Lɛta Fɔ Kɔlɔse 1:6 - Krio Fɔs Oli Baybul

⁶ Di Gud Nyuz de prɛd ɔlɔbɔt na wɔl ɛn i de mek pipul gɛt blɛsin, jɛs lɛkɛ aw i rich una ɛn i de blɛs una frɔm di de we una yɛri ɛn ɔndastand fɔ tru aw Gɔd lɛk una ɛn aw i gud to una.

Lɛta Fɔ Kɔlɔse 1:6 Referans Kwoze

Jɔn 15:16

Nɔto una pik mi, na mi pik una; ɛn a pik una fɔ du plɛnti big wok we go mek ɔda pipul gɛt blɛsin sote go. Da tɛm de, mi Papa go gi una ɛnitin we una tek mi nem pre fɔ.

Lɛta Fɔ Filipay 1:11

A de pre mek una waka tret ɛn du dɛn gud tin we Jizɔs Krays in wangren nɔmɔ ebul mek in pipul dɛn du, ɛn dat go mek ɔda pipul rɛspɛkt ɛn prez Gɔd.

Pita In Fɔs Lɛta 5:12

Na Saylas, we a luk se na Kristiɛn brɔda we a kin trɔs, ɛp mi fɔ rayt dis shɔt lɛta to una. A want kɔrej una ɛn a want tɛl una se ɔl wetin Gɔd dɔn du fɔ una sho se i lɛk una, fɔ tru; una nɔ fɔ mek ɛnitin mek una dawt dat.

Lɛta Fɔ Kɔlɔse 1:23

Na so i go bi if una stil biliv di Gud Nyuz ɛn una nɔ dawt Gɔd. Una nɔ fɔ gri mek ɛnibɔdi mek una lɛf fɔ abop pan di tin we di Gud Nyuz we una dɔn yɛri mek una abop pan. Mi yon wok na fɔ tɛl una di Gud Nyuz we ɔlman na wɔl dɔn yɛri.

Lɛta Fɔ Rom 16:26

Bɔt naw wetin di prɔfɛt dɛn bin rayt dɔn mek plɛnti pipul no dis tru tin ya, ɛn Gɔd we de sote go, dɔn tɛl wi fɔ tɛl ɔlman na wɔl bɔt dis tru tin, so dat ɔlman go biliv ɛn du wetin Gɔd se.

Lɛta Fɔ Rom 1:13

Mi kɔmpin Kristiɛn dɛn, una fɔ mɛmba se, plɛnti tɛm a kin dɔn mekɔp fɔ go fɛn una, bɔt ɔltɛm sɔntin kin mek a nɔ go. A want fɔ wok fɔ mek una yon pipul dɛn biliv pan Jizɔs Krays lɛkɛ aw a dɔn mek sɔm pan dɛn ɔda pipul we nɔto Ju biliv pan Jizɔs Krays.

Jɔn 4:23

Bɔt di tɛm de kam ɛn i dɔn kam sɛf naw we Gɔd in Spirit go mek pipul ebul pre to Gɔd we na di Papa di rayt we, ɛn wɛn dɛn de pre dɛn go de mɛmba udat dɛn de pre to, fɔ tru.

Mak 16:15

Jizɔs se, “Una go ɔlɔbɔt na di wɔl ɛn tɛl ɔlman di Gud Nyuz bɔt mi.

Mak 4:8

Sɔm sid fɔdɔm na gud grɔn, dɛn gro fayn ɛn bia plɛnti. Sɔm bia tati, sɔm siksti ɛn sɔm ɔndrɛd.”

Matyu 24:14

Pipul go tɛl ɔlman na wɔl di Gud Nyuz bɔt wɛn Gɔd go rul di wɔl, so dat ɔlman go gɛt di chans fɔ yɛri ɛn biliv di Gud Nyuz; na da tɛm de di wɔl go dɔn.

Di Sam Dɛm 98:3

I mɛmba in lɔv ɛn aw i tru to di Izrɛlayt dɛn; Di wanol wɔl dɛn si aw PAPA GƆD de sev pipul.

Sɛkɛn Lɛta Fɔ Tɛsalonayka 2:13

Mi Kristiɛn pipul dɛn we di Masta lɛk, wi fɔ tɛl Gɔd tɛnki fɔ una ɔltɛm, bikɔs frɔm we di wɔl bigin, Gɔd bin dɔn pik una fɔ sev una bay we i mek in Spirit mek una bi in yon pipul dɛn ɛn bay we una put ɔl una at pan di Gud Nyuz bɔt Krays.

Fɔs Lɛta Fɔ Tɛsalonayka 2:13

Di ɔda rizin we mek wi de tɛl Gɔd tɛnki ɔltɛm nain dis: wɛn wi tɛl una Gɔd in mɛsej, una lisin ɛn una biliv se nɔto mɛsej we mɔtalman briŋ, bɔt na Gɔd in wɔd ɛn na Gɔd in wɔd fɔ tru. Gɔd de wok insay una at, una we biliv pan am.

