Daniɛl 6:4 - Krio Fɔs Oli Baybul

⁴ So ɔl di ɔda prɛsidɛnt ɛn Rɛsidɛnt Minista dɛn bigin fɔ fɛn we fɔ kɔmplen bɔt Daniɛl pan di wok we i de du na di kindɔm; bɔt dɛn nɔ bin ebul fɔ fɛn natin fɔ kɔmplen bɔt ɔ fɔ tek fɛn fɔlt pan am, bikɔs i bin tret, ɛn nɔn mistek ɔ fɔlt nɔ bin de pan am.

Daniɛl 6:4 Referans Kwoze

Pita In Fɔs Lɛta 3:16

bɔt una nɔ fɔ fos pipul fɔ biliv pan Krays ɛn una fɔ de lisin to wetin dɛn de tɔk. Una fɔ shɔ se ɔl wetin una de du na wetin una at tɛl una se rayt, so dat dɛn pipul we de tɔk se una nɔ de waka tret, ɛn dɛn wan we de tɔk bad bɔt di gud we una de du we una de waka wit Krays, go shem.

Lɛta Fɔ Filipay 2:15

so dat pipul nɔ go pɔynt fiŋa pan una. Dɛn go si se una na Gɔd in pikin dɛn we gɛt klin at ɛn we nɔ miks pan sin. Pan ɔl we una de na wɔl, wit pipul we wikɛd ɛn we de liv bad layf ɔltɛm, una yon layf fɔ tan lɛkɛ layt fɔ dɛn.

Pita In Fɔs Lɛta 2:12

Di we we una liv wit dɛn pipul we nɔ no Gɔd fɔ fayn, so dat wɛn dɛn go de tɔk se una de du bad, dɛnsɛf go si se una dɔn du gud wok, fɔ tru, ɛn dat go mek, di de we Gɔd go kam fɔ jɔj di wɔl, dɛn go prez Gɔd.

Lyuk 20:20

So dɛn bigin wach Jizɔs, ɛn dɛn sɛn ɔda pipul fɔ wach am. Dɛn tɛl di pipul dɛn we dɛn sɛn, fɔ mek lɛkɛ se dɛn na gud pipul, so dat dɛn go tek di wɔd dɛn we Jizɔs de tɔk kech am ɛn dɛn go kɛr am go bifo di bigman we de rul fɔ mek i go jɔj am.

Taytɔs 2:8

Pik yu wɔd dɛn gud gud so dat pipul nɔ go gɛt ɛnitin fɔ se, ɛn dɛn wan we nɔ lɛk yu go shem, bikɔs dɛn nɔ go gɛt ɛni bad tin fɔ tɔk bɔt wi.

Matyu 27:18

Paylet bin no gud gud se, di Ju bigman dɛn an ova Jizɔs to am bikɔs dɛn jɛlɔs Jizɔs.

Jɛrimaya 20:10

Bikɔs a de yɛri bɔku bɔku sumu sumu. Fred fred de ɔlɔbɔt! “Pul am kɔmɔt na yu at! Lɛ wi pul am kɔmɔt na yu at! Na so ɔl mi tayt padi dɛn de se, de wach fɔ mi dawnfɔl. ‘Sɔntɛnde, wi go ebul disiv am, datɛnde, wi go gɛt am to wetin wi want, ɛn rivɛnj pan am.”

Fɔs Lɛta To Timoti 5:14

So a fil se i bɛtɛ mek dɛn yɔŋ uman we dɛn man dɔn day mared bak, gɛt pikin ɛn wok mek dɛn man ɛn pikin biznɛs rayt, so dat dɛn pipul we nɔ lɛk wi nɔ go ebul tɔk ɛni bad tin bɔt wi.

Ɛkliziastis 4:4

A si se ɔl di wok ɛn sɛns we mɔtalman de sho pan in wok na bikɔs i wan tan lɛk ɔda pɔsin. Bɔt ɔl dat na fɔ natin. I tan lɛk we yu de tray fɔ kech briz.

Prɔvabs 29:27

Lɛkɛ aw bad pɔsin et gud pɔsin, na so gud pɔsin insɛf et bad pɔsin.

Di Jɔj Dɛm 14:4

In mama ɛn papa nɔ bin no se na PAPA GƆD de lid am fɔ fɛn we fɔ fɛt di Filistin dɛn. Da tɛm de, na di Filistin dɛn bin gɛt pawa oba Izrɛl.

