Daniɛl 5:7 - Krio Fɔs Oli Baybul

⁷ Nain di kiŋ ala lawd lawd wan se mek dɛn briŋ di lukgrɔn man dɛm, di Babilonian dɛm, ɛn di man dɛm we no bɔt mun ɛn sta. Dɔn di kiŋ tɛl ɔl di sɛnsman dɛm na Babilɔn se, “Ɛnibɔdi we ebul fɔ rid wetin rayt na di wɔl, ɛn tɛl mi wetin i min, a go mek i wɛr pɔpul klos, ɛn wan gold chen rawnd in nɛk, ɛn i go bi di nɔmba tri rula na di kindɔm.”

Daniɛl 5:7 Referans Kwoze

Daniɛl 5:29

Nain Bɛlshaza gi ɔda, so dɛn wɛr pɔpul klos pan Daniɛl ɛn put gold chen rawnd in nɛk, dɔn dɛn anawns se na im fɔ bi di nɔmba tri rula na di kindɔm.

Daniɛl 5:16

Bɔt a yɛri se yu kin tɛl pipul wetin sɔntin min ɛn kin sɔlv prɔblɛm. Luk, if yu kin rid wetin rayt so, ɛn mek a no di minin, a go drɛs yu wit pɔpul, put gold chen na yu nɛk ɛn mek yu di nɔmba tri rula na dis kindɔm.”

Daniɛl 2:48

Dɛn di kiŋ gi Daniɛl bibig ɔna ɛn bɔku bɔku big big prɛzɛnt dɛm, ɛn mek am rula oba di wanol Babilɔn prɔvins ɛn edman oba ɔl di sɛnsman dɛn na Babilɔn.

Daniɛl 2:6

Bɔt if una sho mi di drim ɛn in minin, a go gi una bɔku prɛzɛnt ɛn pe una ɛn gi una ay ay rɛspɛkt. So una sho mi di drim ɛn wetin i min.”

Daniɛl 2:2

Nain di kiŋ sɛn kɔl ɔl di magikman dɛm, di luk grɔn man dɛm, di mɛrɛsin man dɛm ɛn di Babilonian dɛm, fɔ tɛl in di kiŋ di drim dɛm. So dɛn ɔl bin kam tinap bifo di kiŋ.

Izikɛl 16:11

Ɛn a drɛs una wit trinkɛt; a put breslɛt na una an, ɛn chen na una nɛk.

Ayzaya 47:13

Yu dɔn taya wit yu bɔku bɔku advays; lɛ dɛn tinap sev yu, dɛn wan we de divayd di skay, ɛn we de wach di sta dɛn, we kin pridikt wetin go bi to yu, we nyu mun kɔmɔt.

Daniɛl 4:14

I ala lawd, lawd wan ɛn se, “kɔt di tik dɔŋ, ɛn kɔt in an dɛn ɔl, pul ɔl di lif dɛn, ɛn skata skata in frut dɛnsɛf; mek di animal dɛn rɔnawe kwik kwik wan kɔmɔt ɔnda di tik ɛn lɛ di bɔd dɛnsɛf flay kɔmɔt pan di an dɛn.

Sɔlɔmɔn In Siŋ Dɛm 1:10

Yu jɔ dɛn fayn wit trinkɛt, yu nɛk wit dɛn pal bid.

Prɔvabs 1:9

Wetin dɛn de tɛl yu go tan lɛkɛ fayn fɛda at na yu ed, ɛn fayn silva chen na yu nɛk.

Ɛsta 3:1

Leta ɔn Kiŋ Zaksis promot Eman, di Agagayt man we na Amadetha in bɔypikin. I mek am bɔs fɔ ɔl di ɔda bigman dɛn we de wit am.

1 Samiɛl 17:25

Dɛn bin de tɔk se di man jɛs de chalenj Izrɛl so di kiŋ dɔn rɛdi fɔ mek di man we go kil am jɛntri. Dɛn se di kiŋ go mek di man mared in gyal pikin dɔn i nɔ go mek ɔlman nain papa in fambul nɔ pe taks igen na Izrɛl.

Di Nɔmba Dɛm 24:11

I drɛb Belam ɛn tɛl am se i bin wan gi am gud tin as pe, bɔt PAPA GƆD dɔn mek i nɔ go gi am natin fɔ pe.

Di Nɔmba Dɛm 22:17

bikɔs in go gi am gud tin ɛn i fɔ du wetin in di Belak se. I se Belam fɔ go ib swɛ pan dɛn pipul de fɔ am.

Di Nɔmba Dɛm 22:7

Di bigman dɛn na Moab ɛn Midian we i sɛn lɛf fɔ go wit smɔl mɔni fɔ lukgrɔn. Wɛn dɛn rich to Belam, dɛn tɛl am ɔl wetin Belak se.

Jɛnɛsis 41:8

We do klin i bin wɔri, so i sɛn kɔl ɔl in majikman ɛn sɛnsman dɛn we de na Ijipt. I tɛl dɛn in drim, bɔt nɔn pan dɛn nɔ bin ebul fɔ intaprit dɛn.

Ɛksodɔs 7:11

So di kiŋ insɛf sɛn kɔl i sɛnsman dɛn, in lukgrɔn man dɛn, ɛn in majikman dɛn na Ijipt. Dɛn yuz dɛn yon pawa fɔ du di sem tin.

Jɛrimaya 50:35

“PAPA GƆD se, wa go fɔdɔm pan di Babilonian dɛm, ɛn di pipul dɛm we tap na Babilɔn, ɛn in bigman ɛn sɛnsman dɛm!

Daniɛl 1:4

yɔŋ man dɛn we nɔ gɛt ɛni bɔt ɛn fɔ fayn, fɔ gɛt sɛns pan ɔltin, sabi buk gud gud wan, ebul fɔ lan kwik kwik ɛn go ebul wok na di kiŋ in kiŋ os. Ashpenaz fɔ tich dɛn aw fɔ rid ɛn rayt di Babilonian dɛn laŋwej.

Daniɛl 1:20

Ɛn ɛni kayn kwɛshɔn we di kiŋ aks dɛn pan sɛns ɔ sabi, dɛn bin bɛtɛ tɛn tɛm pas ɔl di magik man ɛn di mɛrɛsin man dɛn na di kiŋ in kindɔm.

Daniɛl 2:27

Daniɛl ansa di kiŋ se, “Nɔn sɛnsman, lukgrɔn man, magik man ɛn dɛn man dɛm we no bɔt sta kin sho di kiŋ di mistri we di kiŋ de aks fɔ,

Daniɛl 5:11

Wan man de na yu kindɔm we gɛt di oli gɔd in spirit insay am. Di tɛm we yu papa na bin kiŋ, dɛn bin fɛnɔt se layt, ɔndastandin ɛn sɛns bin de pan dis man, lɛk di sɛns we di gɔd dɛn gɛt. Ɛn Kiŋ Nɛbyukadnɛza, yu papa, bin mek am di bigman pan ɔl di magik man, mɛrɛsin man, Babilonian ɛn man dɛn we no bɔt mun ɛn sta,

Daniɛl 5:15

Naw dɛn bin dɔn briŋ di sɛnsman dɛn ɛn di mɛrɛsin man dɛn kam bifo mi fɔ rid dis raytin, ɛn mek a no di minin; bɔt dɛn nɔ bin ebul tɛl mi wetin di raytin min.