Fɔs Lɛta Fɔ Tɛsalonayka 1:5

Na wi fɔs tɛl una di Gud Nyuz bɔt Jizɔs Krays. Wi nɔ bin jɛs tɔk nɔmɔ, wi du wɔndaful tin dɛn wit Gɔd in Spirit pawa ɛn wi sho una se wi biliv wit ɔl wi at se di Gud Nyuz na tru. Una no di layf we wi bin liv wɛn wi bin de wit una, ɔl dat na bin fɔ ɛp una.

Lɛta Fɔ Kɔlɔse 1:10

Dat go mek una ebul du wetin di Masta want, ɛn ɔltɛm una go de du di tin we go mek i gladi; una go de du ɔl kayn gud wok, ɛn una go de no mɔ ɛn mɔ bɔt Gɔd.

Lɛta Fɔ Filipay 4:17

Nɔto fɔ se a jɛs want una fɔ gi mi tin dɛn, di tin we go mek a gladi mɔ na we una go gɛt di pe fɔ di gud we una de du.

Lɛta Fɔ Ɛfisɔs 5:9

If una de na di layt, una go du wetin gud, ɛn wetin rayt ɛn tɔk wetin tru.

Lɛta Fɔ Ɛfisɔs 4:23

Lɛ Gɔd in Spirit chenj una at ɛn wetin una de tink.

Lɛta Fɔ Ɛfisɔs 4:21

A no se pipul dɔn tɛl una bɔt Krays ɛn aw una fɔ liv di tru layf we Jizɔs want una fɔ liv.

2 Kɔrint 10:14

So wi nɔ de du ɛnitin pas wetin wi fɔ du we wi de tɛl una di Gud Nyuz, bikɔs na wi fɔs bin rich to una ɛn tɛl una di Gud Nyuz bɔt Krays.

2 Kɔrint 6:1

So, wi we de wok wit Gɔd de beg una mek una nɔ mek di gud we Gɔd gud to una go fɔ natin.

Lɛta Fɔ Rom 15:19

di wɔndaful wok dɛn we sho se Gɔd gɛt pawa, ɛn di pawa we Gɔd in Spirit gɛt mek dɛn du wetin Gɔd bin want dɛn fɔ du. Ɛni say we a tap wɛn a bin kɔmɔt Jerusɛlɛm de go Ilirikum, a tɛl pipul di Gud Nyuz bɔt Krays.

Apɔsul Dɛn Wok 26:18

Yu fɔ opin dɛn yay; yu fɔ pul dɛn kɔmɔt na dak ɛn briŋ dɛn kam na layt. Yu fɔ pul dɛn kɔmɔt ɔnda Setan in pawa ɛn briŋ dɛn kam to Gɔd. Bikɔs dɛn biliv pan mi, Gɔd go padin dɛn sin, ɛn dɛn go de na di ples we dɛn pipul we Gɔd dɔn pik, go de.’

Apɔsul Dɛn Wok 16:14

Wan pan di uman dɛn we bin de lisin bin nem Lidia, i bin kɔmɔt na da tɔŋ we nem Tayatira. Na uman we bin de sɛl dɛn dia klos. Na uman we bin fred Gɔd ɛn di Masta mek i lisin gud wetin Pɔl tɔk, ɛn i biliv am.

Apɔsul Dɛn Wok 12:24

Di Kristiɛn dɛn go ɔlɔbɔt de tɔk Gɔd in wɔd ɛn dat mek mɔ ɛn mɔ pipul biliv pan Gɔd.

Apɔsul Dɛn Wok 11:18

Wɛn dɛn yɛri wetin Pita tɔk, dɛn lɛf fɔ grɔmbul. Dɛn bigin prez Gɔd, dɛn se, “Gɔd dɔn gi dɛn pipul we nɔto Ju chans fɔ mek dɛn lɛf fɔ du dɛn bad tin we dɛn bin de du, so dat dɛn kin gɛt layf we go de sote go.”

Matyu 28:19

Una go ɔlɔbɔt na di wɔl ɛn mek di pipul dɛn bi mi lanin bɔy dɛn; una baptayz dɛn wit di pawa we Papa Gɔd ɛn in Pikin ɛn in Spirit gi una.

Di Sam Dɛm 110:3

Di de we yu go rɛdi fɔ fɛt yu ɛnimi ɔl yu man dɛn go gladi fɔ go frɔnt. Na so dɛn go de blɔf bikɔs dɛn ɔl go frɛsh lɛk udat jɛs grap ali mɔnin fɔ kam fɛt fɔ yu.

Lɛta Fɔ Ɛfisɔs 3:2

A no se una dɔn yɛri se Gɔd dɔn blɛs mi fɔ du di wok we go ɛp una.

Lɛta Fɔ Rom 15:28

Wɛn a dɔn gi ɔl di kɔpɔ we di pipul dɛn na Masidonia ɛn Gris dɔn gɛda fɔ dɛn, a go kɔmɔt de ɛn a go pas to una wɛn a de go Spen.

Jɔn 17:19

Ɛn a gi yu mi layf fɔseka dɛn so dat dɛnsɛf go gi yu dɛn layf wit ɔl dɛn at.