Daniɛl 6:12 - Krio Fɔs Oli Baybul

¹² So di man dɛn go nia am ɛn go tɛl di kiŋ bɔt di lɔ we dɛn bin pas. Dɛn se, “Kiŋ, yu nɔ bin pas wan lɔ se ɛnibɔdi we pre to ɛni ɔda gɔd ɔ mɔtalman, ɛn nɔ pre to yu waŋren fɔ tati dez, dɛn fɔ trowe am insay usay dɛn layɔn dɛn de?” Nain di kiŋ ansa se “Natin nɔ chenj; wetin di Mɛdis ɛn Pashian dɛn lɔ se, nɔ de chenj atɔl.”

Daniɛl 6:12 Referans Kwoze

Daniɛl 6:8

So, wi kiŋ, pas di lɔ ɛn sayn di pepa, so dat natin nɔ go chenj am, bikɔs na di lɔ dis we di Mɛdis ɛn Pashian dɛn se nɔ fɔ brok atɔl, ɛn nɔ de ɛva chenj.”

Ɛsta 1:19

I se, if di kiŋ lɛk i fɔ sɛn tɛl ɔlman se Vashti nɔto Kwin igen ɛn dat i nɔ fɔ ɛva kam bifo am igen I se di kiŋ fɔ rayt di lɔ insay usay di Mɛdis ɛn di Pashian dɛn lɔ de so dat nɔbɔdi nɔ go chenj am. I se di kiŋ fɔ fɛn ɔda pɔsin we sabi biev pas Vashti.

Apɔsul Dɛn Wok 16:19

Wɛn di pipul dɛn we bin gɛt di slev titi no se di titi nɔ go ebul mek mɔni fɔ dɛn igen, dɛn go grip Pɔl ɛn Saylas drɛg dɛn go bifo di bigman dɛn na di tɔŋ; di bigman dɛn bin de na di ples we pipul kin mit.

Apɔsul Dɛn Wok 16:24

Wɛn di bigman dɛn dɔn tɛl di gyad dat, di gyad go ib Pɔl ɛn Saylas na di sɛl we de insay insay di jel; dɔn i put dɛn fut insay dɛn ebi wud we gɛt ol insay fɔ put fut ɛn we de lɔk. Na dɛn dɛn bin de tek fɔ pɔnish bad pipul.

Daniɛl 6:15

Dɔn dɛn sem man dɛn mek plan ɛn go bak to di kiŋ go tɛl am se, “Mɛmba o, kiŋ, se insay di Mɛdis ɛn Pashian lɔ, nɔn lɔ nɔ de we di kiŋ go mek we fɔ chenj.”