Jɛnɛsis 43:18

We dɛn bin de go na di os, dɛn bin de fred. Dɛn tink se na fɔ di mɔni we dɛn fɛn insay dɛn bag dɛn, mek i mek dɛn de kɛr dɛn go nain os. Dɛn se Josɛf want tek dat mek ɛskyuz fɔ siz dɛn dɔŋki dɛn ɛn tɔn dɛn to slev.

2 Kɔrint 11:12

A go stil de du wetin a de du naw, so dat dɛn ɔda apɔsul nɔ go gɛt rizin fɔ bost se dɛnsɛf de du di sem wok we wi de du.

Jɔn 19:4

Paylet go mit di pipul dɛn wan tɛm mɔ ɛn tɛl dɛn se, “Una lisin, a dɔn mek dɛn briŋ am kam to una bak, so dat una go no se a nɔ si natin bad we i du, we fɔ mek a kɔndɛm am.”

Lyuk 22:2

Dɛn man dɛn we de mek sakrifays fɔ pipul sin ɛn dɛn Ju Lɔ ticha bin de fɛn we fɔ kil Jizɔs, bɔt dɛn bin de fred di pipul dɛn.

Matyu 26:4

Dɛn bagin fɔ ol Jizɔs ɛn kil am, mek plɛnti pipul nɔ no.

Daniɛl 3:8

Da tɛn de, sɔn pan di Babilonian dɛn bin go tɔk wit bad at se di Ju dɛn dɔn du bad.

Jɛrimaya 18:23

PAPA GƆD, yu no ɔl dɛn plan dɛm fɔ kil mi. Nɔ fɔgiv dɛn sin dɛm, ɛn nɔ wep dɛn sin kɔmɔt bifo yu. Lɛ dɛn bit dɛm bifo yu; dil wit dɛm di tɛm we yu vɛks.

Jɛrimaya 18:18

Nain dɛn se, “Una kam le wi mek plan agens Jɛrimaya, bikɔs wi nɔ go shɔt ɔf man we de mek sakrifays fɔ pipul sin fɔ tich wi di lɔ, ɛn sɛnsman dɛn fɔ gi wi sɛns, ɛn prɔfɛt dɛn fɔ tɛl wi PAPA GƆD in wɔd. Dɛn se, una kam lɛ wi tek wi mɔt bit am, ɛn lɛ wi nɔ tek natin we i de se siriɔs.

1 Samiɛl 22:14

Abimɛlɛk aks di kiŋ se if ɛnibɔdi de nain os we tan lɛk Devid we nɔ de mek ipokrit to am. Abimɛlɛk mɛmba di kiŋ se na Devid mared in gyal-pikin, dat na Devid de luk afta in bɔdi gad dɛn ɛn dat ɔlman nain os lɛk ɛn de rɛspɛkt am.

1 Samiɛl 18:14

Bɔt i bin de spak pan ɔl wetin i de du bikɔs PAPA GƆD bin de wit am.

Lyuk 20:26

Dɛn nɔ ebul kech Jizɔs fɔ wetin i tɔk we di pipul dɛn bin de; di wɔd we Jizɔs tɔk mek dɛn wɔnda ɛn dɛn nɔ ebul tɔk natin igen.

Jɛrimaya 29:7

Du ɔltin fɔ ɛp di siti we a dɔn sɛn una go ɛgzayl, ɛn pre to PAPA GƆD fɔ am, bikɔs na we di siti bɛtɛ, unasɛf go gɛt ɔl wetin una want.

Daniɛl 6:22

Mi PAPA GƆD sɛn in eŋɛl kan lɔk di layɔn dɛn mɔt, ɛn dɛn nɔ du mi natin bikɔs bifo PAPA GƆD, a nɔ bin du natin bad; ɛn a nɔ bin du ɛnitin bad to yu.”

Jɛnɛsis 41:38

Ɛn i tɛl dɛn se, nɔbɔdi nɔ go ebul du di wok bɛtɛ pas Josɛf, we gɛt PAPA GƆD in spirit insay am

1 Samiɛl 12:4

Di pipul dɛn ansa am se, i nɔ ambɔg nɔbɔdi wande ɛn i nɔ tek natin na pɔsin in an.

Daniɛl 5:12

bikɔs dɛn bin fɛnɔt se dis Daniɛl we di kiŋ bin gi nem Bɛlshaza, gɛt spirit we nɔ de mek mistek insay am, wit sabi ɛn ɔndastandin fɔ tɛl drim dɛn minin, fɔ sho ridul dɛn ansa ɛn klia prɔblɛm. So lɛ dɛn kɔl Daniɛl kam ɛn i go sho dɛn di minin.”