Ɛkliziastis 6:10 - Krio Fɔs Oli Baybul

¹⁰ Ɛnitin we de bi naw, bin dɔn bi ɛn i gɛt nem, ɛn ɔlman no se mɔtalman na mɔtalman ɛn dɛn nɔ go ebul fɔ agyu pɔsin we pas dɛn.

Ɛkliziastis 6:10 Referans Kwoze

Job 9:32

If PAPA GƆD na bin mɔtalman lɛk mi fɔ agyu wit, wi bin fɔ go kot mek dɛn jɔj wi kes.

Job 40:2

“Yu nɔ go lɛf fɔ agyu wit mi naw, mi we na PAPA GƆD Ɔlmayti? Yu we de agyu wit PAPA GƆD, ansa.”

Jɛrimaya 49:19

A de tɛl una, lɛkɛ we bɔku ship dɛn kin rɔn we layɔn de kɔmɔt na bush nia Riva Jɔdan, fɔ kam atak dɛm, na so a go mek dɛn rɔnawe pan am; ɛn a go apɔynt ɛnibɔdi we a pik fɔ rul am. Bikɔs, udat gɛt pawa lɛkɛ mi? Udat go sɛn kɔl mi? Us shɛpad go tinap bifo mi?

Ɛkliziastis 3:15

Wetin de bi naw bin dɔn bi ɛn wetin gɛt fɔ bi, insɛf bin dɔn bi, ɛn PAPA GƆD want wi fɔ tray fɔ no wetin de bi

Job 33:13

Wetindu yu de agyu wit am, se, “I nɔ go ansa mi?

Di Sam Dɛm 39:6

Mɔtalman in layf jɛs tan lɛkɛ shado, we san de ɔp, yu de si am, as san go dɔŋ so, i lɔs, ɔl in gbiŋbin na fɔ natin; di jɛntri sɛf we i de gɛda, i nɔ no udat go gɛt am we i day.

Di Sam Dɛm 103:15

Wi mɔtalman, wi layf shɔt lɛkɛ gras, wi kin fiba wayl flawa we fayn fɔ luk na bush;

Jɛnɛsis 3:9

Bɔt PAPA GƆD kɔl Adam; i se, “Usay yu de?”

1 Kɔrint 10:22

Una want mek Gɔd vɛks pan una? Una tink se una traŋa pas am?

Prɔvabs 21:30

Nɔn mɔtalman sɛns ɔ kɔni nɔ de mek PAPA GƆD nɔ du wetin i wan du.

Ɛkliziastis 6:11

Di mɔ pɔsin de tɔk tɔk, na di mɔ yu de si se layf na fɔ natin; aw naw yu go se wan pɔsin bɛtɛ pas in kɔmpin.