Tamtama 13:4 - Nupela Testamen long tokples Kandas

⁴ A taro det lotu torom in labino sui, uni i sa pitar tar a dekdek sur in warkurai nami, torom a kuabor na wewegua. Ma det lotu kai torom a kuabor na wewegua, ma det watungi lena, “Osi mo ra i elar nama kuabor na wewegua? Kataio. Osi mo ra i pet lar pasi sur in umi? Kataio.”

Tamtama 13:4 Referans Kwoze

Tamtama 13:2

A kuabor na wewegua, ra a tama i, i elar nama lepat, ikut aru kikino i elar nama ru kikin a bea, ma a wano i elar nama wan a laion. In labino sui i pitar tar a tulu utna torom a kuabor na wewegua. A tulu utna ri: a dekdekino, ma anun a kiskis na king, ma a labino dekdek sur in warkurai nami.

Tamtama 18:18

Ra det in tama in nimisin o Babilon det in woiwoi lena, ‘Osi na tamon i elar nama wakak na tamon ri?’

Tamtama 13:15

Di pitar tar a dekdek tano sur in tabor a malalar ina mugano kuabor na wewegua nama wuwu na nilaun, sur in wasiso ma in itula sur din um doko det, ra ka det nem na lotu toromi.

Tamtama 12:3

Sapat una langit, ara ukinalong bulung i wanpat. In labino sui, a pinino i merek, a wonom mawit nin lorino, a noino komino, ma a wonom mawit na kukup na king kura una wonom mawit nin lorino.

2 Tesalonaika 2:4

In ebar torom a kum utna rop ra a taro det watung det a kum god ma det lotlotu torom det, ma in ulabo pasi ut, sur in kis una rumu na etabor anun o God, ma in watung puaso i lena, i ut o God.

Tamtama 17:14

Det in waim nama Barman na Sipsip, ma a Barman na Sipsip in winim pas det, uni i a Labino anun a kum lamlabino, ma a King anun a kum king. Ma det ra i sa pilok pas det, ma i kabo pas det, ma det nurnur mulus uni, det in win tomo nami.”

Tamtama 9:20

Ma a taro ra a laulau na ukadik ri ke um doko det, ka det nukpukus gusun a kum toktok ra det pami nama lamandet. Ka det mana gusun a lotu torom a kum laulau na nion ma a kum torotoro na god ra di pam a malalarindet nama gol, a silwa, a bras, a wat, o a nuduwai. A kum malalar ra ka det tamtama, ka det longoro ma ka det wanan.

2 Korin 4:4

O Satan, a god taginin una rakrakon bual, i sa upulu pas a nuknukin a taro ra ka det nurnur, sur ka det in tama a talapor ina Wakak na Wasiso ra i upuaso a minamar anun o Karisito, i ra a malalarin o God.

Tamtama 12:4

In kurunu i surupu pirso ru ara kukur tagun a tulu dino tagun a kum nangnang tagisapat una bakut, ma i woro pirso ru det urin upiso. Ma in labino sui i tur taru sa numugu tan a ino ra i leser na usus, sur in konom pas o nutunulik una du bung ut ra in usus ru i.

Tamtama 13:11

Numur a tama ara kuabor na wewegua bulung i burak pat una piso. Aru komino i elar nama kom ina barman na sipsip, ikut i wasiso elar namin labino sui.