wanol Juda ol mi tayt, so dat dɛn go bi mi yon pipul dɛm, pipul dɛn we go mek nem fɔ mi, we go mek dɛn prez mi, we go mek a femɔs; bɔt usay, dɛn nɔ gri lisin to mi. Na so PAPA GƆD se.