Aposel 20:3 - Nupela Testamen long tokples Kandas

³ I kis tiro iai a tulin kalang. Numur i waninar sur in kas una sip utong una papor Siria, ikut i tasmani lena a kum te Juda det wasiso tomo pas sur det in um doko i. Ra i pukus a nuknukino ma i nuki lena i wakak sur in nan melet epotor una papor Masedonia.

Aposel 20:3 Referans Kwoze

Aposel 20:19

A taro Juda det wasiso tomo sur det in pam a kum sakino petutna un iau, ma a taramo a mamaut uni. Ikut, a papam ut torom a Labino, ma a unatino pas iau, ma a lurlur na matang i puku.

2 Korin 11:26

A sa wan una susut na inawan. A elar nama utna na iniru una inawan una kum danim, ma a ramano kum dino kai, milau an iru una laman a kum sakino taro. Milau an barato a iniru tan anung a taro ut, ma tan a kum usiro na taro kai. Milau an barato a iniru una kum tamon, ma una kum nubual kalako taro uni, ma sa utasi. Ma milau kai, an iru ulaman a kum torotoro na tistising una nurnur.

Aposel 25:3

Ra det saring o Pestus sur in mulaot tandet, ma det watungi lena, “Un maris met, ma un tulu ru o Pol urin o Jerusalem.” Uni det sa epak pas sur det in um doko i kut epotor una nun a inawan.

2 Korin 7:5

Ra met wanpat tong una papor Masedonia, ka met mana lar pas. Met barato a susut na mamaut sakit una kum papori met. Met barato a wasiso na kankan anun a taro torom met, ma nin ubalamet met taramo a nginara.

Galesia 1:21

Numur a wan utong una papor Siria, ma una papor Silisia.

2 Korin 1:15

A nuki lena, a nuknuki mot un met i lenri. Iri a kibino ra numugu a inanos tar mot lena an nanpat torom mot a mugano inawan, ra numur an milet a manru na inawan torom mot, sur an pitar a warut torom mot aru dino.

Aposel 21:3

Met tama a ailan Saipras una papor kair imet, ra met wan sakit ru i. Ra met wan utong una papor Siria, ma met sot tong o Tair, sur din usirok a kum utna tiro iai.

Aposel 19:21

Ra a kum utna ri i sa rop, o Pol i nuki lena in nan potor una ru papor Masedonia ma o Akaia sur in nan usapat o Jerusalem. Ma i watungi lena, “Ra a sa wan pas sapat o Jerusalem, an nan bulung utong o Rom.”

Aposel 18:18

Ra o Pol i sa kis suano pasi tong o Korin, i wan gusun det ra det tar tistisino una nurnur, ma i wan utong o Senkria. Tiro iai, di kumur rop ru a iwu na lorino, sur in ese i lena, i sa pam sot pas anun a liliman torom o God. Ra detul nam o Prisila ma o Akuila detul kas una sip utong una papor Siria.

Aposel 16:9

Una mirum, o Pol i tama ara tamtama. I tama ara musano, a te Masedonia i tur taru ma i saringi lena, “Un nan urin o Masedonia, ma un warut met.”

Matiu 4:24

Ma a wasiso un o Iesu i wan sarara una papor Siria rop. Ra det ben rop pas a taro ra a kum wur ngas na misait i ban laulau det, a taro ra a dekdek na ngunungut i ban laulau det, ma det ra a kum laulau na nion kura un det, det kai ra det ser mat lalang ma det ra a pinpinin det i mat. Ra o Iesu i ulangolango pas det rop.

Aposel 16:12

Ra met wan tagitiro o Neapolis utong o Pilipai. A tamon ra, i labo sakit taun a kum tamon rop tong una papor Masedonia, ra a taro Rom det kis iai. Ra met kis pas a kabano bung tiro una tamon ra.

Aposel 20:1

Ra i sa rop a purpuruon, o Pol i itula pas a taro na ususer, i udekdek tar det, ma i wasiso na itula taru tandet. Numur i wan utong una papor Masedonia.

Aposel 20:2

I wan papas una kum tamon ra, ma i uragot tar det nama susut na wakak na wasiso. Numur i wan utong o Grik.